Mark 6

Naselet odoo oso Yesu gowe

(Mat 13:53-58, Luka 4:16-30)

Yesu o hamamee dili odoo sabolo mi toowa omaga see o midee Naselet mapoo diso. Osoloso Yu odoowo tei beeame hee mapoo howo gisili moso kulodu yayo odoo susuga eligiso. Osoloso odoo susuga o to duloso howoogaso.

Eseme diba disono nei woosa nei woosa doloso egeesee woosaso, “Yo goo susuga hagee kasee gooleedoowo? Yo goo goolee medee tekepo. Yo goo mudu opusomodi moodeli kitulugu kapoo toowo?
Yo wulo moso tekeli odoo, osoloso Meliyo owolo, osoloso yo Yemes, Yoses, Yudas, osoloso Saimonbolo dibada emei, osoloso oboba ibolo doso,” diso. Osoloso diayo egeesee goolee maga Yesuye eligi dulei goweso.

Eseme Yesuye dimapoo takaso, “Odoo susuga oso Godeeyo to tosili odoo eyo hu poudiliso. Esino o mosobia odoo sabolo osoloso o soosoo sabolo o moso kulodu debeli odoo oso o hu koo poudili.” Esino bei diayo Yesu mapoo gowoolone tei too mauwe pogoloso debei egeme, goo mudu opusomodi toowa yayo moodoole poogooso. Esino odoo paigiga abo o deeso sigime weido diso. Yesu diayo yimapoo tei too mauwe poogoo ogoloso dia hoowaso. Eseme Yesu Naselet mi amaga see pogoloso dileso mi pepoko abo mapoo Godeeyo to eligimo siliso.

Yesuye o hamamee dili odoo 12 diye di

(Mat 10:5-15, Luka 9:1-6)

Yesu o hamamee dili odoo 12 gilimadoloso diso nediliyo puloso bakadio toopoo bakadio toopoo doloso mi opusomo opusomodi mapoo diye diso. Yayo diba diye dolone bo holo pala peegoo hasisilame kitulugu dimapoo teneeso.

Yesuye dimapoo egeesee takaso, “Niba dulone bi abo na te, esino niba wulo susu toloso diadee. Osoloso nei sabolo, o sabolo osoloso molee sabolo toloso na diadee. Esino homo mapoo kali sabolo osoloso dugo niso ka hedepe egee mouloso dulone, dugo kali bi abo na te.” 10 Yesuye dimapoo takaso, “Niyo mi omapoo dileso peledobooga beeame omapoo mosobia oso goomogolone moso teneega, moso hedepe omapoo doboso mi hee mapoo dulone ka poogoo di. 11 Esino mi kamapoo niyo dileso peledaba beeame omapoo mosobia oso goomogolega pogoloso nimapoo moso sabolo tenelega, osoloso nibada to mapoo tei telega poogooga, mi egee pogoloso diadee. Osoloso niyo mi egee pogoloso dulone, dibada howo woola omapoo nibada homo mi mapoo basago taloso peegee. Bei diayo nibada to mapoo tei telega poogooga, Godeeye dimapoo dala tenelai goo ee eligilame,” diso.

12 Eseme Yesu o hamamee dili odoo diayo dileso odoo susuga mapoo Godeeyo to takomo sile sibilone egeesee takaso, “Nibada goo goolee su wuduloso goo tokenee maga waki pie,” diso.

13 Osoloso bo holo odoo ma kulodu paladee diayo peegoo hasiso pugudolone debeiso. Osoloso odoo paigiga sabolo diayo wolo iso dibada wiligi mapoo soome paigiga weido diso.

Yonee Odoo Howo Sauwidili oso ta

14 Mi susuga mapoo odoo susuga oso Yesuwo goo takamo dime wiligi toba Helodeeye duloso gooleedooso. Odoo aboso egeesee takaso, “Yo Yonee Odoo Howo Sauwidili ta maga see hogabia, esiga kitulugu goo toowa hagee yima kuloduga tou ka to,” diso.

15 Odoo aboso egeesee takaso, “Yo Ilaisa.”

Osoloso odoo aboso egeesee takaso, “Yo Godeeyo to tosili odoo daga Godeeyo to medee tekepo tosili egesi masi bado,” diso.

16 Esino Helodee goo hagee duloso, gooleedeme yayo egeesee takaso, “Yonee Odoo Howo Sauwidili, o wiligi kopugume ta odoo, yo see ta maga hogabia doo,” diso.

(Yonee telega badolone, daga goo peledaba hagoso.)
17 Helodeeyo omolo Pilipiyo sobo Helodies see Helodeeye peedeedoloso hume, Yoneeye Helodee mapoo egeesee takaso, “Nayo no molowo sobo see nayo peedeedoloso hulei tekeponee,” diso. Osoloso Helodieseeye kemeneme Helodee mapoo dileso egeesee takaso, “Nayo Yonee neliga ma kulodu magee,” diso. Eseme yayo Yonee neliga ma kulodu magalame o ha teli odoo diye dee takeme, diayo dileso yo neliga mapoo magooso. Esino Helodies Yonee mapoo hegilone, yayo yo wolomalame gooleeso. Esino yayo yo wolomele, bei Helodee Yonee wolomalai ebiaso. Yo gooleedooso Godeeyo howo woola Yonee goo tokenee mauwe, osoloso yo odoo medee tekepo. Esiga yayo Yonee medee bameleeso. Yo Yoneeyo to duloso goo dia tiadiliso, esino o to mapoo dulei goomogolone o sooloo ma kulodu goomogeliso.

21 Esino hamamee Helodies mapoo Yonee wolomalame beeame tekeposo yimapoo simiso. Helodee soomagoo beeame mapoo wo toowa nalame gamalee wiligi tebisa sabolo osoloso o ha teli wiligi odoo tebisa sabolo osoloso Gelili mi toowa ma kulodu wiligi tebisaloso debei odoo sabolo Helodeeye gilimadoloso mooloogoodooso.

22 Diba wo nolone dobome Helodiesyo owolo sobo holoso diayo wo nolone debei moso ma kulodu gasibileso goomoga teneelone habaso. Eseme Helodeeye sobo yimapoo takaso, “Nayo goomoga goo amapoo takee, ayo bi egee namapoo tenelaiya,” diso. 23 Helodeeye badolone tei goo see takaso, “Nayo goomoga goo amapoo takooga, ayo namapoo tenelaiso. Osoloso mi ayo hagee bamolo su sabolo nayo goomogoga, ayo namapoo tenelaiso.”

24 Eseme sobo yayo owee Helodies mapoo dileso, yayo goomoga goo dulame diso.

Eseme sobo owee Helodiesye nei takaso, “Nayo goomoga Yonee Odoo Howo Sauwidili eyo wiligi goomogo dee takee.”

25 Eseme yayo oweeyo to duloso, saga wedi dileso Helodee mapoo egeesee takaso, “A epedee hamapoo Yonee Odoo Howo Sauwidili eyo wiligi koodoloso tolo mapoo magoloso tosiboga ee talai goomogo,” diso. 26 Helodeeye to hagee dume yo dia goo heleso. Esino yo odoo susuga eyo howo woola mapoo eyo tei magoo ee gobabilei ebiaso. Eseme yayo sobo o to mapoo gowoole. 27 Osoloso Helodeeye o ha teli odoo hee neliga moso gibali oso Yoneeyo wiligi kodolame diye diso. Eseme yayo neliga moso tegei mapoo dileso Yoneeyo wiligi koodoloso, odoo susuga oso agalame tolo mapoo magoloso, odoo howo woola tosibileso sobo mapoo teneeso. Eseme sobo yayo toloso owee mapoo teneeso. 29 Yonee o hamamee dili oso goo hagee dume, diayo sibileso o su toloso wulu odoo toga tooseli omapoo kulodu magooso.

Yesuye sobo sabolo, holaiso sabolo, osoloso gisowe 5,000 mapoo nei pi

(Mat 14:13-21, Luka 9:10-17, Yon 6:1-14)

30 Yesuye diye di odoo see wedige sibileso, diayo goo moodoo sabolo diayo goo eligi susuga sabolo Yesu mapoo opusususo. 31 Odoo susuga Yesuye badebei omapoo dile see sibo di oso, Yesu o hamamee dili odoo sabolo nei nalai beeame tekepo egele. Eseme Yesuye o hamamee dili odoo mapoo egeesee takaso, “Iba ibusomo odoo mauwe poogoo mi mapoo dileso hasalame dimo,” diso.

32 Eseme Yesu o hamamee dili odoo sabolo du ma kulodu bulumaloso, abei hodiokoo odoo koola mauwe mi mapoo dalo soowoolame moumeleeno, odoo abei palaga debei oso ogoloso gooleedooso. Eseme odoo susuga oso mi opusomo opusomodi maga Yesuye di mi mapoo malalo mili hoguga diadeeso. Diba malalo dileso balaga meleeno, Yesu o hamamee dili odoo sabolo du maga sibileso gimagooso. 34 Osoloso Yesu du maga mi mapoo pubalogoloso, odoo susuga mooloogoodoloso debei ogoloso, yayo diba dia sooloo dalaso, bei sipi be hu masi bali odoo mauwe pogoloso dobome. Eseme yayo goo susuga dimapoo eligiso.

35 Osoko olo todobume, Yesu o hamamee dili odoo oso yimapoo sibileso egeesee takaso, “Osoko olo todobuo, osoloso mi hagee moso sabolo nei nalai sabolo mauwe. 36 Esiga nayo odoo susuga hagee diye dee takee. Osoloso diba dileso, mi koola mapoo diso moleeso nei toloso nalame,” diso.

37 Esino Yesuye o hamamee dili odoo mapoo nei takaso, “Diayo nei nalai niso toloso tenee,” diso.

Diayo Yesu mapoo takaso, “Iyo nei toloso dimapoo teneega, 200 molee toowaso teli, esino iba molee mauwe.”

38 Eseme Yesuye dimapoo woosaso, “Diba wo kasolo molosomo? Niyo agalame di.”

Eseme diayo dileso egeme, diayo yimapoo takaso, “Wo dee tiadoo osoloso di bakadio moloso,” diso.

39 Eseme Yesuye o hamamee dili odoo mapoo egeesee takaso, “Odoo susuga mapoo, ‘Niba mi mapoo pepoko mooloogoodoloso buluma mooloogoodoloso buluma,’ dee takee,” diso. 40 Eseme dimapoo takeme, diba mooloogoodoo opusomo opusomo doloso mooloogoodoo hee mapoo odoo 100 osoloso mooloogoodoo hee mapoo odoo 50 doloso bulumaso. 41 Eseme Yesuye wo dee tiadoo sabolo di bakadio sabolo toloso, keimi ma dokodoo bolone, Godeeye nei pidilame goomoga goo toodagaso. Osoloso yayo wo popeiloso di sabolo agisaloso o hamamee dili odoo mapoo piso, diayo odoo susuga mapoo pilame. Eseme diayo wo sabolo di hwei sabolo odoo susuga mapoo piso. 42 Eseme odoo susuga nei tebia nega dia edigaso. 43 Osoloso diayo nei naloso abo poogoo, Yesu o hamamee dili odoo oso misigamo di bou tegei 12 metamagisaso. 44 Osoloso sobo sabolo holaiso sabolo nei neso. Esino mooloogoodoo eyo kulodu gisowe hesiga 5,000 oso nei ka ne.

Yesuye howo dokodooga di

(Mat 14:22-33, Yon 6:15-21)

45 Diba nei nalaga koodobuloso, Yesu o hamamee dili odoo malalo du maga Betesaida mi mapoo diye doloso, diba abei damolome, Yesuye odoo susuga dibada mi mapoo diye diso. 46 Osoloso Yesuye odoo susuga diye doloso, yo obusomo Godee mapoo toodagalame mubi dokodoo palaso.

47 Gesi domo o hamamee dili odoo dibada du maga abei domo damolome, Yesu yo obusomo mubi dokodoo badebeiso. 48 Yesu mubi dokodoo badolone egeino, poo sabolo howo ki sabolo simi oso, o hamamee dili odoo dia du mapoo woome, diba kwasu sabolo du sulugamo diadaga molome egeiso. Osoloso gesikolo kudi olo tadageme, yo howo dokodooga diba daga dilame dimeleeso. 49 Esino o hamamee dili odoo diayo Yesu howo dokodooga dimelee egeme, diayo goolee bo belee dolone diba yo ogoloso googaso. 50 Yesu o hamamee dili odoo oso yo ogoloso obugume dimapoo egeesee takaso, “Haga na ebi. Aso.” 51 Osoloso Yesu yo du mapoo dapogome, howo ki sabolo poo sabolo saga koodobiaso. Eseme Yesu o hamamee dili odoo goo hagee ogoloso dia howoogaso. 52 Diba Yesuwo kitulugu gooleedoo diepi, diba howoogele pegiliyo. Esino diba howoogaso, bei dibada sooloo kalawaga.

53 Osoloso diba abei daloso abei hodiokoo Genesalet mi mapoo dibada du oluguso. 54 Diba du oluguloso mubiyodoo dalaga poogoome, odoo omapoo tebisa melee oso yo kibiya hoodo egeiso. 55 Odoo susuga mi opusomo opusomodi mapoo hogugo dileso, odoo paigiga dibada kida mapoo tiedigaloso Yesu mapoo emigado sibadeeso. 56 Yesu mi opusomo opusomodi mapoo silime, edebeeyo odoo paigiga kida mapoo tieduloso, bi teli go mapoo emigado sibileso magooso. Osoloso odoo paigiga oso Yesu o dugo sage ka pee mapoo sigilame howoogaso. Eseme diayo o dugo sigeme wegiga dooso.

Copyright information for `KKC