Proverbs 25

Solomon-na epe agaa medaloma. (Sapta 25-29)

Gore Solomon-na agaa rudu rudu medaloma go ia.

Hesikia mo Juda aanuna aa mudu pirisa rabu nipuna pipaa ti aanumi go pipaa tu isimi.
Adaa Aa-me oyae-yae luabu nipuna kone-para pagaa su pia. Goa pea nipu adaa bi katema.
Goa pea pare aa mudu king-mi oyae luabu kudiripu ia-da nipumi adesaatalo kogono kalai adaapu pea. Go page niaame king-an bi minasaatalo pema.

Niaame king-na ia kone luabu mada na-ado kiritalima.
Gore go-rupa madaa niaame oyae luabu so yaa-para ia page no ipa solowara runane ia yaenu page mada na-adema.

Aanumi aana silva irua ora ria mealimi.
Goa pua ora epe pelete mada warialia.
Go-rupa agu waea peme aanu ratu rubalimi raburi nimu mo king raapu mada napiraalimi.
King-mi epea palia raburi mo ora epe ada kagure puri paloa aalia.

Ne mo aa mudu king raapu aalidare ni page aa adaa yade kone sua neme aakone nai pawa aape.
Ne adaa aa piritalo palidare orope nipu ipua ne epa ratalia rabu wae-para pali.
Goa palia-ga ne pa aa naraanu raapu pirua orope ne mo adaa aa-rupa pua pira teme rabu pirita paina.

Neme waea paedelo aipapulu yaa agaa mariaawa koso nalata pope.
Gore aa medamene adoa makirae koso ne aa yade teare neme ake pali yapae?

Nena adami aa raapu yae meda madaa agaa talo pali-daare ne mo nipuna ada-para pua agaa maredepoya tapape.
Pare neme agaa kudiripi meda aba pagaliri nalapedepeape.
10 Wala orope go agaa kudiripi lapedepeali rabu go aame agaa pame lapedepe ta teme rabu ne yala mapolalimi.
Goa pua ne madaa oro yalo wae kone-su aalimi.

11 Go yapare aa medame agaa ora epe-rupa meda lapedepealia raburi go aa nipuna agaare golome warini piksa-rupa madaa goa pua pepenare silpa-na pepena pae nona palia.

12 Epe kone i aamere nipuna adami aa maredepo yaya.
Goa pua mo nipuna adami aame nipuna aa-na agaa epeta kone saliadare nipumi golome warini epe yae meata-rupa la.

13 Go yapare agaa lama epaliade aame nipuna surube aame tea agaa redepona lama epalia-daare nipumi nimu raaname epe-rupa omena tea.
Gore aanumi nimuna maapu-para ipa kogaare nemede-rupa mada mealimi.

14 Onaa medalomame oyae ode meda katema loa wala nakatemere yai naepe pa poripu-para moae epeade-rupa mada agaa teme.

15 Gore neme agaa pawa kumupu loa nena agaa napagolalo pi onaame page wala pereketua raana omoa nena agaa mada pagalimi.
Goa pali rabu aa adaanu page nimuna kone mada perekealimi.

16 Gore neme alubi apaa medaloma repena apaa-para ina adaliri nena etaa ne robo-para nape.
Neme ora adaapu nano kone sua adaapu nali raburi nena robaa rubia maaku ratali.
17 Go page nena adami aa-na ada-para oro yalo napope.
Nena adami aame ne gime omalia.

18 Aa medame nipuna adami aa-para pa mariaa agaa teare etaa page rai page repename temede-rupa nipuna adami aa go tea.

19 Neme yaa agaa ne aa meda adalidare wae yapi di rabu ni rabamina kone salidare ne agaa odonalo pi aame eta neade nonapi aa yalia.
Go page ke odonalo pi aame pora pameme-rupa mada yalia.

20 Neme aa medana lo robaa kedaa ina piru aalia rabu go aa rabamealua kone sua neme rupa-yasa te pare mo aa mada narabameali.
Go piaene aa-re poripu epea rabu seti kolo rabua aipame rere madaa kiraawa peme-rupa mada yade.

21 Nena iaa meda reaeme omalia-daare eta kalape.
Ipa nalame omalia page neme ora kalape.
22 Neme goa pali-daare nipuna pea wae yae mada yala mapolaeye goa pe-pulu Adaa Aa-me ne epea palia.

23 Po ripumi yai mea epeade-rupa mada maa agaa paeme koneme aa ratu mayawaawa ini agaa-para oke rita.

24 Aa medana pa konemere ada masaa pirita pea rabu nipuna onana wae ratu yawe kone page rabuaaya.

25 Aa medame epe agaa su adaalu-para mea epalia-daare go aa nipu ipa kogare noa lo-roba kumapu-rupa tea.

26 Wae aa medame epe-rupa piri aa epaa yolo bebolaalia-daare nipumi ipa karerene-para wala emaagu piade-rupa mada pea.

27 Gore aa meda alubi apaa adaapu no mamalia-dare naepealia.
Aa medame nipu adaa bi kana kone sua kalaipu kogono pualia-dare naepeta.

28 Aa meda nipuna ratu yawea kone naminabaliare gore aa medame nipu rabunialia.
Gopiane aare adarena pape yokapa ia-rupa mada aa yade.
Copyright information for `KEW