2 Corinthians 12

Paulozi wiac šâŋe hazec furu hone manac ewec

Mumuteŋ dâŋ mupene mi sâckeekac, erâ sifu mupe. Ehuc Wofuŋzi maŋko fuac â maŋbâwiŋ enarewec, irec dâŋ binaŋ epe. No Kristore ŋic moc manakopac e wiac moc honerâ jukuhame jara 14 ekac. Ŋic e hâcne Wofuŋzi maŋbâwiŋ ecneme sambâŋ namba 3 ira fewec. I sahachec me sahac tâmiric ewec, i no mi manakopac,Anutuzia manakac. Eme ŋic e Wofuŋzi maŋbâwiŋ ecneme paradisio hâcne ferâ dâŋ miczi mi mumune â mâreŋŋiczi mi mumufuane i manawec. No ŋic e manakopac, â sahachec juhuc me sahac hetarahuc ewec, i no mi manakopac, Anutuzia manakac. Ŋic ere erâ mumuteŋ dâŋ mupemu, nahacnere mi mupemu, ine muzo murâ gegec dodoc-nane sawa musokapemu. Mumuteŋ dâŋ mupe muzac, i jâmbomac dâŋ muzapore ŋic mutucne mi ezapo. Erâ nore manapie fefene boc ezacte ine mi epemu, wiac mupe bape ŋaŋac hone manac eeŋgopieŋ izia fozejec.

Paulore sahac biucko šârâ moc fowec

Wofuŋzi wiac šâŋe hazec furu nowatuwec, irec maŋnane fezacte sahac biuc-naneo šârâ moc duckewec, i Sataŋte kiŋaŋŋic moc e maŋnanezi boc fezacte mehuhuŋzi hecnuhuc juocte mukicne. Eme behecnuocte Wofuŋ wâsickekuhape jahec â moc ewec. Eme dâŋ šiŋuc nazawec: “Jauŋ-nanezi sâcguekac â tâpiri-nanezi dodoc rorokacko fua ɋârâŋkeekac.” Irec Kristore tâpirizi norao mâckeocte dodoc rorokac-nanere manape feha mumbiaŋkezepac. 10 Eme Kristore erâ dodoc rorokac epemu me šika kipemu, me hume serereŋ jupemu, me fific guguriŋ â imaŋ gomaŋ faio jupemu, i sifu bubiaŋ manaekopac. No dodoc rorokacko sanaŋkeekopac hâcne.

Paulo aposolo gie-ticnere fuŋne taniŋkewec

11 Ʒi mutucdâŋ mupac, i ŋoŋe enarepie mupac. Ŋaŋac mumbiaŋnupie sâckezac. No jawa omane juekopac i manakopac, erâ aposolo fekicne jaŋere wahamicne juju ine mi juekopac. 12 No ŋoŋerao gie maŋuruc jaha bape mâsi â wiac šâŋe furu â wiac tâpirihec fuahuc izi aposolo fuŋne-nane bataniŋkewec. 13 Eme ŋoŋe wemo basahuc kikefuŋ gâcne jaŋere sâc mi embiŋ? Mâc wiac ŋowac ro nâc ee i mocjaha mi eŋarepo. Hehesic-nane i mi mana sâqore-narenšepieŋ.

Paulo e Korinti ŋic jaŋere maŋne kâcɋene domawec

14 No jajahec iqic-ŋopapo, eme ši mocwâc fâpere šawiehuc jukopac. Fârâ mârâc epo ijaha ehuc sahacte dopere mi bâšâic-ŋopapemu. No moneŋ mafa-ŋeŋicte mâcne, ŋaŋacnere harac eekopac. Naru moteczi neŋgoc mamac wiac hure-jareniŋte mi mukicne, neŋgoc mamaczi naru motec hure-jareniŋmu ine sâckeocmu. 15 No ine maŋ qâqâtâc-ŋeŋic biaŋkeocte moneŋ mafa sawa mâcne, juju-nane wâc qaisockezo afeckekopac. Nore maŋzi ŋoŋere kâcɋene domaha ŋoŋerezi nore piticne domaoc me?

16 Ŋic gâcnezi nore šiŋuc mueŋgopieŋ: Wiac tâtâc nânâwoc ro i mi ewec. Á soŋsoŋko ŋic eatuc-jopahuc wiac jojowac ro i ewec mecne. 17 Irec ŋoŋe muniŋ, no ŋicfâc-nane ŋoŋerao sorec-jopahuc ejarepe wiac moc ŋowac rombiŋ me? 18 Erâ Tito fâocte mucnepo ehuc opâ ruac moc sorepe jojowac erâ fâpic. Eme Titozi fârâ wiac moc ŋowac rowec me? Nâhe Mâro wirec â hata wirec mi jukoperec me?

Ŋic gâcnezi maŋŋjeŋic bârisieniŋte uŋ jazawec

19 Dâŋ mueŋgopeneŋ i esecne mana warepie sahac ŋeŋezic dâŋ eekac me? Erâ iŋuc mâcne, nâŋe Kristohec juhuc Anuture maio dâŋ mueŋgopeneŋ, erâ âgofâc, irec me irec mâcne, ŋoŋe âkesiŋ-ŋopanaŋte dâŋ mueŋgopeneŋ. 20 No ŋoŋerao fârâ honec-ŋopape mi sâckezacte, â ŋoŋe nore iŋuc jaha manapie mi sâckezacte manabâc ekopac. Ŋoŋerao kisâ, iiŋguuŋ, kimbeŋ, hehefaric, micko âkec, gupe, penaroŋ, hesi qâsifuc, wiac i fohame fâ bâfuazipore maŋbahacnukac. 21 Ŋoŋeraonec gâcnezi maŋwânâŋ, boe sau, nânâ qowi âmbâŋ nânâ, i ehuc maŋjeŋic mi bârisieeŋgopieŋ, eme iŋuc juhapie ŋoŋerao fâpe Anutu-nanezi bawahacnume ŋic iŋucne jaŋere ki busâqoc ezipore mana mezac ekopac.

Copyright information for `KMG