1 Corinthians 5

Mamakâc sâko fuarâ fowec

No šiŋuc ine jâmbomac mupie manaekopac: Ŋoŋerao mamakâc hâhâwicne, qâpuc jaŋerao mi fufuane, iŋucne fuawec fokac. Ŋic moczi mamac-ticnere ŋonâŋhec juekac, irec mukopac. Eme ŋoŋe wemocte wiac iŋucne fuarâ fohame pepecne eeŋgopieŋ? Ŋoŋe busâqoc manahuc ŋic wiac ewec e behenšapiŋ me¡ No sahac-nanezi wiwicko juhuc maŋnanezi iqic-ŋoparâ ŋic wiac ewec ere dâŋ ŋondeŋ-ŋeŋicko juhuc tinac kecšiŋuc mutarapo: Ŋoŋe Wofuŋ Jesu ere šâŋeo tumaŋnehapie no ere tâpirio ŋesiŋnehuc maŋnanezi iqic-ŋopape ŋic e Sataŋ qikiŋnecnepene maŋ sahac raŋɋa-ticne sipirickezejec, eme Wofuŋ Jesure dameŋ maickeme mâro-ticnezi aakic bâfuazejec.

Wiac hâhâtâne qikiŋnehuc nocne bajuzo

Wiac iŋucne foipiehame sahac-ŋeŋic bafeeŋgopieŋte manape sâqorekac. Bec hâhâtâne i wiac piticnezi fârine ruacneme rikepie isirickeme hâtâne efâreocmu, i mi manaeŋgopieŋ me? Irec hâhâtâne wosâerâ behepie rahame fârine nocne enšepieŋ. Ŋoŋe hâhâtâ-ŋeŋic ŋowac rofârekicne. Nâŋâcne aakic lama okac-nâŋec qakicne wâc, Kristo hâcne. Irec hombaŋ-ticne ŋenaŋte wiac hâhâtâne behenšepeneŋ. Mamakâc â sindaŋ irec hâhâtâne qikiŋnerâ wiac ɋaɋacne â tiŋne irec fârine nocne bajuhuc hombaŋ-ticne ŋezo.

Sâqocne bapa behec-jopazo

No mârâc papia moc šiŋuc qâreŋke-ŋarepo: “Ŋoŋe sasecŋic jaŋehec wiac nâ nareŋ gareŋ â iiqic mi enšepieŋ”, 10 i ŋic qâpuczi sasecŋic me bâkiri bapa â fiuc serereŋhec me bawe qaŋgec wiac babaju jueŋgopieŋ jaŋere mi mupo. Jaŋe mâreŋ behehuc behec-jopazo i sawa fokac. 11 No kecšiŋucte qâreŋke-ŋarepo: Miti mamana âgo-ŋeŋic moczi sasecko sâqoreocmu me bâkiri baocmu, me bawe qaŋgec wiac bajuocmu, me fiuc serereŋ eocmu, ŋic iŋucne behehuc ehec nâ nareŋ gareŋ moc mi enšepieŋ. 12 No ŋic râpene jueŋgopieŋ jaŋere dâŋ mumure wemocko qâreŋkezapo. ŋaŋacne ŋondeŋko miti mamana jaŋere bahacdâŋ mupie sâckeocmu. 13 Á râpene jueŋgopieŋ jaŋere bahacdâŋ i Anutuzi muocmu. Sâqocne bapa e behepie ŋondeŋ-ŋeŋicko mi juzejec.

Copyright information for `KMG