Psalms 101

Ic kewu ʒéma sisipac acya.

(Dawidiac legic ʒéra.) Ni goi héihéiga ʒéma ʒégési gésigawac legic héimaŋ. Yawe, ni gi gita kulele qehéi waŋgémmaŋ. Ni héna solaŋawac ewama kecmaŋ. Néma naléiguc nuac hanémbésémaŋ? Ni amanaiguc ewa solaŋanec hakana wamma kecmaŋ.

Iwawai biria imi imuac me imuac kicnaiguc ménda haiwa hemac. Héna ac andé qema kecanʒu ionac méʒétiti wamma kecba haka iminéŋ ménda qéqéhéréŋ waŋnémmac. Ewa qerigina ɋariŋ ɋariŋgia ieneŋ nuac murunec lakec kemma kecmu. Ni haka biria héŋara mema kecmaŋ.

Méŋnéŋ méŋ alahéra sasaŋgiaiguc ʒébiri qébiri waŋ énécmianʒac imi mebiri énécmiwa qahac wandacmu. Ségéra herec ʒéma séwi eŋeŋ imi bisiqatéŋ ménda waŋ énécmimaŋ.

Kicna hima baec yomuaru ic héla imuhucya mihicŋi énécmima énézéwa niguc momacnec kecmu. Héna solaŋa tima keŋanʒu imi kumu énécmiwa weleŋ qenémmu.

Ikoc ic imi méŋnéŋ méŋ amanaiguc ménda kecmac. Ikoc ac ʒéanʒu imi eneŋ kicnaiguc ménda wai énécmiwa nammu. Siŋunec séc ni baec yomuaru ic biria mocʒoŋ mebiri énécmiwa qahac wandacmu. Biria meme ieneŋ Miŋ Kewuac ama areŋa yandaiguc qahac wandacmu.

Copyright information for `KGF