Mark 4

Ko segili odoo eyo dio masi oposusu

(Mat 13:1-9, Luka 8:4-8)

Yesuye Gelili abei palaga odoo susuga mapoo see tobu eligimeleeso. Esino odoo susuga yimapoo mooloogoodeme, yo du ma kulodu meledoboloso buloso pepoko hoogoo dileso amaga to takaso. Yesuye dio masi susuga dimapoo eligiliso. Yayo eligilone dimapoo takaso, “Niba dui! Odoo hee ko sakalame diso. Yo omapoo ko kukopugumo silino, ko abo eli domopoo misikedibaso, eseme só aboso sibileso neso. Osoloso ko abo yukokisi mi mapoo misikedibaso, eseme mi sebega saga palaso. Esino osoko pa oso dei moodoome silikaloso weidaso, bei too mi ma kulomoo gameilega. Osoloso ko abo we ti bei kookoone poogoo omapoo misikedibaso, eseme we ti ko sabolo palaso. Esino we tiso ko eyo bou tia deme dadailoso ko pele poogooso. Osoloso ko abo mi medee tekepo mapoo misikediba oso medee tekepo kauwa palaso. Osoloso ko paso, su aboso ko 30 egeesi paso, osoloso abo ko 60 egeesi paso, osoloso abo ko 100 egeesi paso.”

Yesuye egeesee takaso, “No dulu bolo daga, ayo hagee takoo nayo medee dui.”

Yesuye dio masi taka goo eyo bei

(Mat 13:10-17, Luka 8:9-10)

10 Hamamee Yesu obusomo badebeeno, o hamamee dili 12 odoo sabolo, osoloso odoo abo yimapoo mooloogoo doloso debei odoo oso yimapoo, yayo dio masi taka goo eyo bei woosaso. 11 Yayo dimapoo nei takaso, “Godeeye wiligi doloso badeli goo ee yayo mada magoloso meleeso, esino nimapoo woola yilige pigileiso. Esino peegoo debeli odoo mapoo dio masi takalaiso. 12 Esiga Aisayaye taka hagee peegoo debeli odoo maga taka,

‘Diayo medee hodu dileso agalaiso,
esino goo eyo bei diayo ogoloso gooleedalaime.
Osoloso diba medee hodu dileso to taka duleiso,
esino goo eyo bei diayo medee gooleedalaime.
Diayo gooleedoo diepi, dibada goo tokenee maga waki pialoso,
Godeeye goo tokenee hapoloso boobado pigiliyo,’ diso.”

Yesuye ko segei eyo bei taka

(Mat 13:18-23, Luka 8:11-15)

13 Yesuye o hamamee dili sabolo odoo abo dimapoo takaso, “Bei kasee maga niba dio masi hagee medee gooleedelega ka pagala? Niba dio masi hagee eyo bei niyo medee gooleedelega poogooga, dio masi abo nimapoo ayo takooga niyo kasee gooleedalaisomo? 14 Ko edebeeyo kukopigili ee Godeeyo to oso, osoloso yayo to egee odoo mapoo takeliso. 15 Esiga ko abo eli domopoo kukodipume sóso sibileso ne odoo abo egeesi masi doso. Diba Godeeyo to duliso, esino Saiteneeye dimapoo saga boobado pigili goo teneega, Godeeyo to diayo goolee melega boobado pigiliso. 16 Esiga odoo abo ko yukokisi mi mapoo misikediba egeesi masi doso, diba Godeeyo to taka duloso goomoga sabolo teliso. 17 Esino dibada sooloo ma kulodu too meilega, diba beeame deiyepo mapoo doboso, Godeeyo to du maga hegi goo sabolo dala goo sabolo siboga, opulone tei too saga pegeliso. 18 Esiga odoo abo ko we ti bei kookoone poogoo mi omapoo misikediba egeesi masi doso, diba Godeeyo to tekepo duliso. 19 Esino mi toowa hageeyo giebadili goolee sabolo, osoloso bi bei doloso badalai goolee sabolo, osoloso tokenee goo goolee sabolo oso dibada sooloo ma kulodu goo goolee tiadoga, Godeeyo to dibada sooloo ma kulodu pelega dadailoso ko pelega pegeliso. 20 Esino odoo abo ko mi medee tekepo mapoo misikediba egeesi masi doso, diba Godeeyo to duloso tei teliso. Osoloso diba Godeeyo to duloso dibada sooloo ma kulodu Godeeyo to oso ko masi peliso, su aboso ko pa 30 egeesi peliso, abo ko 60 egeesi peliso, osoloso abo ko 100 egeesi peliso.”

Keme maga dio masi taka goo

(Luka 8:16-18)

21 Eseme Yesuye dimapoo dio masi takolone woosaso, “Odoo heeso keme pouloso gadeepugu ee gooloogoolame, tolo ma hemidu o debi ma hemidu mada magalaisomo? Haye, yo keme pouloso dokodoo woola magalaiso, keme gadeepigilame. 22 Bi susuga epedee hamapoo mada egee molo, see hamamee gooleedalame gadeepugu mapoo woola peledabalaiso. 23 No dulu bolo daga, ayo hagee takoo nayo medee dui.”

24 Yesuye dimapoo egeesee takaso, “To niyo du medee goolee. Niba to hagee medee dia gooleedoga, goo abo niyo medee gooleedalaiso. 25 Odoo agayo to tekepo gooleedoga, Godeeye yimapoo goo goolee dia tekepo abo tenalaiso, esino odoo hee agayo to tekepo medee dulega poogooga, goo goolee tekepo yimapoo egee molo see Godeeye talaiso.”

Yesuye kakomee ko masi, o hu witi, oso pala amaga dio masi taka

(Mat 13:31-34, Luka 13:18-19)

26 Yesuye dio masi egeesee takaso, “Godeeye wiligi doloso badeli goo edebeeyo kakomee ko masi, o hu wit, segei egeesi masi moloso. 27 Osoloso yo beeame susuga, gesi susuga tialo hogabuo tialo hogabuo dolone witi ko oso pala yo gooleedele. 28 Witi ko segei eyo mi naga obusomo peliso. Osoloso kawulone daga bou gasibiliso, osoloso du teliso, osoloso hamameedee ko peliso. 29 Witi ko segei poloso telegeega segeli odoo oso dileso gwaliso.”

Homokoko pepoko maga dio masi taka goo

30 Yesuye egeesee takaso, “Godeeye wiligi doloso badeli eyo goo ayo dio hee maga nimapoo takalaiso. 31 Esiga Godeeye wiligi doloso badeli eyo goo edebeeyo homokoko dia pepoko toloso segei egeesi masi moloso. 32 Esino homokoko dia pepoko segei oso kawudoga toowa poloso homolee ee ma kulodu homo su hagoso toowa malaiso. Osoloso homo dee diadee omapoo sóso sibileso hemiye omapoo ou takalaiso.”

33 Yesuye odoo mapoo dio masi maga Godeeyo to takomo siliso, eseme dio masi taka oso dibada goo goolee sabolo tebiaso. 34 Yayo odoo susuga mapoo hedepe dio masi maga takemeliso. Esino Yesu o hamamee dili odoo sabolo disono dopolone dio masi oposusu eyo bei dimapoo takeliso.

Yesuye i sabolo howo ki sabolo hamaga taka

(Mat 8:23-27, Luka 8:22-25)

35 Beeame hedepe oso osoko olo moume, Yesu o hamamee dili odoo dimapoo egeesee takaso, “Iba abei hodiokoo dalo soowomo.” 36 Eseme Yesu odoo abo pogoloso, hedepe o hamamee dili odoo sabolo du maga abei daso. Esino odoo abo du hee mapoo toboloso hamamee daso. 37 Diba olo abei domopoo damolome i toowa simi oso howo ki sabolo sibulone dibada du ma kulodu howo sasooso. Esino diba abei osee damolome howo sasoo oso dibada du howomoo oulame siso. 38 Esino Yesu yo du osio mapoo wolomai wolomaloso tiameleeso. Eseme o hamamee dili odoo diayo yo tidipuguloso yimapoo egeesee takaso, “Eligili odoo, iba howomoo meilame hagee see nayo iba sooloo dolosomo?”

39 Yesu diayo to taka duloso toboloso i sabolo howo ki sabolo omapoo egeesee takaso, “Epedee hamapoo koodobie!” Eseme i sabolo howo ki sabolo o to duloso, saga koodobiaso.

40 Osoloso see Yesuye dimapoo egeesee takaso, “Niba kaseega ka ebiala? Niba amapoo tei too meyo?”

41 Yesu o hamamee dili odoo diba dia obume disono nei woosa nei woosa dolone egeesee takaso, “Hagee odoo ogumo? Yayo i sabolo howo ki sabolo omapoo takeme o to duloso koodobiaso.”

Copyright information for `KKC