2 Thessalonians 2

Miti ima qaqa sâko fuame Jesure dameŋ bembeŋkeocmu

Âgofâc, Wofuŋ-nâŋec Jesu Kristo fifisi-ticnere â ehec bâbâfuac ee irec dâŋne moc ŋazapene mananiŋ. Ŋic gâcne jaŋe Wofuŋte dameŋ maickekac muhuc Mârorao muhotaniŋmu, me nâŋe micko itic enâreniŋmu me papia-nâŋecte mu ɋetic eniŋmu, eme ŋoŋe mi mutuc erâ fâfârepie maŋŋeŋic hockezejec. Eatuc dâŋ iŋuc me iŋuc ŋazapie mi mananšepieŋ. Wofuŋ dameŋ-ticne maickezo eha qanaŋ miti ima qaqa sâko fuaocmu, erâ sindaŋŋic sisipiricte biŋe eki hâcne fua tâcneocmu. Eme šâŋene Anutu me miti wiac mueŋgopieŋ i sasawa râsi ecnehuc qâhuckerâ ro waha âte ecne-fâreocmu. Erâ Anuture ufuŋko ferâ ŋehuc e jahacnere muocmu, “No Anutu.”

Sindaŋŋic

No ŋoŋerao juhuc irec hâcne ŋazapo, i moc manasuŋgopieŋ me? Dameŋ šiŋuczia aka fokac, i manaŋgopieŋ, i hâcne rârieme dameŋ-ticnao fua tâcneocmu. Ʒi ine sindaŋzi soŋsoŋko biac gie-ticne baekac. Á aka hecneekac e rârieme sindaŋŋic fua tâcneocmu. Eme Wofuŋ Jesu e micrombâŋ-ticnezi qarâ fifisi-ticnere šâziriŋnezi imackeocmu.

Eeatuc hâhâwicne fuazokac

Ŋic e Sataŋzi neŋgoc ŋesiŋ ŋecnehame tâpiri wiac fuŋne fuŋnehec fuarâ burecko mâsi â qaŋgec wiac šâŋe furu baocmu. 10 Erâ ŋic gâcne, dâŋ fâri qizecne manarâ bibiaŋke i qaisockerâ sisipiricte biŋe eeŋgopieŋ, jaŋe sâqocnere maŋ bâsifuc ejareocmu. 11 Ŋic jaŋe iŋuc eeŋgopieŋte Anutuzi eeatuc neŋgoc qizecne sâko mume fuame burecko qohotaniŋmu hâcne. 12 I mâc mâcne, dâŋ fâri qizecne qikiŋnerâ wiac hehesicnere aŋac-jopaekac, ŋic i jaŋe okacne fisi-jareocte iŋuc hâcne eocmu.

Nunumu â miti mi hetarazo

13 Âgofâc-nâŋec, Wofuŋte jorocfâc, ŋoŋe Mârozi baɋaɋac-ŋopame dâŋ fâri qizecnao qohotahuc biaŋkeniŋte Anutuzi mârâc jaha rowosâec-ŋopawec, irec daŋge hati âzâcnenaŋte maŋnâŋeczi jâiŋ-nâpoekac. 14 Irec hâcne Biŋebiaŋ ŋazapene manarâ Wofuŋ-nâŋec Jesu Kristo eri tatamac-ticne rauckeniŋte hefârec-ŋopawec. 15 Eme irec âgofâc ŋoŋe sanaŋkerâ dâŋ miczi â papiazi ŋaza qazuc embeŋ i paŋšâic bajunšepieŋ. 16 Wofuŋ-nâŋec Jesu Kristo â Anutu Mamac-nâŋec eki maŋjauŋ enârehuc katucmâc-ticnere erâ bubiaŋ fofo sanaŋ bâfua-nârewec â šeŋaŋ fâri woŋec-nâŋec râewec, 17 eki hâcne maŋŋeŋic bâinaŋkerâ dopec-ŋopame dâŋfâri â gie fâri i ŋoŋerao mi wahazejec.

Copyright information for `KMG