Mark 11

Yesuye Yoluselem mi mapoo wiligi odoo masi toboloso gadi

(Mat 21:1-11, Luka 19:28-40, Yon 12:12-19)

Yesu o hamamee dili odoo sabolo simi Yoluselem mi koola topome, Olipi mubi halege mapoo mosobia bakadio, Betepage osoloso Betani mapoo peledabaso. Osoloso Yesuye o hamamee dili odoo bakadio diye doloso dimapoo egeesee takaso, “Mosobia koogee mapoo dileso, omapoo ogoga be hu giekauwa, o hu donki, edebeeyo miligi mapoo buloso koo dili, mu mapoo ebigiso bagagoloso, homo mapoo bagagoo moloso. Esiga niyo ebigi pidi pogoloso, hapoo hado sibe. Odoo heeso niba ogoo toowala dee takooga, niyo wulo egeesee takee, ‘Donki be hagee epedee Lodeeye goomogogona, osoloso see hamamee odoo heeso ka hado sibileigo,’ dee takeeye,” diso.

Yesu o hamamee dili odoo bakadio mosobia omapoo dileso, donki be moso peegoo ebigi bagagoloso eli palaga tobudume egeiso. Eseme diayo donki be ebigi bagagoo pidi meleeno, odoo abo omapoo debei oso dimapoo egeesee takaso, “Niyo ogoo talame donki be ebigi bagagoo egee ka pidala?” Eseme Yesu o hamamee dili odoo oso to nei Yesuye dimapoo takee doloso taka tobuloso egeesee takaso. Eseme odoo abo oso donki be hado dilei soowa diso. Eseme diayo donki be Yesu mapoo hado sibume, o miligi mapoo dugo pooloso, Yesu dokodoo buloso diso. Osoloso odoo mooloogoodoo susuga Yesu mapoo goomogolone dia gidei oso eli Yesuye dilei mapoo malalo palagamo dime, odoo aboso woiyo dibada go mapoo segei kookooloso palagamo diso. Yesu yo domo abaga sibume, odoo malalo debei sabolo osoloso Yesuwo miligiyo abaga sibadee odoo oso idegisilone, egeesee takaso,

“Inolome! Iba Godee mapoo goomogo!
Odoo Godeeyo hu maga kitulugu sabolo sibo yo Godeeye pidi!
10 Wiligi doloso badeli mi ee sibo Godeeye pidi. Hagee ibada amawe Debidiye wiligi doloso badebei mi egesi masi malaiso.
Osoloso iba kei mi ma dokodoo Godee mapoo goomogo!”
11 Osoloso Yesu o hamamee dili odoo sabolo Yoluselem mapoo sibileso, Yesu Godeeyo tei moso kulodu gadiso. Yo moso kulodu bi susuga mapoo egegemeleso diso, bei olo neligime, osoloso o hamamee dili odoo 12 sabolo Betani mi mapoo diadeeso.

Yesuye pigi homo mapoo to taka

(Mat 21:18-19)

12 Yesu Betani mapoo tialoso, gesikolo Yoluselem mapoo dimeleeno, eli domopoo yo dia hodiaso. 13 Eseme Yesu eli sage abaga sibulone, pigi homo du egeiso. Eseme ko pameleyaga hodu dileso, egeiso. Esino ko mauwe, hedepe duwenabu, bei pigi ko peli eyo beeamenee. 14 Yesuye pigi homo mapoo egeesee takaso, “No hamamee homokoko see palaime!” Yesuye egeesee taka, o hamamee dili odoo duso.

Yesuye Godeeyo tei moso kuloduga odoo peegoo hasusopugu

(Mat 21:12-17, Luka 19:45-48, Yon 2:13-22)

15 Yesu o hamamee dili odoo sabolo Yoluselem mapoo peledoboloso, Yesu Godeeyo tei moso tegei kulodu gadileso egeino, odoo bi abo nei moleeso talame si sabolo, osoloso odoo bi abo nei moleeso talaga molome egeiso. Osoloso molee mudu opusomodi piligeli debi poba sabolo molo talame poba sabolo bidige puguloso, diba susuga peegoo hasuso puguso. 16 Odoo susuga bi toloso Godeeyo tei moso tegei eli pee kuloduga gadiyaga Yesuye hamaga takaso. 17 Yayo dimapoo eligilone egeesee takaso, “Godeeyo booka ma kulodu toso egeesee takoo, ‘Mo tei moso odoo mosobia susuga maga oso Godee mapoo toodagili moso.’ Esino niyo goo egesi tolone, adaba molee heli teliso. Esiga niyo mo moso hagee see heli teli moso paso.”

18 Eseme tei moso wiligi tebisa sabolo tei eligili odoo susuga sabolo oso to hagee dume, diayo Yesu wolomalame eli esigamo silesibiso. Bei Yesu mapoo kooso, bei diayo eligi mapoo odoo susuga tei telega peegeeyaga, osoloso odoo susuga Yesuye eligi dume howoogaso osoloso goomogaso.

19 Osoloso habe omapoo Yesu o hamamee dili odoo sabolo mi toowa egee pogoloso diadeeso.

Pigi homo oso sia goo

(Mat 21:20-22)

20 Gesikolodee mapoo diba eli domopoo diadeega meleeno, diayo pigi homo egeiso. Pigi homo o dee sabolo o kou sabolo, osoloso too susuga sio doloso molome egeiso. 21 Pita Yesuye daga homo mapoo to taka goolee puguloso Yesu mapoo egeesee takaso, “Eligili odoo, no ege. Nayo daga pigi homo mapoo to taka oso olo sio doloso molo,” diso.

22 Eseme Yesuye o hamamee dili odoo dimapoo egeesee takaso, “Niba Godee mapoo tei te,” diso. 23 “Ayo nimapoo goo hee toowa taka, edebeeyo mubi hamapoo egeesee takooga, ‘No dileso, abei mapoo kulodu mei,’ dee takooga, o sooloo ma kulodu googoolee bakadio delega, yayo taka goo oso tei peledabalai dee gooleega, Godeeye goo hagee tei peledabalame modolaiso. 24 Esiga ayo nimapoo taka, niyo toodaga goo oso ogoo bi talame ka toodagoosomo, bi egee talai doloso tei toga, bi egee niyo talaiso. 25 Esiga niyo howo gise goo toodagolone, odoo heeso nimapoo goo tokenee moodoo pepoko mologa, niyo odoo egeeyo goo tokenee daga malalo boobado pigi. Egeeseega nibada oma keimi ma dokodoo egee bado, Godeeye nibada goo tokenee hapoloso boobado pigileiso. 26 Niyo odoo heeyo goo tokenee boobadelega poogooga, nibada oma keimi ma dokodoo egee bado Godeeye nibada goo tokenee hapoloso boobadalaime.”
11:26 To hagee odoo abo oso taka Makaye hogugu dee takeliso, esino odoo bei oso taka Makaye hogugule dee takeliso.


Yesuye kitulugu maga woosa goo

(Mat 21:23-27, Luka 20:1-8)

27 Diba see Yoluselem mapoo sibadeeso, osoloso Yesu tei moso ma kulodu silino, tei moso wiligi tebisa odoo sabolo, tei eligili odoo sabolo, Yu odoowo wiligi tebisa odoo sabolo oso, yimapoo sibileso woosaso, “No kitulugu kamaga toloso goo susuga egee ka moodoomo silala? Nayo goo susuga hagee moodoolame kitulugu namapoo odoo agayo teneeyo?”

29 Eseme Yesuye dimapoo nei takaso, “Ayo nimapoo wosolaiso. Osoloso niyo amapoo nei takooga, ayo goo susuga hagee moodoolame amapoo kitulugu tenee hagee odoo ee nimapoo takalaiso.” 30 Eseme Yesuye dimapoo woosaso, “Yoneeye odoo susuga howo sauwidiga goo eyo bei kasiyo, kitulugu Godee maga simiyo, o odoo hee maga simiyo? Niyo amapoo to nei takee!” diso.

31 Eseme diso nediliyo to moumeleso takaso, “Iyo Godee maga simi dee takooga, yayo imapoo egeesee takalaiso, ‘Bei kasimaga niyo Yonee mapoo tei telega ka poogoowo?’ dee takalaiso. 32 Esino iyo yayo kitulugu egee odoo maga simi dee takooga, odoo susuga oso imapoo kamanagalaiso.” Bei odoo susuga oso goolee Yonee yo tei Godeeyo to tosili odoo dee gweli.

33 Eseme diayo Yesu mapoo to nei egeesee takaso, “Iba gooleedele,” diso.

Eseme Yesuye dimapoo to nei takaso, “Ayo kitulugu too goo eyo bei nimapoo takalaime,” diso.

Copyright information for `KKC