1 Corinthians 7

Ŋowe ŋonâŋ jaŋere dâŋ

Ŋoŋe papia râe-narehuc dâŋ wio-narembiŋ, irec šiŋuc mufuape mananiŋ: Ŋic moczi ŋokac tâmiric juzo mume sâckeocmu. Erâ sasecte eesâic fokacte ŋiczi ŋokac rorâ ehec paŋšâic juzejec, â ŋokaczi iŋuc jaha ŋic rorâ ehec paŋšâic juzejec. Eme ŋiczi sahac-ticne i ŋonâŋ-ticne mi sakarecnezejec, â ŋonâŋzi sahac-ticne ŋowe-ticne mi sakarecnezejec. Ŋonâŋ e sahac-ticnere dâŋ mumu i jahacne mâcne, ŋowe qikiŋnecnekicne, â ŋowe e iŋuc jaha sahac-ticnere dâŋ mumu i jahacne mâcne, ŋonâŋ qikiŋnecnekicne. Ŋowe ŋonâŋ ŋoŋe sahac sasakarec kosa mi enšepieŋ. Mâc nunumure afeckeniŋte qanaŋ muc manac erâ dameŋ bahuc iŋuc epie sâckeocmu. Dameŋ tâmiric mâc jufepie Sataŋzi esâic-ŋopazacte iŋuc mukopac. Ŋic â ŋokac roroc eniŋte mukopac i mana urue-ŋarehuc mukopac, mupaŋke-ŋarehuc mâcne. Nahacne maŋzi šiŋuc mukac: Ŋic sasawa no jukopac iŋuc jufârenšapiŋ me. Anutu e ine tâpiri buc buc tahac-nâpoekac i hatane bârâwiŋ, moc iŋuc â moc iŋuc.

Ŋicšeŋoŋ â hozec â ŋowe ŋonâŋ jaŋere dâŋ

Ŋic ŋokac šeŋoŋ â hozec jaŋere ine šiŋuc mukopac: Jaŋe no iŋucne jufepie sâckeocmu. Me sasec tâmiric sâcne jujune mi fojarekacko ine sasecte šoczi sipiric-jopazacte ŋowe ŋonâŋ erâ junšepieŋ.

10 Ŋowe ŋonâŋ ŋoŋere dâŋ mupe mananiŋ, erâ i nore dâŋ mâcne, i Wofuŋte micdâŋ: Ŋokac moczi ŋowe-ticne mi behezejec. 11 Á ŋowe-ticne biac behewecko ŋic tâmiric juzejec, me ŋowe-ticnehec mocwâc âgo babac ezepirec. Erâ ŋic moczi iŋuc jaha ŋonâŋ-ticne mi behezejec.

Ŋowe ŋonâŋ ocŋondeŋ juju

12 Gâcne jaŋere dâŋ ši mupe manapie Wofuŋte mâcne, no nahacne ezejec: Opâ ruac ŋic moc ere ŋonâŋ qâpuc juocmu, eme ŋokac izi ehec juocte ecneocmuo mi behezejec. 13 Me opâ ruac ŋokac moc ere ŋowe qâpuc juocmu, eme ŋic izi ehec juocte ecneocmuo mi behezejec. 14 Ŋic qâpuc erao ŋonâŋ-ticnere jambuŋzi fotâcnewec, â ŋokac qâpuc erao ŋowe-ticnere jambuŋzi fotâcnewec. Eme irec hâcne naru motecfâc-ŋeŋic jambuŋhec embiŋ juŋgopieŋ, I tâmiric muzac qâpuc junšapiŋ. 15 Oapuc ŋiczi me qâpuc ŋokaczi ine âgo-ticne miti mamana beheocte qizec qame mi sakarezejec. Irec niŋgiŋne mi fokac. Anutu e wamao ââgo erâ juniŋte hefârec-ŋopawec. 16 Ŋokac go ŋowege miti hatao fâretec wareocmu me mâcne, i moc manakic me? Me ŋic go ŋonâŋge miti hatao fâretec wareocmu me mâcne, i moc manakic me?

Moc e mârâc domawec, dodoma ijaha mitio domazejec

17 Moc e Wofuŋzi ju ju bâfuacnewec, â moc e Anutuzi gie mucnewec, sâc ijaha mitio juzejec wâc. No dâŋ iŋuc kikefuŋ hae sâc jaza mutâc eekopac. 18 Moc e mahec juhame Wofuŋzi hefârewecko ma i mi behezejec. Á moc e ma tâmiric juhame Wofuŋzi hefârewecko mare mi muzejec. 19 Mahec juju me ma tâmiric juju izi fârine mâcne, Anuture sâcmutâc dâŋ rereŋ izi fârine ekac. 20 Moc e dodoma ira me ira domahame Wofuŋzi hefârewecko dodoma ijaha domazejec. 21 Go kiŋaŋ qaqa juhaŋtec hefârecguwecko manabâc tâmiric Juzemec. Mâc firuecguzo mupie mi qikiŋnezemec. 22 Moc e kiŋaŋ qaqa juhame Wofuŋzi hefâreme Wofuŋte ŋicfâri ewec Jukac. Á moc e ŋicfâri juhame Wofuŋzi hefâreme Kristore kiŋaŋ qaqa ewec jukac. 23 Ŋoŋe furi-ŋeŋic rokicnere ŋic jaŋere kiŋaŋ qaqa mi enšepieŋ. 24 Âgo bureŋ, moc e mârâc domahuc miti manawec, biri ijaha dameŋ šiŋuczia domahuc Anuturao qohotazejec.

Motec šeŋoŋ â naru šeŋoŋ jaŋere dâŋ

25 Naru šeŋoŋ jaŋere Wofuŋte micdâŋ mi bajukopac. Erâ Wofuŋzi roroŋ fâre-nareme mitihec epore nahacne dâŋ ŋazape mananiŋ: 26 Dameŋ šiŋuczia šârâ hâriŋ boc fuaekacte ŋic moc ŋonâŋ tâmiric juzo mume manape biaŋkeocmu. 27 Á ŋokac biŋe biac mugarekicko ine mi qikiŋnezemec, me go mesawane jukicko ine ŋokacte mi muzemec. 28 Me ŋokac rozo murâ rotec wâc mi sâqoreocmu, â naru šeŋoŋ moczi ŋic rome wâc mi sâqoreocmu. Erâ iŋucnezi sahackopec wiacte hume serereŋ juniŋmu. No ine i tâmiric mac juniŋte enareha mukopac.

Dameŋ bembeŋkekacte ira me ira mi qohotazo

29 Âgofâc-nane, dâŋ ši mupe mananiŋ: Dameŋ rifirekac. Eme dameŋ bembeŋne fokacte ŋonâŋhec jueŋgopieŋzi jupie ŋonâŋ tâmiric juju tinac ezejec, 30 â kioeŋgopieŋzi jupie ki tâmiric tinac ezejec, â šeri eeŋgopieŋzi jupie šeri tâmiric tinac ezejec, â wiac furi baeŋgopieŋzi jupie mafa tâmiric tinac ezejec, 31 â wiac nâ bac eeŋgopieŋzi jupie i tâmiric tinac ezejec. Mâreŋ hawari qâreŋne ši hone manac eeŋgopeneŋ i siroweocmu ekac, irec hâcne dâŋ i mukopac. 32 Ŋoŋe ine wiac omanere mana mezac tâmiric erâ juniŋte manasuhuc mukopac. Ŋonâŋ tâmiriczi Wofuŋte giere mana mezac eocmu, ehuc Wofuŋzi manacneme biaŋkeocte muocmu. 33 Ŋonâŋheczi ine sahackopec wiacte mana mezac eocmu, ehuc ŋonâŋ-ticnezi manacneme biaŋkeocte muocmu. 34 Iŋuc erâ maŋguru eocmu. Eme ŋokac šeŋoŋ â naru šeŋoŋ jaŋe iŋuc jaha Wofuŋte giere mana mezac eniŋmu, ehuc maŋ sahac-jeŋic Wofuŋte biŋe eocte manasuniŋmu. Á ŋokac ŋoweheczi ine sahackopec wiacte mana mezac eocmu, ehuc ŋowe-ticnezi manacneme biaŋkeocte muocmu. 35 Ŋoŋe sâcne juhâmoniŋte dâŋ ši ŋazakopac, qaisoc-ŋopahuc mâcne, ŋoŋe kosa mi juhuc maŋ mamanasu-ŋeŋic qâzuckepie Wofuŋtea hâcbuc domaocte mukopac hâcne.

36 Me ŋic moc e otâ-ticne ŋic roronere sâc bâfuaha sakareocte maname mi sâckeme ŋicko râezo murâ râezejec, i mi sâqoreocmu. 37 Ŋic moc e ine maŋticnezi šiŋuc mana sanaŋkeocmu, otâ-nane mâc juzejec, iŋuc murâ maname mi quŋkeocmu, ehuc afeckerâ iŋuc mupaŋkeme sâckeocmu. 38 Irec ŋic moc e otâ-ticne ŋicne ŋicko râeme sâsâckecne eocmu, â moc e otâ-ticne sakareme ine sâcke-hâmoocmu.

Hozec jaŋere dâŋ

39 Ŋokac moc e ŋowe-ticne juocmu sâc gâjoŋnao bohotarâ domazejec. Ŋowe-ticne hâmome ine ŋic moc me moc rozo murâ rozejec, erâ kosa ehuc mâcne, Wofuŋtao roweckehuc ezejec. 40 Ŋowe tâmiric mâc juocmu irec ine manape sâcke-hâmoocmu. I nahacne dâŋ, erâ i Anuture Mâro wâc fonarekacte mukopac.

Copyright information for `KMG