2 Thessalonians 1

Mériaŋ ac.

Paulo ʒéma Siliwano ʒéma Timoteo nini Anutu maŋgocnina ʒéma Miŋ Kewunina Yesu Kristoac qeriaiguc kecanʒu Tesalonika hénaoriŋ onac kiwi yomi oénécmiziŋ. Anutu maŋgocnina ʒéma Miŋ Kewunina Yesu Kristoac murunec ewa hia ʒéma luaenéŋ onacmuru hema kecmac.

Gésigési ai.

Ninʒéŋ ninʒéŋ dacmuna hécnina, neneŋ onac wamma nalé séc Anutu ewa hia ac wammima kecbiŋac hezac. Waŋu imuac niŋni sécgézac. Némac niŋ? Onac ninʒéŋ ninʒéŋgina imi yandima sécgéyu goi héihéi eŋac eŋac késa kecʒu iminéŋ yandianʒac imuac mia imuhuc ʒézua. Waŋu unu nesi ʒéma ʒérabéra hénia hénia mocʒoŋ yanda imuac sucginaiguc naŋselima ninʒéŋgégic imuac suruc imi Anutuac hénaoriŋ ama séc kecʒu ionac neŋaoc meemma waŋ énécmianʒiŋ. Imuhuc wanni haka iminéŋ mocʒoŋ Anutuac niŋgésigési ai solaŋa imuac asé kiwiya wanʒac. Waŋu nalé imuaru Anutunéŋ iniru solaŋa waŋgic eŋeya héŋgaleŋ ama areŋa yanda imuaru kereŋ kereŋawac séc wammu niŋac ini qenʒeŋ manʒeŋ mihicŋi énécmigic kecʒu. Waŋu qenʒeŋ manʒeŋ mihicŋi énécmimu imi onac qenʒeŋ manʒeŋnéŋ kitiwa hiabia ku énécmimac. Waŋu Anutunéŋ solaŋa wanʒac imuac mia qenʒeŋ manʒeŋ bisima kecanʒu onac imi niniguc momacnec tacniniŋ mihicŋi nénécmima bakia hiabia meleŋ nénécmimac. Imuac Miŋ Kewunina Yesunéŋ eŋeya kua meme uŋahéra kucginaguc iniguc momacnec kurumeŋ igucnec geric bélaŋiguc wininimu nalé imuaru imi, Anutu ménda nimmizu i ʒéma Miŋ Kewunina Yesuac buŋa suruc hiabia imi ménda niŋtoho waŋanʒu i tasé ʒéra waiyaguc ku énécmimac. Ic imuhucya imi eneŋ Miŋ Kewuninawac kic tanera ʒéma iwac kuc edamuyaguc imuacnec elicgé énécmima taséginawac kisikiyoŋ hémbénaŋa mihicŋi énécmiyu memu. 10 Ini imi nonac héipuc ac énéc énézéya imi ninʒéŋgégic imuac niŋac Yesu imi nalé imuaru iwac météré énécmimia ʒéma hénaoriŋ ninʒéŋgé migic ionac sucginaiguc naŋu hémma mepési mima welicgé mimu niŋac mama hamac. 11 Imuac nini acguc nalé séc onac wamma ʒéwelec wammima yomuhuc ʒéanʒiŋ; Anutuninanéŋ onac niŋu héihéré énécmiyec imuac sécya waŋu naŋgé énécmiyu haka hiabia hénia hénia imuac siŋa nimma ninʒéŋ ninʒéŋ aiya imi iwac kuhanéŋ meselimu. 12 Waŋu Anutunina ʒéma Miŋ Kewunina Yesu Kristoac ewa hiaya niŋac Miŋ Kewunina Yesuac qaranéŋ sucginaiguc eeyaguc waŋu ini acguc iwac qeriaiguc eeginaguc wammu niŋac ʒéwelec waŋanʒiŋ.

Copyright information for `KGF