1 Timothy 4

Sataŋzi ŋic maŋ bâsifuc ejareme miti âke sipuniŋmu

Mâro e qanaŋ šiŋuc mujaŋgeŋkerâ muekac: Juku šâhec ŋic tucnezi miti beherâ maŋ bâsifuc bâbâfua jaŋere eeatuc dâŋko â demoŋ jaŋere burecdâŋko qohotaniŋmu. Ine burecŋiczi maŋjeŋic šukiwic bakicnere ŋic eatuc-jopahuc šiŋuc jazaeŋgopieŋ: “Ŋokac mi rohuc ŋicšeŋoŋ juzo â nânâ gâcne mi nâhuc irec sowa juzo.” Nânâ i Anutuzi râe-fârewec, erâ mamanasiŋhec juhuc dâŋfâri mana maŋ embeŋzi daŋge âzâcnehuc nanaŋte muwec. Anuturaonec wiac fuakicne i biaŋne sasawa. Erâ daŋge âzâcnehuc nâ bac eeŋgopeneŋko qaqatarene mi fokac. I Anuture dâŋzi â nunumuzi jambuŋkekicne hâcne.

Maŋzi aafec gie bazo

Go opâ ruac dâŋ i jaza qâmoc ecmu, ine Jesu Kristore kiŋaŋŋic dâŋ rereŋhec jucmu, ehuc mamanasiŋte dâŋ â mitire dâŋfuŋne fârine mana rereŋ ewaremeŋ izi maŋgere nâqiŋ eha jucmu. Á qeŋokac qizec dâŋ wose murarane ine qikiŋnezemec. Go Wofuŋ manasiŋkehuc jucmurâ maŋzi aafec bazemec. Sahacte aafec gie bapa izi fâfârine, â maŋ baafeckehuc Wofuŋ manariŋ qâriŋ eecne ine fârine. Izi šira mâreŋko â juku sambâŋko juju bâfua-nâreocte mukicne. Dâŋ i fârine jâmbâŋ â mâmâc sâko ro maŋ eenere sâc. 10 Irec fârine hâcne ronaŋte gie amec fâfâuc baeŋgopeneŋ, ine mumusoriŋzi fai-nâŋecko feipieha Anutu jujune ere mamanacko juhuc eeŋgopeneŋ. E hâcne mâreŋ sâc ŋic jaŋere bâbâpiaŋ juekaczi mamana hec nâŋâcne ejâmbâŋkeekac.

Timoteo juju bapa-ticnere dâŋ

11 Dâŋ mukopac sasawa i jaza mutâc ezemec. 12 Go motec ɋâri jukic irec ŋic jaŋe gore manapie wawahane mi ezejec. Go maŋjauŋhec â mamanasiŋhec â maŋɋaɋachec jutec miti mumugezi â juju bapagezi opâ ruac guru hata jowatuzejec. 13 Woŋec-nane juhuc miti wose qazuc â jaza qâmoc ehuc juzemec. 14 Micne bapa jaŋe Mâroraonec dâŋ mufuahuc mejeŋic qizecgao râehuc jambuŋgumbiŋ, jambuŋ irec fârine sifucke-garezacte bâiŋ basawec ezemec. 15 Go irec mana mezac ehuc giege bašihuc batec fârine fuarâ fua ehuc fome hone-fârenšepieŋ. 16 Gahacne maŋ sahac soŋaŋkehuc mitire dâŋfuŋne furu mimic foŋareocte mâmâc soŋaŋkezemec. Go i hâcne paŋšâic bajuzemec. Iŋuc ecmuo ine dâŋge manaeŋgopieŋ jaŋe mecne â go gahacne mâmâc juju biaŋko fisiniŋmu.

Copyright information for `KMG