1 Thessalonians 2

Paulo e Wofuŋzi honeme biaŋkeocte irec mocjaha muwec

Âgofâc-nane, ŋoŋerao fisirâ gie bapene fârimâc mi ewec i ŋaŋac manaŋgopieŋ. Qanaŋ Filipi haeo qa imac enârembiŋ i manaŋgopieŋ wâc. Enârepie sifu mi dockembeŋ. Aricne, Anuturao roweckepene bubiaŋ qanâreme afeckerâ ŋoŋerao fârâ Anuture Biŋebiaŋ i juju gie sâko bahuc mufua-ŋarembeŋ. Babaafec dâŋ mueŋgopeneŋ i mamana sifuc faio mâcne, me maŋsifuc faio mâcne, me kege wage eŋarehuc mâcne” Anutuzi honec-nâpome sâckeme Biŋebiaŋ muromackenaŋte betoŋ-nâpowec irec sâc mueŋgopeneŋ. Ŋiczi mana-nârepie biaŋkeocte aricne, Anutu e maŋ hohonezi mana-nâreme biaŋkeocte mocjaha mueŋgopeneŋ.

Ŋoŋe nâŋere manaeŋgopieŋ, nâŋe bâbâmiriŋ dâŋ moc mi ŋazambeŋ mitio ake hehuc moneŋ mafare andac i wâc mi embeŋ, i Anutuzi manaha mukopac. Kristore aposolo nâŋe mana-nârepie feme sâckeocmu i manahuc sifu ŋoŋe me hae gâcnaonec ŋicbomboŋ eŋarenaŋte mi mumbeŋ. Aricne, neŋgoc moczi kogocfâcne hemiriŋ-jopaekac, iŋuc jaha nâŋe ŋoŋerao juhuc eŋarembeŋ. Aŋac-nâŋec ŋoŋerao fowecte Anuture Biŋebiaŋ ŋaŋazare sawa mâcne, ŋoŋere erâ juju-nâŋec qiqikiŋ irec mâmâc afeckembeŋ, maŋnâŋec ŋoŋerao âeckewec irec.

Paulozi mamac-jeŋic erâ miti qazu-jarewec

Âgofâc, micneneŋ eŋarepene takic-ŋopazacte ŋafe furec sahacte gie mâmâc šocne fârone bahuc domambeŋ, i ehuc Anuture Biŋebiaŋ ŋazambeŋ, ŋoŋe irec manasueŋgopieŋ. 10 Nâŋe maŋtaniŋ â tiŋne â bahacmâc juhuc miti mamana ŋoŋe wiac eŋarembeŋ, i ŋoŋe mecne â Anutu mecne fuŋne-nâŋec manaŋgopieŋ. 11 Erâ moc šiŋuc wâc manaŋgopieŋ: Mamac moczi naru motecfâcne ejareekac, sâc ijaha nâŋe ŋoŋe eŋarehuc buc buc mu sawaŋ dâŋ ŋazambeŋ â esoc qafeŋ eŋarembeŋ â šiŋuc mušakiehuc ŋazambeŋ: 12 “Uucmaŋ-ticne â eri tatamac-ticne rauckeniŋte hefârec-ŋopaekac Anutu hâcne, ere ŋicfâc fârine erâ irec sâcko junšepieŋ.”

Miti manahuc šika kimbiŋ

13 Nâŋe Anuture dâŋ ŋazapene manapie ŋicdâŋ mi ewec. Eme iŋuc sâcne manambiŋ, i Anuture dâŋ jâmbâŋ, eki miti mamana ŋoŋerao gie baekac. Eme nâŋe irec hâcne Anutu daŋge mumuteŋ kuduc jaha ecnehuc jueŋgopeneŋ. 14 Âgofâc-nane, ŋoŋe Anuture kikefuŋ Judaia mâreŋko Kristo Jesurao qohotambiŋ jaŋehec sâc mocjaha embiŋ. Jaŋe Judaŋiczi jopa qâšâic ejarembiŋ iŋuc jaha âgofâc-ŋeŋic gâcnezi ŋoŋe ŋopa qâšâic eŋarembiŋ. 15 Judaŋic jaŋe Wofuŋ Jesu â porofete iŋuc jaha qâhâmoc-jopambiŋ, erâ wâc nâŋe nâpo jâpec enârembiŋ. Jaŋe Anutu âgo mi ecneeŋgopieŋ â ŋicne ŋicne kisuec-jopaeŋgopieŋ. 16 Ehuc qâpuc miti jazapene manarâ biaŋkenšipiŋte aka henareeŋgopieŋ. Jaŋe iŋuczi iŋuc ehuc sâqocne faio fefec hefekupie kiŋjeŋicte sâc micne qame Anuture kimbeŋ fisi-jarewec.

Paulo e jaŋere maŋhâhâŋ ecnewec

17 Âgofâc, nâŋe behec-ŋopambeŋ, erâ maŋzi mâcne, sahaczi dameŋ ŋondeŋ ši ŋoŋe tâmiric juhuc huacbuc eŋgopeneŋte mocwâc honec-ŋopanaŋte boc enâreekac. 18 Eme irec fârâ iqic-ŋopanaŋte mumbeŋ, Paulo no nahac dameŋ moc â moc fâzo mupe Sataŋzi aka henarewec. 19 Ŋoŋere aŋac-nâpoekac i šiŋucte: Wofuŋ-nâŋec Jesu ere fifisi dameŋko weni jaŋe gie fâri-nâŋec â šeri-nâŋec â eri-nâŋec eniŋmu? Ŋoŋe wâc enâreniŋmu hâcne. 20 Ŋoŋe mumuteŋ-nâŋec â bubiaŋ-nâŋec.

Copyright information for `KMG