1 Corinthians 12

Mârozi gie baekac

Âgo bureŋ, Mâroraonec miti kadahe irec fuŋne kâuc banšipiŋte ŋazape mananiŋ. Ŋoŋe mârâc jaha qâpuc juhapie maŋšoc fua-ŋarewec sâc nemuɋâŋ kâpâne jaŋerao ra qohota jumbieŋ. Eme irec ŋifecne mupe mananiŋ: Moc e Anuture Mârozi bufahac qacnehame wemocko muocmu “Jesu go sâwecgukopac”, â moc e Tiri Mârozi bufahac mi qacnehame wemocko muocmu “Jesu e Wofuŋ”.

Mitire kadahe fuŋne fuŋne fokac, Mâro ine mocjaha, mitire kiŋaŋ gie fuŋne fuŋne fokac, gie rune ine Wofuŋ mocjaha, mitire tâpiri fuŋne fuŋne fokac, tâpiri rune ine Anutu mocjaha. Eki hâcne bâfua-nâre-fâreekac. Mâro e mitio juhâmonaŋte ŋic ru sâc tâpiri-ticne kâdoc qanâreekac. Moc e Mârozi ecneme miti maŋɋârâŋhec muocmu, moc e Mâro izia ecneme sâc mitire fuŋne hukicne muocmu, moc e Mâro izia ecneme mamanasiŋ sâkohec juocmu, moc e Mâro izia ecneme ŋic huc šâichec ɋiɋicne bacjopaocmu, 10 erâ moc mâsi baocte tâpiri bâfuacneocmu, moc findaŋdâŋ muocte maŋne bâuŋtoocmu, moc e mâro fuŋne fuŋne šâŋitaocte maŋne batamaeocmu, moc e miti marac furuo muocte micne baafeckeocmu, moc e miti marac furu manarâ ŋic dâjeŋicko bâtikieocte bafickeocmu. 11 Wiac i sasawa Mâro izia bafâreekac, ehuc maŋticnere ŋic ru sâc wiac bârâwiŋne-nâreekac.

Sahac-nâŋeczi mocjaha â kiŋaŋ qaqafâcne ine bocjaha

12 Ŋic nâŋâc sahac-nâŋeczi mocjaha â sahacte kiŋaŋ qaqafâc ine bocjaha, eme jaŋe bocjahazi qâturepie sahac mocjaha ekac” eme Kristorao sâc ijaha fokac. 13 Mâro mocjahazi nâŋâc Miti Opâo bâturec-nâpome sahac-nâŋecte sâc erâ mocjaha embeŋ. Judaŋic â Grikŋic, kiŋaŋ qaqa â ŋicbomboŋ, nâŋâc Mâro i jaha sasawa ro maŋ efârekicnere mocjaha embeŋ. 14 Eme sahacte kiŋaŋ qaqa iŋuc jaha mocjaha mâcne, bocjaha. 15 Eme kike e wemocko šiŋuc muzac: `No me aricne, irec  sahacte tofa mi ekopac”, iŋuc murâ wemocko sahac beherâ buc juocmu? 16 Me hazeczi wemocko šiŋuc muzac: “No šâŋe aricne, irec sahacte tofa mi ekopac”, iŋuc murâ wemocko sahac beherâ buc juocmu? 17 Sahacko šâŋe sasawa fome muzac sahaczi hazec basazac. Me hazec sasawa fome muzac sâke basazac. 18 Anutu e ine mana tarahuc sahacte kiŋaŋ qaqa gie fuŋne fuŋne mujarewec. 19 Sahacte kiŋaŋ qaqa fuŋne-jeŋic mocjaha efâreme muzac sahac e sâqorerâ arictac ezac. 20 Ʒi ine kiŋaŋ qaqazi bocjaha â sahaczi mocjaha. 21 Eme šâŋezi wemocko me âzâcneocmu, “No go tâmiric sâcne jupemu.” Me qizeczi wemocko kike jasaocmu, “No ŋohe tâmiric sâcne jupemu.” 22 Aricne, sahac-nâŋecte tofafâc dodocne jaŋe tâmiric hâcne sâcne mi juzo. 23 Á sahac-nâŋecte tofafâc wawahane jaŋe hâcne hone jauŋ ejareeŋgopeneŋ, â miminehec jaŋe foŋjopapene biaŋne hawari eeŋgopieŋ. 24 Hawari biaŋ jaŋe ine tâtâc foeŋgopieŋ. Anutu e sahac bâfuahuc tofafâcne gâcne wahakicne jaŋe gie fekicne mujarewec. 25 I sahac-nâŋecte tofafâc fâfâuc mi ehuc kiŋaŋ qaqac sâckoa eniŋte iŋuc hâcne ewec. 26 Irec tofane moczi šâic maname gâcne jaŋe mâmâc mana-fâreniŋmu, me moczi šeri eme gâcne mâmâc šeri efâreniŋmu.

Mitire gie bapa ŋic fuŋne fuŋne juŋgopeneŋ

27 Ŋoŋe mâmâc sâko qâturerâ Kristore sahac eŋgopieŋ â buc buc sahac-ticnere kiŋaŋ qaqafâc eŋgopieŋ. 28 Anutu e kikefuŋfâc-ticne nâŋâcnao ŋic šiŋuc râec-jopawec: Qanaŋ aposolo, izi porofete, izi qaqazu, erâ ŋic mâsi bapare tâpirihec â ŋic huc šâic bâbâpiaŋ irec tâpirihec, erâ jauŋ bapa, erâ soŋaŋ, erâ dâŋ marac furuo mumu, iŋuc hâcne râec-jopawec. 29 Nâŋâc aposolo sasawa râec-nâpowec me? Me porofete me qaqazu sasawa râec-nâpowec me? Me mâsi bapare tâpiri 30 me huc šâic bâbâpiaŋ irec tâpiri fonâre-fârekac me? Me dâŋ marac furuo mumu me ŋic dâŋjeŋicko bac bâtikic eene jufâreŋgopeneŋ me?

31 Ŋoŋe mitire kadahe fekicne bâfuaniŋte šoɋac enšepieŋ. Eme noni irec hata biaŋne jâmbâŋ ši ŋowatupe honeniŋ.

Copyright information for `KMG