1 John 5

Yesu imi Anutuac Naŋa.

Méŋnéŋ méŋ Yesu imi Kristo ʒéma ninʒéŋgézac, inéŋ Anutu arunec hicŋima kecʒac. Waŋu ic méŋnéŋ méŋ Maŋgoc goi héihéi wammianʒac inéŋ iwac naŋa momacnec goi héihéi wammianʒac. Neŋaŋ Anutu goi héihéi wammima iwac ʒézé seli ac tohoma imuacnec mia Anutuac nambérac héra goi héihéi waŋ énécmianʒiŋ imi asariyu niŋanʒiŋ. Anutuac ʒézé seli ac tohoanʒiŋ haka iminéŋ mia Anutu goi héihéi wammianʒiŋ wawaŋ meme imi mia wanʒac. Waŋu iwac ʒézé seli ac imi yéwéria qahac. Méŋ Anutu arunec hicŋiyec imi baecac ala batuc qema ogicanʒac. Waŋu baecac ala batuc qema ogicanʒiŋ ogicogic imuac kuha imi ninʒéŋ ninʒéŋnina. Ic méŋ Yesu imi Anutuac Naŋa ʒéma ninʒéŋgézac i qahac ʒéwiŋnec mérénéŋ baecac ala batuc imi hia qema ogicbacnec?

Doku igucnec ʒéma sac igucnec hayec imi mia Yesu Kristo. Doku igucnec sac qahac, néŋ doku ʒéma sac igucnec hayec. Uŋa Téréya, ackuaʒéc héla ʒézéac miŋina wanʒac imuac niŋac Uŋa téréyanéŋ héipucya wanʒac. Imuac niŋ haréwécnéŋ héipuc wamma ʒéanʒu. Imi mia Uŋa Téréya ʒéma doku ʒéma sac, haréwéc iminéŋ momacnec Yesu imi ic héla ʒézu. Neŋaŋ ic embac onac héipuc ac imi ninʒéŋgéanʒiŋ, waŋu Anutuac héipuc ac imi kuha ogicogicya wanʒac. Anutunéŋ naŋawac yomuhuc héipuc wamma ʒézac imuac héipuc ac yominéŋ Anutuac héipuc ac wanʒac; 10 Méŋ Anutuac Naŋa ninʒéŋgéanʒac inéŋ héipuc imi eŋeya qeriaiguc késa kecanʒac. Waŋu méŋ Anutu ménda ninʒéŋgéanʒac inéŋ Anutuac ikora ʒémianʒac tanec wanʒac. Némac niŋ, inéŋ mia héipuc Anutunéŋ Iwac Naŋawac waŋec imi ménda ninʒéŋgéanʒac imuac niŋ imuhuc ʒézua. 11 Héipuc ac imi mia yomuhuc; Anutunéŋ kekec hémbénaŋa nénécmiyec waŋu kekec hémbénaŋa imi Iwac Naŋawac qeriaiguc hezac. 12 Méŋnéŋ Naŋaguc kecʒac iminéŋ kekec hémbénaŋa mema kecanʒac. Méŋnéŋ Anutuac Naŋa ménda késama kecanʒac iminéŋ kekec hémbénaŋa imi ménda késa kecʒac.

13 Ni ackuaʒéc yomi onaru kekec hémbénaŋa imi he énécmizac imi niŋtegicmu niŋac ic embac Anutuac naŋa Yesuac qara ninʒéŋgézu onac mia kiwi yomi oénécmizua. 14 Nini Anutuac yomuhuc ninʒéŋgéma ewa déŋ wamma kecanʒiŋ; Iwac ewa siŋ tohoma iwawai méŋac méŋ qesimiwiŋ imi hia niŋ nénécmidacmac. 15 Inéŋ niŋ nénécmianʒac imi ninʒéŋiguc iwawai méŋac méŋ welecmianʒiŋ imi bec nénécmizac imi ninʒiŋ.

16 Ic méŋnéŋ alaya méŋnéŋ képésic humucac buŋa séc ménda wawaŋa imuhucya waŋkeru hémmaciguc iwac niŋac wamma Anutuaru welecmimac. Képésira humuc ac buŋa séc qahac waŋu Anutunéŋ kekec héla mimac. Képésic humuc mihicŋi mimia hemizaciguc imuac ʒéwelecmimu niŋac ménda ʒézua. 17 Héna ac logilogi imi mocʒoŋ képésic wanʒac, néŋ képésic tosara imi humuciguc ménda onagicma kemmac.

18 Méŋ Anutu arunec hicŋiyec inéŋ képésic ménda waŋanʒac imi nini ninʒiŋ. Némac niŋ, Naŋa Anutu arunec hicŋiyec i imi Inéŋ héŋgaleŋ wammiyu Biria miŋinanéŋ ménda késa osi wammimac. 19 Neŋaŋ imi Anutu arunec hicŋima kecʒiŋ, néŋ baec ic embac tosara imi Biria miŋina iwac qeriaiguc kecanʒu imi neŋaŋ ninʒiŋ. 20 Anutuac Naŋa mama hama niŋtegic qiŋtegic nénécmiyu neŋaŋ ac héla miŋina imi nimmima iwac qeriaiguc kecanʒiŋ. Kecma naŋa Yesu Kristoac qeriaiguc acguc kecanʒiŋ. Waŋu Yesu Kristo inéŋ Anutu héla ʒéma kekec hémbénaŋa kecʒac. 21 Nambérac hécna héŋgaleŋ waŋamuma baniarawac ireha igucnec néŋgacma lakec kecmu.

Copyright information for `KGF