1 Peter 5

Micne bapa jaŋere dâŋ

Ŋoŋerao micne bapa juŋgopieŋ ŋoŋe no micne bapa âgo-ŋeŋiczi dâŋ ŋazape. No Kristo e šâic fâro maname šâŋe fâri-nanezi honepo, izi juku eri tatamac-ticne fua tâcneme i wâc rauckepemu. Irec no hâcne dâŋ mu qâmoc eŋarepe mananiŋ: Anuture lama guru soŋaŋ-jopaniŋte muŋarekicne, i jâiŋko mâcne, buafec jaha hone maiŋ ejarenšepieŋ, erâ moneŋ mafa huhurere manasuhuc mâcne, giere buâkec eŋareha enšepieŋ. Erâ wâc ŋicbomboŋ ejarehuc mâcne, lama micne bajarehuc miti hata bânie-jarenšepieŋ. Eme juku soŋaŋ sâkozi fisirâ hendiŋ huririnehec fofo sanaŋ i heŋareme hume rojuniŋmu.

Ŋic socɋâri ŋoŋe iŋuc jaha ŋazakopac, ŋoŋe ŋic kâcɋene jaŋere wahamicne junšepieŋ. Erâ mâmâc sasawa ine gie qoruc šâŋene maŋhuhuŋ i jomarâ kiŋaŋ qaqac enšepieŋ. Manaŋgopieŋ, Anutu e ŋic maŋfefe jaŋe dope qatara-jareekac â ŋic maŋhuhuŋ ine dope sicne-jareekac. Anuture mesanaŋzi bâuruŋ-ŋopame dapenšepieŋ. Iŋuc epie juku dameŋ-ticne maickeme ekizia bafaharec-ŋopaocmu. Wiac mezac-ŋopaekac sasawa Anutu qârâriecnenšepieŋ, eki sâcne hone jauŋ eŋareekac.

Maŋɋâri juzo

Ŋoŋe maŋsowa juhuc rucgereŋ-ŋeŋic banšepieŋ. Râsi sâko-ŋeŋic Sataŋ e oâ iŋucne erâ mic aŋkerâ e me e ɋâckepe muhuc ra fisi ware fisi ehuc juekac. Eme ŋoŋe mamanasiŋhec qiŋ herâ domahuc e hetapaickenšepieŋ. Erâ šiŋuc mananšepieŋ, âgofâc-ŋeŋic mâreŋ sâc jaŋerao šâic fâro ijaha fua-fârewec fokac. 10 Erâ Anutu aki anonoc rune, e eri tatamac fofo sanaŋ focnekac, ira Kristore erâ fisiniŋte hefârec-ŋopaweczi šâic fâro dameŋ bembeŋne manahapie bâtiec-ŋopahuc âkesiŋ-ŋopaocmu, erâ basanaŋ-ŋopahuc keteŋ-ŋopaocmu. 11 Tâpiri i erao hâcne foweczi fohuc juocmu sanaŋ. Jâmbomac.

Mumutara dâŋ

12 No dâŋ i Siliwano âzâcnepe qâreŋke-ŋarekac. No ere hâcne manape âgo fârine ekac. No bapa fuŋfuŋ jaha manapozi Anutu uruc jauŋ-ticnere dâŋ bembeŋnea mutaniŋke-ŋarerâ faŋ qaŋarehuc mukopac, dâŋ i fârine, maŋnao qiŋ herâ domanšepieŋ. 13 Babe haeonec kikefuŋ, nâŋâcnehec mâmâc rowosâec-jopakicne, jaŋe manasu-ŋareŋgopieŋ, erâ motec-nane Mareko e mâmâc. 14 Ŋoŋe mitio ââgo ehuc meo babac efârenšepieŋ. Kristohec jueŋgopieŋ ŋoŋerao wama fofârezejec.

Copyright information for `KMG