Matthew 24

Yesuye tei moso tegei guobigilei eyo goo ee taka

(Maka 13:1-2, Luka 21:5-6)

Yesu tei moso poogoo dileso dimolome, o hamamee dili odoo oso yimapoo sibileso egeesee takaso, “Tei moso tekepo tegei hagee ege,” diso. Eseme Yesuye egeesee takaso, “Niba goo susuga hagee medee ege. Ayo nimapoo taka. Moso hamapoo yo hedebeso yo hee ma tobudoo molo agalaime. Esino yo susuga mi mapoo misigedibuloso molo agalaiso,” diso.

Dala goo oso bei mooloogalai beeame

(Maka 13:3-23, Luka 21:7-24)

Osoloso Yesu Olipi mubi ma dokodoo peleso badoboome, o hamamee dili odoo dibusomo sibileso yimapoo egeesee woosaso, “Tei moso guobigilei ogoo beeameso ka guobigileiyo? Osoloso nayo sibilei mologa, malalo ogoo gooso ka peledabalaiyo? Osoloso mi hoo pagalai mologa, daga ogoo gooso imapoo ka eligileiyo? Nayo imapoo takee.”

Eseme Yesuye see dimapoo egeesee takaso, “Niba obeeamo! Odoo heeso tei goodee maga niba peegoo gilimado diyaga. Bei, odoo aboso mo hu maga sibileso takolone dieso nediliyo diba Kelisoso, dee takalaiso. Egeeseelone diayo odoo bei tei goo maga peegoo gilimado dileiso. Esiga ha too goo sabolo osoloso biliga goo oso peledoboomo duga goo ee duloso, niba haga na ebi. Bei, goo hageesi oso daga malalo peledabalaiso. Esino beeame egee hoo poogoo osonee, hamamee sibileiso.

Mi toowa heeso mi toowa hee sabolo ha talaiso. Beeame omapoo mi susuga mapoo nei mauwe pagalaiso. Osoloso mi susuga mapoo mibia toowa sibileiso. Goo hagooso peledobooga, dala beeame oso bei mooloogolone ka seeso.

Egeesee ma kulodu odoo aboso nimapoo dala teneloso niba piligilame odoo abo mapoo tenelaiso. Osoloso niyo amapoo tei too goo omaga odoo susuga oso nimapoo hegia toowa malaiso. 10 Beeame omapoo odoo aboso tei too goo ee pagalaiso. Egeeseelone diayo emegei tei too odoo ee hegilone, diba ha teli odoo mapoo tiasalaiso. 11 Osoloso gamenee godee maga to toloso kokodo takomo sili odoo aboso sibileso odoo abo peegoo gilimado dileiso. 12 Egeesee ma kulodu goo tokenee goo oso diya toowa dolone, edebeeyo emegei sooloo deli goo ee me pagalaiso. 13 Esino odoo agayo o tei too medee kibiloso badolone hoo poogoo mapoo dileso peledobooga, yo badoboso kookaiyo gie badeli talaiso. 14 Esiga mipoo hamapoo to tekepo Godeeye wiligi doloso badeli goo ee odoo susuga oso dulame takomo dileiso. Osoloso to tekepo hagee odoo susuga oso olo dulugaloso doga, mi hoo pagalai beeame omapoo peledabalaiso.

15 Esiga hesigeli odoo, no to hageeyo bei medee gooleede. Bei, Godee maga to toloso kokodo takomo sili odoo Daniyeleeye egeesee takaso, ‘Niba bi diya tokenee mudu opusomo di oso tei moso ma kulodu molo agalaiso. Esiga bi ogoso Godeeyo howo woola tei moso tokenee palaiso,’ diso. 16 Egeeseega Yudiya mi toowa mapoo debeli odoo oso bi mudu opusomo di ee ogoga mubi ma dokodoo kukulo pele. 17 Osoloso beeame omapoo odoo moso hau mapoo badoga, see moso kulodu gadileso o bi na te. 18 Osoloso odoo homolee ma kulodu siloga, o gidei talame mosopoo see na wedi di. 19 Osoloso beeame omapoo sobo koowasi sabolo, osoloso holope too nedili sobo ee kukulo dilei diya kalawa toowa molo agalaiso. 20 Esiga Godee mapoo takee, niyo kukulo dilei beeame ee wau beeame o, iyo hasali beeame omapoo peledebelega pagalame. 21 Bei, beeame omapoo dala toowa oso sibileiso. Esiga mi bei mooloogoo beeame abaga simino epedee hamapoo, odoo susuga oso dala goo hageesi egele. Esino dala goo toowa hagooso sibileso koodobuoga, hamamee dala goo hageesi see agalaime. 22 Esino dala beeame hagee see Godeeye deiyepo moodoolaiso. Bei, yayo beeame sage magoo diepi, odoo heeso dala ee ma kulodu badalai tebile pegeliyo. Esino dala ee ma kulodu Godee eyo hesiga odoo ee halo, yayo beeame see deiyepo moodoolaiso.

23 Beeame omapoo odoo heeso sibileso nimapoo takolone, ‘Hamapoo ege, Keliso hagooso’ o, ‘Koo ege, Keliso ogoso,’ dee takooga, o to mapoo tei na te. 24 Bei, gamenee keliso deli sabolo, osoloso gamenee godee maga to toloso kokodo takomo sili odoo oso sibileso goo toowa opusomo di edebeeyo howeli moodoolaiso, odoo susuga sabolo osoloso odoo Godeeye hesiga oso peegoo dia beleso kukulo agalame. 25 Esiga niba medee dui. Goo hagee peledebelega mologa, ayo daga nimapoo ka taka.

26 Esiga odoo heeso nimapoo takolone, ‘Niba ege. Keliso dobudu badoso,’ dee takooga, yo agalame na di. Osoloso see yayo takolone, ‘Niba ege. Keliso moso kulodu badoso,’ dee takooga, omapoo tei na te. 27 Bei, kei ebiedigaga mi toowa egee gadeebugu egesi masi ogoga, niyo Odoo Holo a sibo agalaiso. 28 Osoloso mi hee mapoo hune mologa, kukodeeso hune egee nalame omapoo busiliso.”

Odoo Holo oso sibilei

(Maka 13:24-37, Luka 21:25-36, 17:26-36)

29 “Osoloso hamamee haga boloogelega dala beeame hagooso dileso koodobuoga,

‘osoko semelaiso.
Egeeseega anosee gadeebigileime.
Osoloso giwo kei ma dokodoo egee molo mi hamapoo tigedibileiso.
Osoloso kei ma dokodoo kitulugu bi egee molo Godeeye halabuga ki me pagalaiso.’
30 Osoloso beeame omapoo Odoo Holo ayo sibilei eyo goo ee kei ma dokodooga eligiga, odoo susuga oso agalaiso. Eseega odoo susuga oso goohele sabolo pupusigileiso. Egeesee ma kulodu odoo susuga oso Odoo Holo ayo kolobo maga gadeebugu sabolo osoloso kitulugu toowa sabolo siboga agalaiso. 31 Osoloso kibu neligidi iga, ayo mo momaiye diye dalaiso, diayo dileso odoo susuga Godeeye hesiga mi susuga mapoo egee do ee gilimalame.

32 Osoloso niba sogai maga goo hagee medee gooleede. Sogai du pisigaga ogoloso wau beeame koola tooboo doloso gooleedeliso. 33 Esiga goo hagee egesi masi moloso. Goo ayo taka hagooso peledaba ogoga, Odoo Holo ayo sibilei olo koola tooboo doloso niba olo gooleedalaiso. 34 Ayo nimapoo taka. Odoo epedee hamapoo egee do diba osee doga goo susuga hagooso peledaba ee diba agalaiso. 35 Esiga kei sabolo mipoo sabolo mauwe pagalaiso. Esino mo to me pagalaime.

36 Esiga Odoo Holo ayo sibilei beeame ee odoo hee gooleedele. Osoloso Godeeyo momaiye Kei mi ma dokodoo egee do sabolo osoloso Godeeyo owolo anosee gooleedele. Esino hedebe mo Ma Godeeye beeame egee gooleedoloso ka badoso. 37 Esiga Nowaye badebei beeame omapoo goo peledaba goo hedebe egesi masi oso Odoo Holo ayo sibilei beeame mapoo peledabalaiso. 38 Bei, Nowaye badebei beeame omapoo, howo duwelega molome odoo susuga oso nei sabolo howo sabolo nolone dobolone sobo hulone debeiso. Diba egeeseelone doboome, beeame heeso Nowa du toowa ma kulodu gadiso. 39 Nowa du toowa ma kulodu gadime, odoo susuga oso goo peledabalai ee kibiya gooleedelega doboome, howo toowa duwa oso diba howoso neso. Esiga Odoo Holo ayo sibilei beeame omapoo goo hedebe hageesi oso peledabalaiso. 40 Esino beeame omapoo odoo bakadio homolee ma kulodu tou tomo silesiboga, odoo heeno ido polone hee omapoo pagalaiso. 41 Osoloso sobo bakadio wo galaga mologa, sobo heeno ido polone hee omapoo pagalaiso.

42 Esiga niba mopoodoo doloso koolone ka debee. Bei, nibada Lodee ayo sibilei beeame ee niba gooleedele. 43 Esino niba goo hagee medee gooleede. Edebeeyo mesiyaso o moso mapoo sibilei beeame ee duga, yo mopoodoo doloso badolone medee bamalaiso. Osoloso mesiya olo siboga ogoloso yo habigileiso. 44 Esiga niba nosee medee mopoodoo doloso ka debee. Bei, Odoo Holo ayo sibilei beeame ee niba gooleedele.”

Tou tekepo teli odoo sabolo osoloso tou tokenee teli odoo

(Luka 12:41-48)

45 “Goo mapoo mesiloso silone tou tekepo teli odoo ee ogumo? Wiligi odoo oso odoo egesi mapoo kitulugu tenelaiso, yayo o tou teli odoo susuga medee bolone yayo dimapoo nei nali pilame. 46 Bei, wiligi odoo yo peegoo dileso badoboso see sibileso ogoga, o tou teli odoo oso o tou medee tekepo too daga, yimapoo diya goomogalaiso. 47 Esiga ayo nimapoo taka. Wiligi odoo oso o tou teli odoo oso tou medee tekepo too ogoloso, see yimapoo bi susuga ee yayo bamelee dalaiso.

48 Esino tou tokenee teli odoo oso o wiligi odoo saga koo siboga eyo nediliyo egeesee takalai malaiso, ‘Mo wiligi odoo saga koo sibo,’ doloso tou teli odoo abo wooloogolone, yugune nali odoo gilimadoloso nei sabolo howo sabolo nolone dabalaiso. 50 Yo egeeseemo silone mopoodoo delega badoga, o wiligi odoo omapoo sibileiso. 51 Osoloso o wiligi odoo oso sibileso yo diya wooloso peegoo habigileiso, goo bakadio gweli odoo sabolo dabalame. Osoloso diayo omapoo dobolone pisa sabolo osoloso mei gisile sabolo dabalaiso.”

Copyright information for `KKC