1 John 5

Anuturao qohotapene wiac moczi mi bawahac-nâpoocmu

Ŋic moczi Jesu e Kristo muhuc mana šakieocmu, e Anuturaonec fuakicne muzo. Eme moc e mamac bâbâfua maŋjauŋ ecneocmuzi ɋâricfâcne mâmâc ejareocmu. Nâŋâc Anuture naru motecfâc maŋjauŋ ejareeŋgopeneŋ me mâcne, ine Anutu maŋjauŋ ecnehuc sâcmutâc dâŋticne reŋkepene izi mufuaocmu. Anutu maŋjauŋ mâc mi ecnezo, sâcmutâc dâŋticne reŋkehuc hâcne maŋjauŋ ecnezo. Anuture sâcmutâc dâŋ i dâŋ ŋemâcne aricne. Anuturaonec fuakicne sasawa jaŋe mâreŋkonec wiac qamaseeŋgopieŋ, â mâreŋkonec wiac qame wahaekac tâpiri i šâŋene mamanasiŋ-nâŋec.

Anutu e dâŋticne dopeckehuc wiac râewec

Moczi sasanaŋhec erâ mâreŋkonec wiac sasawa qamaseocmu? Ŋic moc e, Jesu e Anuture Ŋokâ, iŋuc muhuc mana šakieocmu eki hâcne iŋuc eocmu. Jesu Kristo eki hâcne opâhec â sochec fisiwec, opâhec sawa mâcne, opâhec â sochec mâmâc. Mârozi ine fuŋne mufuaekac, Mâro e dâŋ fâri qizecnere rune hâcne. Irec jahec â moc jaŋe dodopec gie baeŋgopieŋ: Mâro â opâ â soc. Eme jaŋe jahec â moczi fuŋne-jeŋic mocjaha. Ŋiczi dâŋ dodopec ehuc mupie manapene jâmbomac eekac, â Anutuzi dâŋ moc dopeckeme ine fâri rarau jâmbâŋ eekac. Anuture dodopec dâŋ ine Ŋokâ-ticnere dâŋ dopeckewec i hâcne. 10 Moc e Anutu Ŋokâ-ticne manasiŋkeocmu, e Anuture dâŋ fârine maŋkeocmu. Moc e Anuture dâŋ mi mana šakieocmu, i Anutu burecŋic mucnekac eocmu. Ŋic iŋucnezi Anutu e Ŋokâ-ticnere dâŋ dopeckewec i maname fâri tâmiric ekac hâcne. 11 Á dâŋ dopeckewec ine šiŋuc fuakac: Anutu e juju sanaŋ bâfua-nârewec, â juju sanaŋ irec jâcne ine Ŋokâ-ticne. 12 Moc e Ŋokâ rauckeocmu e juju rauckeocmu, moc e ŋokâ mi rauckeocmu e juju wâc mi rauckeocmu.

Nunumure â sâqocnere dâŋ

13 No dâŋ i ŋoŋe kecšiŋuc mananiŋte qâreŋke-ŋarekopac: Anutu Ŋokâ-ticne manasiŋkeeŋgopieŋ ŋoŋe juju sanaŋ foŋarekac. 14 Nâŋâc šiŋuc muhuc Anutu bubiaŋ manacneeŋgopeneŋ: Wiac mocte, e jahac maname fokac irec sâcko râehuc numucnepene mana-nâreocmu. 15 Ine hâcne, wiac i me i numucnepene mana-nâreocmu, i manahuc šiŋuc wâc mananaŋmu: Wiac numucnekicne i biac rauckeŋgopeneŋ. 16 Ŋic moc e âgo-ticnezi sâqocne bame honeocmu, sâqocne hârâcte niŋgiŋ sanaŋ-ticnehec i mâcne, ine honerâ ere erâ numume Anutuzi juju hatao râeocmu, ine sâqocne hârâcte niŋgiŋ sanaŋ-ticnehec mi baniŋmu jaŋe iŋuc ejareocmu. Sâqocne hârâcte niŋgiŋ sanaŋ-ticnehec i fokac wâc. Iŋucnere nunumu gie baocte mi mukopac. 17 Juju bapa hehesicne i sâqocne sasawa. Erâ sâqocne gâcne ine hârâcte niŋgiŋ sanaŋ-ticnehec mi ekac.

Maŋ mamanasu-nâŋec fuame Wofuŋ fârine šâŋitaeŋgopeneŋ

18 Nâŋâc šiŋuc manaŋgopeneŋ: Anuturaonec fuakicnezi sâqocne mi baocmu. Anuture Ŋokâzi hone maiŋ ecnehame sâqocne runezi mi bâuaocmu. 19 Nâŋâc Anuturaonec fuakicne, â miti tâmiric sasawa jaŋe sâqocne rune ere rurumaŋko foŋgopieŋ, iŋuc manaŋgopeneŋ. 20 Erâ šiŋuc wâc manaŋgopeneŋ: Anutu Ŋokâ-ticne e waharâ maŋ mamanasu bâfua-nârewecte jâmbomac rune mana maŋ ecneeŋgopeneŋ. Eme jâmbomac rune, Ŋokâ-ticne Jesu Kristo, eki maŋnâpokac. Eki hâcne Anutu fârine â juju sanaŋ rune. 21 Naru motecfâc-mae, wofuŋ jawane jaŋere rucgereŋ-ŋeŋic banšepieŋ.

Copyright information for `KMG