Proverbs 28

Waea pi aanuri pama paala omo nimu pagola peme.
Goa peme pare epe kone i aanuri mena laiyano aaya-rupa puri aaeme.
Kantri meda-para piri onaame nimuna gavman senisi pulalo yada palimi rabu kagaa alopape aa mudu rado re-para alopatalo peme.
Go yapare aa mudu epeme surubolalo paliare ada kantri epe-rupa pa aalia.

Aa medame naraame ome aanu rabuniaatalo palia-dare gore yai adaa ipua e maapu marateade-rupa mada pea.

Rekena i agaa rasitemere wae yae peme aanuna bi minasaeme.
Rekena agaa ratua pimi aanumiri waea peme aanu rabuaniaaeme.

Waea peme aanumiri epe porare ake piaene yapalo nimu ora na-ademe.
Goa peme pare aa medaloma Adaa Aa ratulalo peme onaare epe pora ademe.

Aa meda nipu oyae dia yaliare epe aa yaliare amo ne aame pea luabu rabuaaya.

Ogege-aame rekena i yaenu luabu ratua palia-dare epe kone ia.
Pupitagi noa yada yada pi aanu raapu aalia-daare nipuna agi aaraanu yala polo pitimi.

Aa medame mone rudu minaloa onaa repara poropete adaapu waria mealia pare mada nasaalia.
Dia, pare araanu rabameme aana kinane palia.

Aa medame rekena i agaa narataliadare Gote-me go aana beten napagalia.
Gote-me go betene pageare pugu waru pugu pea-pulu mada napagalia.

10 Aa medame epe aa meda makiraatalo paliare nipuna paliade waeame nipu wala mapiraalia.
Go yapare aa meda nipu wae yae napi pawa aaliade-daare Gote-me go aa nipu epe epe yaenu mada katea.

11 Oyae adaapu i aanu nimu ora makuae yae ima kone imi pare naraanu kone waru sua amope aanuna kone makuaaeme.

12 Epe redepone aanumi nimuna kantri surubolalo peme raburi onaa luabumi go aa madaa ranaame waru omeme.
Wae aanumi mo kantri surubeme raburi onaame palaa omoa nipu kaledeme.

13 Aa medame nipuna wae yae pawa kudiripu pa ina kone sua piraliare go aame epea napea.
Go yapare aa medame nipuna wae-yae luabu lapedepealia-dare Gote-me go aa nipu odome omoa raba mealia.

14 Gore aa medame Adaa Aa madaa kone rulaawa piraliare nipu raana waru omoa pirina.
Go yapare nipumi Adaa Aa-na agaa rasua waeanu pu piraliare nipumi waea kedaa mu-aalia.

15 Gore kantri surube aame waea pua naaranu rabuaniatalo paliare nipu ota.
Gore mo mena laion nipumi e-adaa puri palo ta-rupa para mena beame eta asapea-rupa mada ta.

16 Gore mo kantri-na surube aa nipu epe kone na-i yaliare onaa luabu pa rabua tua ma-oyatalia.
Go yapare adare surube aame onaa luabuna oyae nayotea pare ma-oyaape madaa gime omaliare nipu adaalupu epe-rupa pa piralia.

17 Aa medame aa yago tumaomalia-dare go aa nipuna tapa poaawa kedaa mealia.
Goa pua nipu ora epe-rupa napiri omalia.

18 Gore aa medame epe kone epe pora ratua aaliare nipu epe redepoya piruaalia.
Pare waenupu aalia aare aipapulu oyo tua alupalia.

19 E-poae aa yaliare nipuna maapu-para eta ora adaapu su aalia.
Kogono radore waru na-i mada pama to tu ruboa pu aaliare nipu wae-rupa naraa pirualia.

20 Aa medame redeponea rataliare Gote-me go aa nipu epea palia.
Aa meda nipu mone adaapu aipapulu sano kone saliare Adaa Aa-me go amope nipu epena kone na-ia. Dia mo amope aa nipu kedaa waru katea.

21 Na-epeta koso madaa aa meda rabamua aa meda wala malopaliare gore ora na-epe ta.
Goa pea pare aa medaloma waeanu pulalo managola pimi pare mo nimu omeme pua rabameape mone ogesi kateme rabu epe-rupa giala kone na-imi.

22 Aa meda nipuna yaenu o waru yoa aalia-daare aipapulu amope alia.
Pare nipu orope aa naraa piralua kone naia.

23 Gore neme aa meda maredepoyali nipumi ranaame waru omalia.
Go palipide-a luabumi mo omeme kone luabu rabuaniaaya.

24 Gore aa medame agi araana oyaenu paake noa gupa ta.
Neme go oyaenu nameawa ta.
Paake nameawa ta agaare gupa aa medalomame oyaenu ma-oyaame-rupa mada yade.

25 Aa meda nipu oyae yoloa salua kone saliare aa adapumi go madaa ratu yawalimi.
Go yapare aa medame Adaa Aa madaa kone rulaliadare go aa nipumi epe-rupa pirua oyae adaapupe salia.

26 Aame nina makuae oyaeme nipuna bipa madaa raba mealia kone ia pare mada dia.
Go yapare aa medame epe redepone kone ratu aliare go aa nipu epe-rupa piralia.

27 Aa medame aa naraanu oyae pa ode kateare go aa nipu oyae mada narudutea.
Go yapare aa medame mo naraa onaa adoa oyaenu naruma kateare aa nipu ota teme.

28 Wae agaa lo wae pora rati aanumi kantri surubalimi-dare onaa nimu kalodoa piralimi.
Pare go wae aa mudunu omalimi raburi epe kone su epe pora rateme onaa nimu epe-rupa pirua surubeme.
Copyright information for `KEW