1 Corinthians 9

Gie bapa ŋic jaŋe giefâc-jeŋiczi dopec-jopapie sâckeocmu

No niŋgiŋhec juekopac me? No aposolo aricne me? No Wofuŋ-nâŋec Jesu mi honepo me? Gie-nanere fârine Wofuŋte jambuŋko fuakicne i ŋoŋe mi eŋgopieŋ me? No gâcne jaŋere aposolo mi mecne juekopac, â ŋoŋere ine jâmbomac juekopac. Aposolo gie-nanere ma Wofuŋte jambuŋko fuakicne i ŋoŋe hâcne.

Fuŋne-nanere mueŋgopieŋ jaŋe ine dâŋ šiŋuc bâtikie-jarekopac. Gâcne nâŋe ŋoŋeraonec nânâ opâ mi ronaŋte muac-nâpokicne me? Aposolo tucne â Wofuŋte ɋafâc â Petoro jaŋe ŋonâŋfâc-jeŋic jaŋehec miti kiŋaŋ raeŋgopieŋ, ehame gâcne nâŋe sâc ijaha enaŋte mi mana-nârekicne me? Me no â Banaba nâhe sawa mezi gie bapa behenacte mi mana-nâctekicne me? Me mo momori ŋiczi šikare wiac e jahacne moneŋzi furine baocmu? Me mozi gie he sarac eme fârine fuame mi ro nâc eocmu? Me mozi noniŋ bulimakao gie bahuc jaŋere susu ba nâc mi eocmu? Ʒi ŋicdâŋ sawa mukopac me? Sâcmutâc dâŋzi ijaha mi mufuakac me? Mosere sâcmutâc dâŋ moc šiŋuc qâreŋkekicne fokac: “Bulimakaozi gie bagarehuc sopâc kecɋaŋ nâzo mume mi sakarecnezemec. Eme Anutuzi dâŋ i bulimakao jaŋere sawa manasuhuc muwec me? 10 Ŋic nâŋâcne mâmâc mi muwec me? I nâŋâcne hâcne mukicne. Gie he rikec eekaczi mâc mi eekac, fârine fuame nâocte manasuhuc eekac, â sara mamac eekac e iŋuc jaha fârine fuacneocte manasuhuc eekac. 11 Nâŋe ŋoŋerao maŋte wiac sara mamac embeŋko okacne ŋoŋeraonec sahacte wiac ronaŋte manapie ŋemâckekac me? 12 Gâcne jaŋe ŋoŋeraonec nânâ mafa rohapie nâŋe gie fuŋkembeŋzi rorone mi fokac me? Erâ ine Kristo Biŋebiaŋ-ticne aka hecnenšipeŋte ŋoŋeraonec nânâ mafa rorore mukicne i qikiŋnehuc mâc hume serereŋ jueŋgopeneŋ.

Paulo e miti gie furimâc bawec, izi šeridâŋ-ticne ewec

13 Taha ufuŋko gie baeŋgopieŋ jaŋe taha ufuŋkonec nânâ nâeŋgopieŋ, â alatao bâzi ririke gie baeŋgopieŋ jaŋe alatare wiac nâ bac eeŋgopieŋ, i ŋoŋe mi manaeŋgopieŋ me? 14 Eme Wofuŋ e Biŋebiaŋ mumu ŋic nâŋe iŋuc jaha Biŋebiaŋzi sahacte dope wiac kifua-nâreocte muwec. 15 No ine hata i mi âteekopac. Erâ ŋoŋe irec sâcko enareniŋte manasuhuc mi qâreŋkekopac, aricne. Hâmoczi rocnuzac irec manape afeckezac, â šeridâŋ-nane i babawaha-nare irec ine manape ŋic moczi mi enare-jâmbâŋkezejec ekac. 16 Biŋebiaŋ muromackeekopac irec mumumbiaŋ dâŋ mupe wemocko sâckeocmu, gie i hâcne nore faio râekicne i¡ Eme hetarepe, jei, Wofuŋzi weniŋuc enareocmu¡ 17 Gie i no nahacne maŋte fuarâ bazapo muzac juku furine rozapo. Nahacne maŋte mi ropore šiŋuc ekac: Micne gie fai-naneo fewec. 18 Hâc, eme wemo furi roekopac? Furine šiŋuc: No miti kiŋaŋ rahuc ŋic Biŋebiaŋ furimâc jazaekopac, ehuc Biŋebiaŋ mumure furi sahackopec wiac rorore mukicne i qikiŋneekopac.

Paulo e ŋic fuŋne fuŋne jaŋere kiŋaŋ qaqa ewec

19 No ŋic sasawa jaŋere kiŋaŋ qaqa mi jukopaczi sifu kiŋaŋ qaqa-jeŋic epo jukopac. I ŋic bocjahazi miti manarâ biaŋkeniŋte manasuhuc epo hâcne. 20 Judaŋic jaŋerao juhuc Judaŋic hawari epo, i Judaŋiczi biaŋkeniŋte. Sâcmutâc dâŋte kiŋaŋ qaeŋgopieŋ jaŋerao juhuc sâcmutâc dâŋte kiŋaŋ qaqa hawari epo, i no nahac sâcmutâc dâŋte kiŋaŋ qahuc mâcne, i kiŋaŋne qaeŋgopieŋzi biaŋkeniŋte epo. 21 Qâpuc sâcmutâc dâŋ tâmiric jaŋerao juhuc sâcmutâc dâŋ tâmiric hawari epo, i Anuture maio sâcmutâc dâŋ tâmiric juhuc mâcne, no Kristore sâcmutâc dâŋ bajuekopac, erâ qâpuc jaŋe biaŋkeniŋte iŋuc epo. 22 Ŋic dodocne jaŋerao juhuc dodocne hawari epo, i dodocnezi biaŋkeniŋte epo. Ŋic fuŋne fuŋne jaŋerao juhuc hawari fuŋne fuŋne epo, i gâcnezi sipirickehapie sifu gâcnezi biaŋkeniŋte. 23 Wiac sasawa i mâc mâcne, Biŋebiaŋzi fua raocte eekopac, erâ no nahac wâc irec kâdoc ropemurâ eekopac.

Sasanaŋhec juhuc eri bâfuazo

24 Ŋoŋe kecšiŋuc mi manaŋgopieŋ me? Sâsâc eere hofao ira motec jaŋe gagasa i mâmâc gasacke-fâreniŋmu, â eri roro ine mocsâkoazi mao bâbâni fisirâ roocmu. Eme ŋoŋe iŋuc jaha eri-ŋeŋic roniŋte gasackenšepieŋ 25 Motec jaŋe sasanaŋte sâsâc ehuc sowa fuŋne fuŋne jueŋgopieŋ, jaŋe eri sisirowenere iŋuc eeŋgopieŋ, nâŋâc ine eri fofo sanaŋte iŋuc enšepeneŋ. 26 No nahac wâc gasackeekopac, i ma hone dendeŋnehuc gasackeekopac. No sându-nane sawao kosa mi wickeekopac. 27 No ŋic miti muromacke-jarehuc juku nahacne rârâricne ezipore sahac-nane ro waha âte ecnehuc ŋicbomboŋ-ticne juekopac.

Copyright information for `KMG