Proverbs 29

Gore aa meda maredepo yatalo palimi pare nipu wala pa pala pitia raburi gore nipu ora aipapulu raba meape pora nasalia.

Epe redepone aa mudumi kantri surubeme raburi onaa luabumi raaname omeme.
Goa peme pare wae aanumi kantri surubeme raburi onaa luabuna lo robaa-para kedaa rua re teme.

Aa medame epe kone mulalo palia-daare nipuna aapa aba epe kone masaalia.
Go yapare aa meda nipu ona pake nama palia raburi nipuna mone oyaenu gopara pua rubea.

King-mi mo kantri epe-rupa surubaliare go kantri epe-rupa pa alia.
Aa mudu king nipumi onaa luabuna mone oyaenu luabu nipu gina kone sua surubalia-dare kantri maoyaalia.

Aa medame nipuna adami aa omeme pi agaa tea-dare nipuna bipa nipu raape kona ma-aya.

Gore aa medame ni oyae pa gina kone salia-daare nipuna bipa nipu roape kona maaya.
Go yapare aa medaloma epea peme aanu nimu raana raapu aawa yasa lo aalimi.

Epe redepone aanumi mo aa naaranuna kedaa ritimi adoa go madaa kone waru sua raba mu aaeme.
Epe yae wae yae lo waea peme onaame re ora waru namakuaawa pa puaeme.

Paake pupitagi ne aanumi mo taun-para piri onaa waea peme rabu lo robaa-para radaa mapaaeme.
Goa peme rabu mo epe kone redepoya imi aanumi nimu epe kone kateme rabu nimu lo robaa kuma mua epe-rupa pimi.

Gore epe kone i aame aa meda kone wae i aa koso latalo palia-daare go aa nipu ora epe kone naia.
Go aa nipuri pa ratu yawe kone agu sua nipumi wae agaa loa wae pora pamuape kone padane ia.

10 Aa yagonu tumaomaeme aanumiri epe redepoya pimi aanu adoa rana na omeme.
Go yapare mo epe redepoya pimi aanumi nimuna epe-rupa redepoya pimi aanu epe-rupa pirina kone imi.

11 Kone redepone na-imi aanu nimuna ratu yawe kone sua agaa teme rabu pename ta.
Go yapare epe kone imi aanumiri nimuna ratu yawe kone pa nimuna lo robaa-para ina nalapedepene gimeme.

12 Yaa agaa ne aanumi mo kantri surube aa muduna kogono paliare mo yaa agaa ne aanu kantri-na ofisa kogono go wae aa luabumi palimi.
13 Aa adaame onaa luabu ini maria aya nimumi oyae adenalo pea.
Adaa Aa nipumi mo naraa aanu page kaloa nimu rabuniaaae aa medaloma page kata.

14 Gore aa mudu king piraliade aame aa naraanuna epe redepone koso pagalia-dare oro yalo go ruruna king pa piruaalia.

15 Neme nena nogo naaki tua epe mana te-daare nipumi epe kone mua epe makuae yae page mealia.
Go yapare nogo naakimi oro yalo nipuna raana ratua aaliare nimuna agira yala polo ma-pitia.

16 Waea pi aanumi kantri surubalimi rabu mo palimide wae yaenu ora adaa yalia.
Go palimi rabu kantri surubalimi aanu nimu adaalupu napiralimi gore redepone aanumi adalimi gore ora peboteme.

17 Gore neme nena naaki epe agaa lakeloa pirali rabu nipumi nena agaa pagoa epe-rupa pitia-dare epe kone sua pirali.

18 Adaa Aa-me onaa epe agaa nakata pisa yalore nimu kone rado rado sua pirita peme.
Go yapare aame Gote-na agaa ratua piralimiri raana raapu piralia.

19 Go yapare nena kogono aa-para agu agaa te-dare neme nipu mada nama epeali.
Pinawa neme agaa lakete pare nena agaa mada naratalia.

20 Aa meda nipu epe redepone kone nasaliare gore nipu epe kone minalo marede yamina palo adamina.
Go yapare aa meda epe agaa naloa pa mabebola teare gore wala maredepo yalape-rupa maralia.

21 Nena kogono naaki ogesi rabu nipuna kone meape yae kalamama pua yali-daare oropere aa nona palia rabu nena oyae rayo mealia.

22 Ratu ora aipapulu yawe aamere onaa aa radonu page ratu mayawaya.
Goa pua mo ratu yawe aa nipu wae yae adaapu pea.

23 Aa medame nipu ora aa ayo loa nipuna aako tua bi minasaliare nipuna bi mada rabuanialimi.
Aa medame nipuna bi rabuniaawa aliare orope go aa nipu adaa bi mealia.

24 Aa medame paake ne aa rabamealiare go aa nipu page paake ne aa nona palia. Go paliade yae amaa mea salia raburi nipu koso loa mada adialimi.
Go yapare nipumi paga saliare Gote-me nipu ma-oyalia.

25 Aa medame aa yagonu pala omaliare go pala re ena agona-para nipu pua piri nona pea.
Go yapare aa medame Adaa Aa mada kone rulaliare nipu epe-rupa mada piralia.

26 Aa adaapumi kantri rupara aa mudu pimi aanu omeme pulalo pemere nimu raana omena lo peme.
Goa peme pare Adaa Aa-me niaana kone adoa niaana pemanu ora epe-rupa rumaawa niaa rabamea.

27 Epe kone rulae aanumi waea peme aanuna kone adoa raana na-omeme.
Go yapare mo waea peme aanumi epe pora rateme aanu adape page raana na-omeme.
Copyright information for `KEW