1 Thessalonians 4

Maŋ wâwânâŋhec aricne, maŋtaniŋ juzo

Âgofâc-nane, Wofuŋ Jesure erâ uŋ sawaŋ eŋarehuc moc šiŋuc ŋazapene mananiŋ: Mitio juju bapa-ŋeŋiczi Anutu âgo ecneocte fuŋne ŋaza qazuc embeŋ, ijaha junšepieŋ. Mitio juju i sâcne jueŋgopieŋ, mâc juŋɋârâŋkeniŋte ŋazaŋgopeneŋ. Wofuŋ Jesure micte dâŋ ŋaza qâmoc embeŋ, irec kâuc mi baŋgopieŋ. Anutu e šiŋuc hâcne muekac: Boe sau qikiŋnehuc maŋɋaɋac junšepieŋ. Ŋoŋerao moczi e jahacne ŋonâŋ maŋɋaɋacko â pectâcko rauckezejec, sasecte šocbâruŋko misac, i ŋic qâpuc Anuture kâuc baeŋgopieŋzi eeŋgopieŋ. Moczi moc aka huckehuc wiac iŋucnao âgo-ticne mi eatuckezejec. Wofuŋ e wiac irec okacne bazu-fâreocmu” nâŋe dâŋ i mârâc jaha mujomirerâ ŋazambeŋ. Maŋwânâŋhec junaŋte aricne, maŋɋaɋac junaŋte Anutuzi hefârec-nâpowec. Irec moc e dâŋ i bâsueocmu, e ŋic moc mâcne, Anuctu e jahacne bâsueocmu, Tiri Mâro maŋŋeŋicko râeekac e hâcne bâsueocmu.

Maŋjauŋhec juhuc gie šoɋac bazo

Ŋoŋe miti mamanazi maŋzi jauŋ babac eniŋte wemocte boc qâreŋke-ŋarenaŋmu, Anutu e jahac maŋzi jauŋ babac eniŋte fuŋne ŋaza ŋowatuc ewec. 10 Erâ ŋoŋe Makedonia mâreŋ hae sâc opâ ruac juraŋgopieŋ jaŋe maŋjauŋ ejarehuc jueŋgopieŋ. Erâ sifu mocwâc ɋârâŋkeocte ŋazaŋgopeneŋ. 11 Erâ dâŋ moc šiŋuc ŋaza qâmoc embeŋ: Rac warec juhuc dâŋ ojowa mi ee, hae-ŋeŋicko ŋezurâ ŋehuc mezi gie muŋarekicne aijakic jaha baniŋte ɋicwânšâŋ enšepieŋ. 12 Ehuc qâpuc jaŋere maio roroc tâmiric pectâc junšepieŋ.

Jesu fifisi-ticnere dâŋ

13 Âgofâc, ŋoŋe hâmokicne jaŋere kâuc bârâ, miti tâmiriczi maŋjeŋic šickeme ki mamakuc eeŋgopieŋ iŋuc enšipiŋte ŋazapene mananiŋ: 14 Nâŋâc Jesu hâmorâ faharewec dâŋ i maŋkerâ šiŋuc mananšepeneŋ: Anutu e Jesu ecneme hâmokicne jaŋe e jahacnehec amec-jopa fisiocmu. 15 Á moc i Wofuŋ e jahacne micdâŋ ŋazanaŋ: Mâreŋko ɋâricne juhapene fisiocmu nâŋâc hâmokicne mi siric-jopanaŋmu. 16 Wofuŋ e sambâŋkonec wahaocte ine dâŋ wiwira â aŋelo qizecte micšonšoŋ â Anuture qeŋfânâŋ fuahame wahaocmu. Wahame Kristo manasiŋkehuc hâmombiŋ jaŋe bâbâni fahareniŋmu. 17 Faharepie ɋâricne junaŋmu, tiwâne hâcne, izi jaŋerao šuhuckepene karoraczi bafec-nâpome sawao Wofuŋhec bâbâfuac enaŋmu. Erâ Wofuŋhec juhuc junaŋmu sanaŋ. 18 Ŋoŋe dâŋ i hâcne muc manac ehuc maŋ bâbâmâteŋ enšepieŋ.

Copyright information for `KMG