1 Corinthians 1

Jambuŋdâŋ

Anuture micte Jesu Kristore aposolo epo Paulo no hâcne â âgo-nâŋec Sostene nâhe Korinti haeonec Anuture kikefuŋ ŋoŋere papia ši râekoperec. Ŋoŋe Jesu Kristozi jambuŋ-ŋoparâ tirimoc juniŋte hefârec-ŋopawec. Iŋuc eŋareme ine hae sâc opâ ruac šira â gâcnao Wofuŋ Jesu Kristo šâŋe-ticne riwaseckehuc jueŋgopieŋ jaŋehec mocjaha embiŋ. Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.

Korinti ŋic Jaŋerao miti fârine fua-hâmowec

Anutu e Jesu Kristore erâ aki anonoc sesic-ŋopawecte no ŋoŋere manasuhuc daŋge berec jaha âzâcneekopac. E miti mumure aafec â mamana fuŋne fuŋne aameo tahac-ŋopawec. I Kristore mumutaniŋ dâŋzi ŋondeŋ-ŋeŋicko gâtâ bawecte iŋuc fuawec. Eme mitire wiac moc mi basaeŋgopieŋ. Mâc Wofuŋ-nâŋec Jesu Kristo fua taniŋkeocte woŋec mocjaha jueŋgopeneŋ. Eki hâcne Wofuŋ-nâŋec Jesu Kristore fifisi dameŋko kiŋfâsâc domaniŋte hefârec-ŋopame juhapie dameŋ-ŋeŋic taraocmu. Anutu e Ŋokâ-ticne Jesu Kristo, Wofuŋ-nâŋec hâcne, erao šuhuckeniŋte hefârec-ŋopaweczi mocmu mocmu-ticne mi fokac.

Korinti ŋic jaŋerao mitire fâfâuc fuawec

10 Âgofâc-nane, no Wofuŋ-nâŋec Jesu Kristo šâŋe-ticnere erâ uŋdâŋ ši mupe mananiŋ: Ŋoŋe dâŋ fuŋne fuŋne â fâfâuc mi bâfuanšepieŋ, aricne. Maŋ mamanasu-ŋeŋic bâturepie mocjaha eha junšepieŋ. 11 Âgo bureŋ, no ŋondeŋ-ŋeŋicko dâŋ fuawec fokac i Koloe ere wiacfâc mupie manapo. 12 Dâŋ kecšiŋucte mukopac: Ŋoŋeraonec moczi muekac `no Paulore ŋic', â moczi muekac “no Apolore ŋic”, â moczi muekac “no Kefare ŋic”, â moczi muekac “no Kristore ŋic.” 13 Hâc, i weniŋuc, Kristozi fâuckewec me? Me Paulo noni ŋoŋere erâ, maripoŋko hâmopo? Me Paulo nore šâŋezi hucŋopaha Miti Opâ ruambiŋ? 14 Sowine no nahac Miti Opâ mi rua-ŋarepo, Krisipo â Gaio jahe sawa rua-jactepo. 15 Ŋoŋe šiŋuc munšipiŋte: “Ere šâŋezi hucnâpoha Miti Opâ ruambeŋ.” 16 Mâcne, ši moc manasukopac, Stefana ere wiacfâc jaŋe wâc rua-jarepo, gâcne jaŋere ine mi manakopac. 17 Kristozi ŋic Miti Opâ rua-jarepemurâ mâcne, Biŋebiaŋ jaza qazuc epemurâ munarewec. Erâ Kristo maripoŋ-ticnere dâŋ tâpirimâc ezacte maŋɋârâŋ dâŋ ericke bâpiaŋ ehuc mi muekopac.

Miti tâmiriczi Jesu dâŋticnere manapie racne eekac

18 Maripoŋte dâŋ i sisipiric hata âteeŋgopieŋzi manapie racne eekac, â bâbâpiaŋ hatao jueŋgopeneŋzi ine manapene Anuturaonec tâpirihec eekac. 19 Dâŋqâreŋ moc šiŋuc hâcne fokac:

“No maŋɋârâŋhec jaŋere dâŋ qape wahaocmu
â mamana-jeŋichec jaŋere mamana batackepemu.”
20 Eme maŋɋârâŋhec jaŋe weni? Á mana gufu koparic ŋic jaŋe weni? Á dameŋ širec fuŋne mamana jaŋe weni? Anutu e maŋ mamana-jeŋic bahameŋkewec hâcne. 21 Eme Anuture maŋɋârâŋ dâŋbiri fua-bipieha ŋic jaŋe jaŋacne mamanazi Anuture fuŋne šâŋitaniŋte emâmâŋkembiŋ, irec Anutuzi maname sâckeme mitidâŋ mutucne i manarâ biaŋkenaŋte muwec. 22 Judaŋic jaŋe fuŋne qaqa mâsire qizec qaeŋgopieŋ â Grikŋic jaŋe maŋɋârâŋhec eniŋte fotarieeŋqopieŋ, 23 nâŋe ine Kristo maripoŋko qakicne irec dâŋ mupene Judaŋic jaŋe manapie quŋke sâqoreekac â qâpuc jaŋe manapie dâŋ mutucne eekac, 24 ehame hefârec-jopakicne, Judaŋic mecne Grikŋic mecne, jaŋe ine Kristore manapie Anutu tâpiri-ticnere â maŋɋârâŋ-ticnere hozine eekac. 25 Ŋic jaŋe Anuture mutucne muhapie mutuc-ticnezi ŋic jaŋere mamana jâuruekac â Anuture dodocne muhapie dodocne-ticnezi ŋic jaŋere tâpiri sirickeekac.

Fekicne afecne, omane bocjaha hefârec-jopakicne

26 Âgofâc-nane. ŋic weniŋucne hefârec-ŋopakicne i mana honeniŋ: Sahackopec wiacte maŋɋârâŋhec bocjaha mâcne, tâpirihec bocjaha mâcne, ŋicbomboŋ guruonec bocjaha mâcne. 27 Ŋic maio mutucne jueŋgopieŋ jaŋe Anutuzi hefârec-jopahuc maŋɋârâŋhec mimi qaqa ejareekac, â ŋic maio gegec dodocne jueŋgopieŋ jaŋe Anutuzi hefârec-jopahuc tâpirihec mimi qaqa ejareekac, 28 â ŋic maio omane â hujukicne jueŋgopieŋ jaŋe Anutuzi hefârec-jopaekac, â ŋic maio bebekâne jueŋgopieŋ jaŋe Anutuzi hefârec-jopahuc šai šonšoŋ-jeŋichec jaŋe siŋ qatara-jareekac. 29 Mâreŋŋic moczi Anuture maio sahac-ticne bafezacte iŋuc hâcne ewec. 30 E mitio juju-ŋeŋicte bâbâfua i Kristo Jesu râe-nârewec. Kristo e hâcne Anutuzi maŋɋârâŋ dâŋte rowaŋ-nâŋec â kiŋroro-nâŋec â maŋɋaɋac bâbâfua-nâŋec â kikitâc-nâŋec râe-nârewec. 31 Irec dâŋqâreŋ šiŋuc fokac i sanaŋkezejec: “Moc e mumuteŋ dâŋ muzo murâ Wofuŋtao muzejec.”

Copyright information for `KMG