1 Corinthians 10

Mârozi Israe ŋic mâreŋ sawao mâsi bajareha jumbiŋ

Âgofâc-nane, no mimiŋnefâc-nâŋec wiac embiŋ irec manasu-ŋarepe mananiŋ Jaŋe mâmâc sasawa karoraczi sâoc-jopaha rahuc hâwec fotâcnembiŋ. Ehuc Mosere ŋicfâc eniŋte karorac â hâweczi miti opâ-jeŋic eme ruambiŋ. Erâ Mârozi nânâ bâfua-jarewec i jaŋe mâmâc sasawa nârambiŋ, â Mârozi opâ bâfua-jarewec i wâc mâmâc sasawa nârambiŋ. Mârore qânâzi bâjâpec-jopawec, eraonec hâcne opâ wahame nâmbiŋ, qânâ šâŋene Kristo.

Israe ŋic jaŋerao wiac tuawec i uŋsawaŋ-nâŋec ekac

Eme sifu Anutuzi gâcne sâko mana sâqore-jareme mâreŋ sawao hâmo sipiric efârembiŋ. Jaŋerao wiac fuawec i uŋsawaŋ-nâŋec ekac, jaŋe sâqocnere andac embiŋ iŋuc jaha enšipeŋte. Jaŋeraonec gâcnezi nemu qaŋgec wiacte kiŋaŋ qaqa embiŋ, iŋuc wâc mi enšepeneŋ. Dâŋqâreŋ šiŋuc hâcne fokac: “Ŋic jaŋe waha ŋehuc tiwâ šepec nâku faharerâ gae wohuc domambiŋ. Erâ sasec boe sau wâc mi enšepeneŋ. Jaŋeraonec gâcnezi sasec boe sau embiŋ, ehuc šoaŋ gie bapa ijaha ŋic 23 tauseŋ hâmombiŋ. Erâ Wofuŋ maŋbâiŋ wâc mi ecnenšepeneŋ. Jaŋeraonec gâcnezi maŋbâiŋ ecnepie homazi kicjopame hâmo sipiric embiŋ. 10 Erâ kâroŋ wâc mi qanšepeneŋ. Jaŋeraonec gâcnezi kâroŋ qapie sisipiric runezi sipiric-jopawec. 11 Jaŋerao wiac fuawec izi ma âkendâŋnekicne ekac. Eme mâreŋte dameŋ qândâŋkeha juŋgopeneŋ nâŋâcnere uŋsawaŋ muhuc dâŋbinaŋ i hâcne qâreŋkekicne. 12 Irec hâcne moc e jahacnere maname sasanaŋ eekaczi dockezacte rumehuc juzejec. 13 Ŋoŋerao eesâic fua warewec i ŋic tâpiri-ŋeŋicte sâcko fuawec. Erâ Anutu e mume sasanaŋzi eesâic baafeckeme tâpiri-ŋeŋicte sâc mi jâuruocmu. Erâ eesâic fuaocmu sâc âte sâoc-ŋopame sâcne sanaŋkeniŋmu.

Wofuŋte nânâ nâhuc demoŋte mâmâc nâzo i mi eene

14 Irec hâcne, âgofâc-nane, ŋoŋe nemu qaŋgec wiacte geŋkerâ junšepieŋ. 15 Ŋoŋe maŋ mamanasuhec juŋgopieŋ, irec dâŋ ši mupe ŋaŋac mana honeniŋ. 16 Râqâcko waiŋ jambuŋkewecte jambuŋkerâ nâhuc Kristore sochec šušuhuc mi eeŋgopeneŋ me? Á poroŋ nâhuc Kristore sahachec šušuhuc mi eeŋgopeneŋ me? 17 Nânâzi mocjaha, i gugumec ehuc ŋic bocjahazi âgo guru mocjaha eeŋgopeneŋ. 18 Ŋoŋe sahackopec Israe ŋic juŋgopieŋ jaŋere manasuniŋ. Ŋic taha bâzi nâeŋgopieŋ jaŋe alatahec šušuhuc mi eeŋgopieŋ me? 19 Dâŋ i weniŋucte mukopac? Nemure tiwâ šepec i wiac fârine me? Á nemu e jahacne wâc fârine me? 20 Iŋuc aricne. Qâpuc jaŋe tiwâ šepec rikeeŋgopieŋ i Anuture biŋe mâcne, i demoŋ jaŋere biŋe eekac. Eme no ŋoŋere šiŋuc mukopac: Ŋoŋe demoŋ jaŋehec šušuhuc mi enšepieŋ. 21 Wofuŋte râqâckonec nâhuc demoŋ jaŋere râqâckonec mâmâc nânâ i sâcne mi eniŋmu. Á Wofuŋte teboonec nâhuc demoŋ jaŋere teboonec mâmâc nânâ i wâc sâcne mi eniŋmu. 22 Me nâŋâc Wofuŋ maŋbâiŋ ecnenaŋ me? Nâŋâcne tâpirizi ere sirickekac me?

Moc e jahacnere sawa manasuhuc jume mi sâckeocmu

23 Wiac sasawa eene fokac, erâ wiac sasawa epene izi sâcne mi bafic-nâpoocmu. Wiac sasawa eene fokac, erâ wiac sasawa ehuc mitio dodopec eene ine mi fokac. 24 Moc e jahacnere mi manasuhuc, âgo-ticnere manasuzejec. 25 Ŋoŋe buŋko bec qowi furine bazo murâ kosa banšepieŋ, ehuc keci omane me nemure ufuŋkonec, iŋuc muhuc mu manabâc mi enšepieŋ. 26 Mâreŋ â wiac sasawa mâreŋ fusucmarâ fokac i Wofuŋzi rune Jukac. 27 Qâpuc moczi hezu hewâneŋ eŋareme ficticnao fezo murâ fenšepieŋ, erâ nânâ qowi gumec-ŋopame manabâc tâmiric kosa nâhuc mu wioc mi enšepieŋ. 28 Á nahapie ŋic moczi šiŋuc moc ŋazaocmu: “Bec ši nemu ufuŋkonec”, eme mi nânšepieŋ. I mufua-ŋareocmu ŋic ere manabâc ehuc qikiŋnenšepieŋ. 29 I nâpie ŋaŋacne maŋ sâqorezacte mâcne, âgo-ŋeŋicte maŋ sâqorezacte mukopac. No nahacne maŋ manabâc tâmiric fome wemocte moczi e jahacne maŋte sâc norao âke hotaocmu? 30 No Anutu daŋge âzâcnehuc nunumu faio nâpe moczi wemocte mana sâqore-nareocmu?

Bahacmâc juzo

31 Irec ŋoŋe nânâ qowi nâniŋte, me i me i eniŋte Anutu mumbiaŋkehuc enšepieŋ. 32 Ŋoŋe Judaŋic â Grikŋic â Anuture kikefuŋ jaŋere maio bahacmâc jupie moc mi mana sâqore-ŋarenšepieŋ. 33 No iŋuc jaha ŋic fuŋne fuŋne jaŋe honecnupie sâckeocte juhuc no nahacne wiac biaŋkeocte mâcne, ŋic bocjaha miti manarâ biaŋkeniŋte giene baekopac.

Copyright information for `KMG