Psalms 98

Baec ʒégési mimiawac mepésimigic.

(Legic ʒéra.) Yawenéŋ haka welic welicgia waŋec imuac niŋac legic ɋelianéŋ mepési migic. Iwac méra héiya ʒéma hua héiya téréyanéŋ onogicma kawali waŋec. Yawenéŋ aŋgéŋ titi ai imi énézéyu héŋgic. Waŋu iwac solaŋ dindiŋa imi baera baera ionac kicginaiguc kawé qema mewininiyec. Inéŋ goi héihéiya ʒéma haka héla imi Israel héna géséhéra ionac niŋac wamma sisipac acya niŋɋelima imuhuc waŋec. Waŋu baec ʒécgéria séc Anutuac aŋgéŋ titi ai imi héŋdacgic.

Baera baera ini ségiségi wamma Yawe hétéŋ héimigic. Ewagina meyacma ségiségi wamma legic héima mepési migic. Gitanéŋ Yawe mepésigic. Gita ʒéma ewaginanéŋ mepési migic. Tomuŋ mimisuleac hétéŋanéŋ ic kewu Yaweac wésiaiguc ségiségi wamma hériaŋ haimu.

Konduŋ ʒéma iwawai imuaru sécgéma hezac imi ʒéma baec ʒéma imuaru tacyac waŋanʒu imi mocʒoŋ hériaŋ haimimu. Yaweac wésiaiguc dokunéŋ luma méra qeqe waŋgic baec boŋanéŋ momacnec ségiségi wamma legic héimigic. Inéŋ mia baec ʒégési énécmimaŋ ʒé hamac. Inéŋ solaŋ dindiŋayanéŋ baec ʒégési énécmima, keŋkésa hakésaya qahac ic embachéra ʒégési énécmimac. Hénia imuac niŋac mia imuhuc mepé qepési wammigic.

Copyright information for `KGF