Psalms 103

Anutuac hiayawac niŋac ewahia ac wammiyec.

(Dawidiac legic ʒéra.) Kekec uŋana, Yawe ʒéhiaru mina. Qerinaiguc heheya ini mocʒoŋ qara téréya ʒéhiaru migic. Kekec uŋana, Yawe ʒéhiaru mima, ewa hiawac buŋa iwarunec hahaya mocʒoŋ imuac eluŋ ménda gumac.

Inéŋ képésicga mocʒoŋ augémma yaŋhafiga mocʒoŋ mehiaruma kekecga imi humuc igucnec metecgé gémma goi héihéia ʒéma wésé niniŋanéŋ ic kewu opoc héigémmac. Waŋu iwawai hiabianéŋ ewa siŋga mesécgé gémmac. Waŋu séwigawac sac ɋeli imi meɋeligéŋu kunta nei ésécnec kucgaguc wambésémaŋ.

Yawenéŋ haka solaŋa wamma mema helanʒi énécmimia ionac niŋac wamma haʒéc hécgina héna acac séhaiguc ʒétecgé énécmianʒac. Imuhuc wamma hakaya Moseac muru, waŋu wawaŋ memeya imi Israel ɋelihéra énézéyu niŋgic.

Yawe imi wésé niniŋ waŋ énécmima ewa hia waŋ énécmima qeri biric focdac ménda niŋénécmima goi héihéi kuaya qeqeya waŋ énécmianʒac. Inéŋ képésicninawac nalé séc tualefic ac ménda waŋanʒac. Waŋu qeri biric nalé horua ménda doŋgéanʒac. 10 Képésic ninawac séc ménda meleŋ nénécmima, haka biriawac bakia howiacnec ménda meleŋ nénécmianʒac.

11 Hénia imi yomuhuc; Kurumeŋnéŋ baec igucnec ou eŋeŋa hezac ésécnec, goi héihéiya imi eeya héimianʒu ionac muru kuneŋ yanda he énécmianʒac. 12 Baec waŋgoŋa Is néŋ Wes igucnec lakec hezac ésécnec, inéŋ ac qeqe wawaŋanina imi qetecgéyu lakec keŋec.

13 Maŋgocnéŋ nambérac héra ionac wésé niniŋ waŋ énécmianʒac ésécnec, Yawe imi eeya héimianʒu imi onac wésé niniŋ waŋ énécmianʒac. 14 Inéŋ séwininawac hénia nimma, nini imi seitotoŋ wanʒiŋ imi niŋɋelima imuhuc waŋ nénécmianʒac. 15 Baec ic kekecninawac nalé imi ɋézézac ésécnec. Edamunina imi baec kisiawac ʒariŋ ʒuria ésécnec. 16 Imuhucya imi luhuc geriwagucnéŋ qacginaiguc qeyu qahac waŋu, baec kisianéŋ ʒariŋa hocanʒac.

17 Néŋ Yaweac goi héihéianéŋ eeya héimianʒu ionac hémbénaŋaiguc hémbénaŋa hema emma kecmac. Solaŋ dindiŋaya imi ɋelihécgina lépaya lépaya he énécmima kecmac. 18 Imi mia sisipac acya niŋtoho wamma héna acya niŋɋelima wamma meanʒu ionac mia imuhuc waŋ énécmianʒac.

19 Yawenéŋ ic kewu tatacya kurumeŋiguc meyacgéma, héŋgaleŋ kuhanéŋ kekec momac yanda galeŋgé énécmianʒac. 20 Kucginaguc wamma Yaweac ackuaʒéc meselima, ac ewaya niŋtohoanʒu kua meme uŋa ini Yawe ʒéhiaru migic. 21 Yawe weleŋ qemima iwac ewa siŋ wamma meanʒu kua meme uŋa ini Yawe ʒéhiaru migic. 22 Yawenéŋ ʒéhicŋi énécmiyu baec imuaru me imuaru inéŋ héŋgaleŋ waŋanʒac séc kecnaʒu ini mocʒoŋ Yawe ʒéhiaru migic. Kekec uŋana Yawe ʒéhiaru mina.

Copyright information for `KGF