Psalms 75

Anutuac haka welic welicgiawac ewa hia ac wammigic.

(Legic galeŋawac; Ménda mebiri nénécmina. Asafeac legic ʒéra.) Ewa hia ac gézéziŋ, o Anutu nini ewa hia ac gézéziŋ. Guac qacga qacni hosucninaiguc kecma meleŋ nénécmianʒaŋ. Ic eneŋ guac wawaŋ meme welic welicgiawac ʒéaugic guac qacga gezac ninaiguc heyu niŋanʒiŋ.

Gi yomuhuc ʒézaŋ; Naléya imi mewa hezac, ni héna aciguc dindiŋanec ʒégési énécmimaŋ. Baec ʒéma imuac tacyachéra imi hirimu, néŋ neŋ imi baecac tandéya késaseligima kecʒua. Séwi eŋeŋ ic ionac séwi eŋeŋ ménda waŋgic ʒéma kaiʒiliweŋ ic ionac ilicgina ménda meyacgic eŋu ʒézua. Ini ilicgina meyacgic ou ménda emmac. Waŋu séwi eŋeŋac déméŋginanéŋ ac ménda ʒému.

Meyac énécmimia imi baec waŋgoŋa Is me Wes me Saut igucnec hahaya qahac. Ʒégésigési miŋina Anutunina Yawenéŋ méŋac meyacmima méŋac memamianʒac. Yaweac mériaiguc sokoc taru waiŋ hénia hénia lelecgégéya imuac sépéc sépéra qéitima érézac. Waiŋ imi inéŋ qocgéyu mazac. Mayu waiŋ imi imuac gocya momacnec baeciguc ic biria ieneŋ nedacmu. Ni imi Yakoboac Anutu imi hémbénaŋa ʒéau énécmima mepésimimaŋ.

10 Waŋu kaiʒiliweŋ ic ionac ilicgina imi mocʒoŋ mericdacma ic solaŋa ionac ilicgina meyac énécmimaŋ.

Copyright information for `KGF