Psalms 99

Anutuac hénia téréya imuacwamma mepésimigic.

Yawenéŋ héŋgaleŋ waŋ énécmizac, ic embac momac yanda ʒénéŋ hirihiri waŋgic. Yawenéŋ Kerubim kua meme uŋa qacginaiguc tacʒac. Baecnéŋ hiriyu. Yawenéŋ Zioniguc kuneŋ kecʒac. Icembac hénia hénia ionac qacginaiguc meyac mimiawac kecanʒac. Énézéna ieneŋ qacga yanda welic welicgia imi mepésimu. Inéŋ téréya wanʒac! Ic kewunina imi kuhaguc. Inéŋ ʒégésigési dindiŋawac siŋa niŋanʒac. Inéŋ haka keŋkésa hakésaya qahac imi kumuyec. Yakoboac ichéra ionac sucginaiguc héna aciguc nanaŋ seli ʒéma haka solaŋa kumuyec. Ini Yawe Anutunina meyacmima iwac héniaiguc mepésimu. Inéŋ téréya wanʒac.

Hofac oo ichéra ionarunec imi Mose ʒéma Aron, waŋu Anutuac qara qacanʒu ionarunec imi Samuel, ic imuhucyanéŋ ewagina mocʒoŋnec Yawe ʒéwelecmigic acgina niŋénécmiyec. Yawenéŋ hosusu tandéyaiguc namma ionac énézéyu héna ac ʒéma ʒézé seli ac imi niŋtoho waŋgic.

Yawe, Anutunina, gi imi acgina niŋénécminec. Nalé tosiaiguc bakia meleŋ énécminec, néŋ gi imi képésic waiwaiac Anutu kecanʒaŋ. Ini Yawe Anutunina meyacmima baec boŋa téréya imuaru i mepési mimu. Yawe Anutunina imi téréya wanʒac.

Baera baera Anutu mepésimimu niŋac unuruyec.

Copyright information for `KGF