Psalms 137

Yerusalemiguc kisikiyoŋ hicŋiyu ʒésiac waŋgic.

Nini Babilon baecac doku téfara ʒécgériaiguc tacma Zion niŋɋelima siariŋ. Imuaru suruŋ ic naŋu hawaiguc gita kulelenina koroni naŋec. Hénia imi yomuhuc; Hésa icac nénépésigic ieneŋ imuaru legic héiwiŋ niŋac nénézégic imuhuc waŋiŋ. Amanina kisikiyoŋ qenénécmigic imi eneŋ Zionac legic méŋ héigic nimma ségiségi wanni ʒégic imuhuc waŋiŋ.

Nini dimuhuciguc Yaweac legic imi baec méréraiguc kecma héiwiŋ? Yerusalem ni guac eluŋ numaciguc imi méra héina imi gita qeqeac héniawac eluŋ qemac. Guac eluŋ numaciguc, waŋu Yerusalemac nimba ségiségina tosara onogicma eŋeŋa ménda wammaciguc imi legic ménda héimaŋ niŋac ezelaŋnanéŋ owuruŋnaiguc mékétamac.

Yawe gi Yerusalem imi ʒérabéra mihicŋiyec nalé imuac niŋɋelima Edomac ɋelihéra ununa. Hénia imi ieneŋ imi yomuhuc ʒégic; Héndéŋ qéndéŋgic, ama wotuŋa momacnec hérédacma kisikiyoŋ qegic.

Kisikiyoŋac buŋa embac biria, Babilon baec gi, méŋnéŋ méŋ geŋ waŋ nénécminecac séc imuhucyanec waŋgémmac imi ségiségiyaguc wammac. Méŋnéŋ méŋ kokochécga hociguc qéséŋ énécmimac imi ségi ségiyaguc wammac.

Copyright information for `KGF