Revelation of John 5

Jon-me buk meda rogaa pale ena adisa

Go puma neme epe siaa madaa pia kana ki adisua. Nipuna pope ki-nanere nipumi rogaae buk meda wisa. Go buk-ri kamaa-nane page ru-nane page tya pale wisa. Go puma rekena wi kope ki medana luma medane laapo-me mo buk madaa rogaa palae wisa. Go puma neme puri pale ensel meda adisua rabu nipumi puri paloma go-rupa lisa: Ora epe ali medare aapi ya? Go buk madaa rekena wia-le aapimi rogaaba-ae kopere mada kepema buk lobalimi? Go lisa pare ali medare yaa-para napiri go su kamaa napiruma su ru-nane page ali meda napirisa. Go pisa-pulu no buk mada mea kepema ru-nane adape ali meda page napirisa. Go puma nimumi epe ali meda asapainaloma nipumi buk loboma adenalo napisa-pulu neme re ora waru lisua. Go rabu makuaae ali mudu medame ni go-rupa lagisa: Neme re nalape. Neme Yesu adape. Nipuri mo Juda alinu rurumi madisade puri pale mena laion yaade. Go puma naana kasua Devit-mi go puri pale ali madisa. Go alimiri koe ele rabuaaniaasa-pulu mo buk ki medana luma medane laapo rogaapa wiare nipumi mada kepema mea rumaalia lisa.

Jon-me sipsip mena si adisa

Go rabu neme sipsip mena si meda adisua. Nipu ali mudu pirape siaa king re-para rekesa. Go sipsip-ri nimumi abalade lu makomasimide adisua. Go puma mo sipsip-ri apo piru aaya ele maalana rikirana page mo makuaae ali 24-pela mudunu rikirana page nipu aasa. Go puma mo sipsip-ri nipu madaa kalu kepa ki medana luma medane laapo aoma le ki medana luma medane laapo aasa. Gore go-rupa Gote-na ki medana luma medane laapo Kone Popo go madaa pirina Gote-me nimu su raayo-para mea rapasa. Go rabu mo sipsip-mi Siaa King madaa piri-para pumare Gote-na popa ki-nane wi buk puma misa Gore nipumi go buk misa rabu apo epe paa pi ele maala page makuaae ali mudu 24-pela page mo sipsip madaa rumu pege puma pirisimi. Go ali mudu raayome rabialo saapirisimi. Go page kana gol-me warili plet maa wisimi. Go plet madaare epe kaa pi lodo kira-ae ele adaapu wisimi. Gomere Gote-na ruru enaalina lemede beten lisimi. Go raburi nimumi kagaa yasa meda go-rupa lisimi:

Ne ora epelea-le mogo buk mumare
Mo nipu rogaabaaya reke mada kepema sape.
Gore abalade nimumi ne lu makomasimi rabu
Nena yaapimi Gote-na enaali piraminalo kabesi.
Gore neme ruru rado rado piri enaalinu-para
Adaa agale rado rado leme-para page to rado rado aeme enaalinu page
Ora kimisu su raayo-para piri enaalinu page nena yaapimi kabesi.
10 Go enaali raayore neme naana Gote-na lodo kira-ae kogono kaloma
Go enaali mapiraasi.
Go pisi-pulu nimumi su kamaa king piruma surubalimi lisa.

Sipsip mena sina bi minasaasimi

11 Gore neme wala adisua rabu neme ensel adaapuna agale pagisua. Nimuri ora adaapu pirisimi pare mada nadipialima. Gore nimu king siaa-para pa piri ele maalapu-para makuaae ali mudunu 24-pela mea kutapu maaoma aasimi. 12 Go puma nimumi puri paloma go-rupa yasa lisimi:

Go sipsip mena abalade lu makomasimi
Pare abi nipu epa pia.
Go pea pare nipumi surubape puri mu aaya.
Go page epe ele raayo-para epe makuaae kone-para
Adaa puri page mu aaya.
Go puma enaali raayome nipuna bi minasalimina.
Go pumare nipumi epe paana puri-para adaa bi-para mu aaya lisimi.
13 Go rabu neme so yaa-para piri ele raayo-para su kamaa piri ele raayo-para su ru-nane piri ele page go ele raayona agale pagisua. Gore nimu raayome yaaloma go-rupa lisimi:

Gote-re Mudu Ali siaa king madaa pia-le nipuna sipsip si page
Nipu laapome adaa bi-para bi minasaape kone-para epe paana puri-para
Ora puri raayo-para ade abuna yaalo muaaepe lisimi.
14 Go lisimi rabu mo pirisimi ele maalame talo: Go ora yaade loma agaleme abulisimi. Go puma makuaae ali mudu 24-pela nimu rumu pege puma nipuna bi minasaasa beten lisimi.

Copyright information for `KJS