Psalms 84

Ama téréyaiguc mepé qepésiai imi ségiségiyaguc.

(Legic galeŋawac; Korawac sac taséhéra ionac legic ʒéra.) Kurumeŋac téŋgiŋ ic tauseŋa tauseŋac Yawe, yei guac ama haliga imi héŋsorocya yanda. Nuac kekec uŋananéŋ guac ama yanda demiŋaguc imuac niŋkumuma kecba séwi qerina momacnec kuc qahac waŋu kic ɋeli kecanʒac Anutu guac guru héhéli wanʒua.

Nuac ic kewu, nuac Anutu, kurumeŋac téŋgiŋ ic tauseŋa tauseŋac Yawe, guac ocmuŋiguc reʒoreʒo nei acguc haecgina mihicŋiaŋgic ʒipilalec acguc haecgina mihicŋianʒu.

Guac amaiguc tacyac waŋanʒu imi eneŋ ʒézé ségiségi ginaguc. Ieneŋ imi nalé séc gi mepési gémma kecanʒu. Guac murunec kuc mema ewa qerigina meefigic Zionac héna yanda béréŋgé énécmiyu kecanʒu imi eneŋ ségiségi ginaguc. Ieneŋ imi baec wocwocya qara Baka
84:6Baka imi baec wocwocya méŋ Palesitainiguc hezac imuac qara. Waŋu qac imuac hénia imi ‘ʒésiac wawaŋa’.
imuacnec keremmu nalé imuaru doku hogocya sasala mihicŋianʒu. Waŋu kia nalé ménda ducŋiyunec hahaya imi acguc doku ʒékéŋa mihicŋi énécmianʒac.
Ieneŋ imi kuc mema toroqema ogicma mema eŋac eŋac keremma guac baec boŋa Zioniguc, Anutuac wésiaiguc wininima nammu.

Kurumeŋac téŋgiŋ ic tauseŋa tauseŋac Yawe, ʒéwelecna niŋnénna. Yakoboac Anutu, gezac qema niŋna. (Ohec) Saiwanina Anutu, gi halécnéŋ météré mimia iwac kic tanera imi hémma nimbésémaŋ.

10 Guac ama yandagaiguc ai meme momacguc kekera iminéŋ ama tosaraiguc ai meme tauseŋ kekec imi qeyu mazac. Ic biria ionac ama yandaiguc kekec imuac nimba omaya wanʒac, néŋ guac amagawac saŋgulaŋ imuac galeŋdac wamma kekec imuac nimba eeyaguc wanʒac.

11 Yawe Anutu imi kaiwe ʒéma saiwanina waŋanʒac. Yawenéŋ ewa hia waŋ nénécmima kekec eeyaguc mihicŋi nénécmianʒac. Ikoc qahac kecanʒu ionac iwawai hiabia ménda aŋgé tiénécmianʒac.

Kurumeŋac téŋgiŋ ic tauseŋa tauseŋac Yawe, guac héima naŋanʒu imi eneŋ ʒézé ségiségi ginaguc.

12 

Anutunéŋ muŋguc ewa hia waŋ énécmimac niŋ ʒéwelerec.

Copyright information for `KGF