a9.4Exo 4.22; Deu 7.6; Hos 11.1
b9.7Gen 21.12
e9.11–12Gen 25.23
f9.13Mal 1.2–3
g9.15Exo 33.19
h9.17Exo 9.16
i9.20Isa 29.16, 45.9
j9.21Jer 18.6
k9.25Hos 2.23
l9.26Hos 1.10
m9.28Isa 10.22–23
n9.29Isa 1.9; Gen 19.23–28

Romans 9

Nǝvanuan aGot tolekis hǝn galito

Nokitin. Len aKristo nukel nakitinan, nǝsaliboŋ. Nǝlogw, aNunun aGot totoh lan, mai aNunun aGot, arukel koti ke nukad nalolosaan totibau len nǝlogw. Nolǝŋon isa masuṽ be sasib. Nǝlogw itaŋis nǝbathudud sagw, naJu lotomǝtahun aKristo. Nohǝhaṽur hǝn aKristo tasemale hǝn ginau hǝn asike nǝtavi esan am, m̃os nǝbathudud sagw gail, hǝn lǝtariŋ nǝlolit len aKristo. Nǝbathudud sagw gail lovi alat seIsrael. AGot ipat kuv galito hǝn lǝb̃evi anatun san gail ale evisi hǝn galito len namǝnas hǝn nǝyalyalan san. Ikel na-kel-gati-an mai galito ale ita gat gail len nahǝsan. Ilav nalo mai galito. Idam̃ hǝn lotolotu hǝni. Ale lopul hǝn na-kel-gati-an san gail. a  Lovi nǝpasusan siApraham, seIsak mai siJakop. Ale aYesu evisi len nǝpasusan enan len nǝmauran san len navile a pan. Gai evi Got, nǝdaŋan san tosǝhor natit p̃isi, nǝ-sal-suhi-an tivan hǝni vi sutuai! Ganan!

Sadatike, “Na-kel-gati-an siGot iteh, gai sagol nǝsa tokel mai alat a Israel.” Sadatekǝmaienan! Husur len nǝpasusan seIsrael p̃isi, isob̃ur lǝsavi alat a Israel kitin. Lǝsavi vanuan siGot. Naut kǝmas lotovi len nǝpasusan siApraham, lǝsavi anatun kitin gail. Husur aGot ikel mai aApraham ke, “Len aIsak dereh gikad nǝpasusan notokel gati mai gaiug.” b  Namilen ke, nǝpasusan lotovisi len niben aApraham lǝsavi anatun aGot, be len nabunusian siGot, nǝpasusan lotovisi husur na-kel-gati-an san ŋai, galit lovi anatun aApraham kitin. c  Husur aGot ikel gati maiegai ke, “Len nǝboŋ han, dereh netǝlmam, ale aSarah tikad anatun ulum̃an.”
9.9Gen 18.10, 14. Len nalob̃ulat Natub̃atan, nǝboŋ aGot tokele, ikel ke tetǝlmam len nǝboŋ enan len nasihau togǝmai.


10 Savi natenan ŋai. Anatun aRepekah gǝlaru artovi mǝlav arukad atǝmalaru esua ŋai, tovi aIsak, atǝmanamit ta sutuai. 11 Be nǝboŋ namǝlav arsavisi sal, arsagol natideh tovoi o tosa, aGot ikel mai aRepekah ke, “Ahai a m̃o dereh tevi vanuan nauman sihai a tahw.” AGot ekǝmaienan hǝn b̃imasil ke nǝboŋ tolekis hǝn nǝvanuan, salekis hǝni bathut nǝsa tovoi o tosa togole. Ilekis hǝn nǝvanuan husur nǝnauan san ŋai m̃os nǝsa tolǝŋoni. e  13 Hum natosian siGot toke,

“Nolǝmas bun aJakop
be nomǝtahun aEsau.” f 
14 Datekǝmabe beti? AGot sanor a? Aoa, sadatekǝmaienan! 15 Husur aGot ikel mai aMoses ke,

“Dereh nilolosa hǝn avan ideh nǝb̃ilolosa hǝni.
Dereh ginau nǝlogw titaŋis avan ideh nǝlogw b̃itaŋisi.” g 
16 Imagenan, aGot ilekis hǝn nǝvanuan, savi husur lotolǝŋoni, savi husur lotoum todaŋ m̃osi, ipat len nalolosaan siGot. 17 Husur len natosian siGot ikel mai aFero ke, “Nutabtabuh len gaiug hǝn gǝb̃evi kiŋ hǝn nǝdaŋan sagw b̃ip̃arp̃ar, naut kǝmas nǝkadum̃ tohaihai, hǝn nǝvanuan lǝb̃ikel ur nahǝsagw len navile a pan kavkav.” h  18 Imaienan aGot ilolosa hǝn avan ideh aGot tolǝŋon b̃ilolosa hǝni. Ale nǝkadun avan ideh aGot tolǝŋon b̃ihaihai, aGot igol ihaihai.

19 Hum ma gǝb̃eus ginau ke, “AGot b̃igol nǝkadun nǝvanuan b̃ihaihai, limasmagenan. Ŋa imabe aGot toke lugol nǝsaan?” 20 Be gaiug ase? Savi hǝn gaiug hǝn gǝb̃isor tas aGot! Nau nategai. Nab̃ilikoro saus nǝvanuan toum hǝni hǝn nǝtan b̃ulau ke, “Imab gotoum hǝn ginau hǝn nǝb̃imagegai?” i  21 Nǝvanuan toum hǝn nab̃ilikoro len nǝtan b̃ulau, nǝboŋ tolav nakobhutan b̃ulau sua, elǝboi b̃eum hǝn nab̃ilikoro sua hǝni topǝhas mai nab̃iliwai sual am hǝn b̃eriŋ nǝpahsago lan. Ipat len gai. j 

22 Ale aGot elǝboi b̃igol b̃imaienan hǝn nǝvanuan. Naut kǝmas inor hǝn aGot b̃igol nǝlol paŋpaŋ mai nǝdaŋan san b̃ip̃arp̃ar, len nǝ-daŋ-b̃uri-an itoh mǝdau mai galit lotogol nǝlon topaŋpaŋ, alat gai toutaut hǝn galit m̃os lǝb̃imasig, nǝpanismen ipat vir galito. 23 Igol tomaienan hǝn natibauan hǝn nǝyalyalan san b̃ip̃arp̃ar hǝn alat gai tololosa hǝn galito, alat gai toutaut hǝn galit tia m̃os lǝb̃ib̃on maii len nǝyalyalan san. 24 Ale alatenan gai tolekis hǝn galito, gidato datovi galit galevis. Ilekis hǝn gidato dan naJu gail mai alat lǝsavi Ju. 25 Ekǝmaiegai len natosian siHosea, ike,

“Alat lǝsavi vanuan sagw
dereh nekis galit hǝn nǝvanuan sagw gail.
Ale alat lǝsalǝboi na-lǝmas-buni-an sagw,
dereh nekis galit hǝn nǝvanuan notolǝmas bun galito.” k 
26 “Ale len naut aGot tokel mai galit ke,
‘Mǝtsavi nǝvanuan sagw,’
len naut enan nǝvanuan dereh lekis galit hǝn
‘anatun aGot gail, aGot tovi nǝkadun nǝmauran.’” l 
27 Avil aIsaiah ikai m̃os alat a Israel ke,

“Naut kǝmas alat a Israel lusob̃ur
hum nabion bitas,
evis ŋai dereh likad nǝ-lav-kuvi-an dan nǝpanismen.
28 Bathut, husur nǝ-sab̃-sǝhoti-an san len nakotan,
Nasub̃ aGot dereh tetutut hǝn b̃ipansem p̃is alat navile a pan.” m 
29 Ehum aIsaiah tokele a m̃o tia ke,
“AMasta hǝn navǝshǝsoltia hǝn nǝmav
asike tariŋ nǝpasusan sidat galevis tasuh,
dattasum̃an naut a Sotom,
dattasum̃an naut a Kom̃orrah
artomasig p̃isi.” n 

Israel ipar dǝlomian

30 Beti datekǝmabe? Nekǝmaiegai ke, alat lǝsavi Ju lǝsaum sǝdaŋ hǝn lǝb̃ikad nanoran, navoivoian mai aGot, be len nadǝlomian lukade. 31 Avil alat a Israel lotoum todaŋ hǝn lǝb̃igol husur nalo hǝn lǝb̃inor, lǝb̃ikad navoivoian mai aGot, lodǝdasi. 32 Lodǝdasi husur nǝsa? Husur lǝsariŋ nǝlolit len aGot, loriŋ gat nǝlolito len nǝsa lotogole. Lupes hab̃etw len “nǝvat hǝn na-pes-hab̃etw-an.” 33 Hum natosian siGot toke,

“Mǝteris! Len naut a Sion noriŋ nǝvat
togol nǝvanuan lotopes hab̃etw,
nab̃iltivat enan togol nǝvanuan lototeh,
ale alat lotoriŋ nǝlon lan
asike lolǝŋon isa sil lotoriŋ nǝlolit lan.”
9.33Isa 8.14, 28.16. Len naut egai, nǝvat Isaiah tokel uri evi aKristo.

Copyright information for KLV