Psalms 8

Ic imi némac hiaya niŋac niŋmianʒaŋ?

(Legic galeŋawac; Dawidiac legic ʒéra, waŋgoŋ hésiaguc.) Yawe neŋaŋ Miŋ Kewunina, guac qac buŋaganéŋ baec séc ʒézé ségiségiyaguc wanʒac. Gi imi ou kurumeŋiguc asac mararaŋga haina sécgéma hezac. Miŋ Kewuac haʒéchéra ʒéma ac bakia melembiŋ ʒé waŋanʒu imi eneŋ acgina qaimac niŋac, Miŋ Kewunéŋ waŋu kokoc namu nene ieneŋ Miŋ Kewu mepésimigic kuhaguc waŋanʒac.

Miŋ Kewuna méraga merawanéŋ memeya kurumeŋ ʒéma imuac iwawai qeriaiguc haina hezac maso ʒéma ménni sikiluc imi kicna hima hémba kuneŋ yanda wanʒac. Néŋ icac niŋna némaria waŋu, Miŋ Kewunéŋ niŋmianʒaŋ. Waŋu icac naŋa imi némaria waŋu héŋgaleŋ wammianʒaŋ? Ic imi mihicŋima séha komora méŋ memamina kuaya meme uŋa ionac bacginaiguc kerec.
8:5Heb 2:6-8, 1Ko 15:27
Waŋu edamu ʒéma qac buŋa eŋeŋanéŋ ic kewuac opocya ésécnec haiminec.

Waŋu Miŋ Kewunéŋ ʒéhicŋiyec kekec iwawai imi mocʒoŋ inicgaleŋ wammac niŋac ʒémima iwac héna bawaiguc onopocnec. Imi mia rama tuŋa tuŋa, burumakao tuŋa tuŋa, ʒéma ʒéléŋ baec kondoŋaiguc wiri yaŋ ʒéma sawaiguc nei hénia hénia ʒéma konduŋ dokuiguc lambéc ʒéma iwawai hicŋima héna hezac séc keŋha waŋanʒu imi mocʒoŋ yanda momacnec.

Yawe neŋaŋ Miŋ Kewunina, guac qac buŋaganéŋ baec séc ʒézé bipiyaguc wanʒac.

Copyright information for `KGF