2 Thessalonians 3

Ŋic jaŋe Paulo nunumuzi bafickeniŋte muwec

Âgofâc, dâŋ moc fokac mananiŋ: Nâŋere erâ numupie Wofuŋte dâŋzi fofotâc haŋ barame qâreŋ biaŋ-ticne ŋoŋerao fuawec iŋuc jaha fua razejec. Erâ ŋic maŋbâiŋ bâbâfuane â sindaŋne jaŋere erâ Anutuzi ŋezic-nâpoocte nunumuzi wâc bafic-nâponšepieŋ. Miti i ŋiczi furu ninic ro maŋ mi eeŋgopieŋ. Wofuŋzi ine mume sasanaŋ, irec hume keteŋ eŋarehuc sâqocne runere roroŋ sasapec eŋareocmu. Ŋoŋe dâŋ ŋazapene reŋkerâ reŋke rahuc juniŋmu, irec Wofuŋte erâ ŋoŋere maŋjahec mi eŋgopeneŋ Wofuŋzi maŋŋeŋic jowame Anuture maŋ jauŋko â Kristore bumâteŋko iticnezejec.

Gie hetararâ ojoŋ juhuc miti babajune i mi fokac

Âgofâc, Wofuŋ-nâŋec Jesu Kristo ere micte ŋazapene mananiŋ, dâŋ qazu-ŋarembeŋ i opâ ruac gâcnezi mi reŋkehuc kosa jueŋgopieŋ, ŋic i jaŋehec mi junšepieŋ. Nâŋe hata fuŋkerâ âte-ŋarembeŋ ijaha bâjâpec-nâponiŋte kâuc mi baŋgopieŋ. Nâŋe ŋoŋerao ojoŋ mi jumbeŋ. Erâ ŋoŋeraonec nânâ furimâc mi nâmbeŋ, aricne, nânâ mafare micneneŋ eŋarenšipeŋte ŋafe furec mezi gie šocnehec bahuc šâic manambeŋ. Erâ iŋuc enaŋte mi munârekicne, nâŋe qaŋeŋ-ŋopahuc fuŋne ŋowatupene nâŋere mimiŋ qâjâpec juniŋte iŋuc eŋarembeŋ. 10 Ŋoŋerao juhuc šiŋuc hâcne boc ŋazambeŋ: Ojoŋ juocmuzi nânâ mi nâzejec. 11 Eme ši ŋoŋeraonec dâŋ šiŋuc wareme manambeŋ: Ŋic gâcnezi gie-jeŋic hetârarâ qâoma erâ jueŋgopieŋ. 12 Ŋic iŋucne jaŋe Wofuŋ Jesu Kristore micte uŋdâŋ šiŋuc jazapene mana-jâmbâŋkenšepieŋ: Ŋezu ŋewâneŋ erâ gie-jeŋic bapie fârine fuame jaŋacneonec nânšepieŋ.

13 Âgofâc, ŋoŋe ine eehâmo gie tatakic tâmiric banšepieŋ. 14 Ʒi papiao dâŋ qâreŋke-ŋareŋgopeneŋ, i ŋic moczi qikiŋneme fuŋne-ticne mujaŋgeŋkerâ behepie buc juhuc mimiezejec. 15 Râsi ecneniŋte mi mukopac, âgo-nâŋec muhuc mu bâtiŋ ecnehuc tutuc qacnenšepieŋ.

16 Wofuŋ e wama runezi ine wama bâfua-ŋareme ŋoŋerao dameŋ sâc sâcke-fârerâ fozejec. Wofuŋ e ŋoŋehec jufârezejec. 17 Ʒi Paulo no nahacne mezi šâŋe qâreŋ-nane râekopac. Papia qâreŋkeekopac sâc ma izi fuaekac. Iŋuc hâcne qâreŋkeekopac. 18 Wofuŋ-nâŋec Jesu Kristo ere aki anonoczi ŋoŋerao fotâcnerâ fozejec.

Copyright information for `KMG