Acts 19

Paulozi Efeso haeo Johanere motecfâc bâfuac-jopawec

Apolo e Korinti haeo juhame Paulozi tiki mâreŋ fotâcne raku Efeso haeo fisirâ miti mamana gâcne bâfuac-joparâ wio-jarehuc muwec, “Ŋoŋe miti manahuc Tiri Mârohec embiŋ me mâcne?” Eme jaŋe mumbiŋ, “Aricne, Tiri Mâro jukac biŋene moc mi manambeŋ.” Iŋuc mupie mocwâc wio-jarewec, “Eme ŋoŋe more šâŋe biŋeo Miti Opâ ruambiŋ?” Mume šiŋuc âzâcnembiŋ: “Nâŋe Johanere Miti Opâ ruambeŋ.” Mupie Paulozi šiŋuc jazawec: “Johane eki ŋic jaŋe maŋjeŋic bârisieniŋte opâ rua-jarehuc šiŋuc jazawec: `Râpefuŋ-naneo warehuc jukac e manasiŋkenšepieŋ. Ž Dâŋ i Jesure muwec.” Ŋic jaŋe dâŋ i manarâ Wofuŋ Jesu ere šâŋeo šuhuckehuc Miti Opâ ruambiŋ. Opâ ruapie Paulozi qizec-jeŋicko meticne râeme Tiri Mâro jaŋerao wahame miti marac furuo muhuc findaŋdâŋ mumbiŋ. Ŋic iŋuc embiŋ šare-jeŋic 12 qâririŋ.

Paulozi miti gie bahuc mâsi bawec

Eme Paulo e Judaŋic jaŋere mitificko gâbâ fehuc miti memeŋgaru tâmiric mosa jahec â moc jazahuc juwec, erâ Anuture uucmaŋte jaŋehec mu bâtikic ehuc mu baafec ejarewec. Eme ŋic gâcne jaŋe maŋsanaŋ erâ Jesure miti râpeckehuc ŋic tutumaŋko musoriŋkepie Paulozi behec-jopawec. Erâ mitire ejarewec jaŋe qâzuc-joparâ šoaŋne šoaŋne ŋic moc šâŋene Tirano ere mamana ficko miti jaza qazuc ehuc juwec. 10 Jara jajahec iŋuc ehuc juhame rârec rârec Judaŋic â Grikŋic Jurambiŋ jaŋe mâmâc sasawa Wofuŋte dâŋ mana-fârembiŋ. 11 Erâ Anutuzi Paulo neŋgoc ŋesiŋ ŋecnehame mâsi šâŋe furu-jeŋic bocjaha bawec. 12 Eme irec ŋic Jaŋe Paulozi gie qoruc â kereŋ bapa qoruc rojuwec i rorâ huchec jaŋerao barapie bâuarâ ɋiɋic qambiŋ â demoŋ maŋjeŋickonec wisembiŋ.

Riuc bapa â qaŋgec bapa jumbiŋ

13 Ehame Judaŋic riuc bapa gâcne mâreŋ râreckehuc domambiŋ jaŋe penaroŋ erâ Wofuŋ Jesure šâŋezi riuc ripa-jeŋic eocte manasuhuc ŋic demoŋhec šiŋuc jazambiŋ: “Jesu šâŋe biŋe-ticne Paulozi muekac ere micte wisezemec.” 14 Taha bapa sâko moc šâŋene Sikeua ere ŋokâfâc 7 jaŋe iŋuc hâcne embiŋ. 15 Iŋuc ehuc mupie demoŋzi dâŋ šiŋuc bâtikie-Jarewec: “Jesu manakopac â Paulo wâc manakopac, â ŋoŋe ine wenirec?” 16 Iŋuc mume ŋic demoŋheczi momori wânšâŋ erâ motec sasawa Jopa tuŋtuŋ ejarehuc ŋaqi-jeŋic bâsuc qâsuckeme biuctac â soc rurua fahare fickonec waha wisembiŋ. 17 Eme wiac irec biŋe Efeso haeo Judaŋic â Grikŋic mana-fârerâ hâbi-jeŋic goroŋkewec. Ehuc Wofuŋ Jesu muteŋ bâteŋ ecnembiŋ. 18 Eme miti mamana bocjahazi fisirâ qâpucko wiac ejumbieŋ i buafec jaha mufua-fârembiŋ. 19 Á mârâc qaŋgecte gie bajumbieŋ jaŋe qaŋgec papia amecke-fârerâ hofao šocko rikembiŋ. Eme papia irec furine qâhâckepie siliwa moneŋ 50 tauseŋ qâririŋ ewec. 20 Ŋic jaŋe iŋuc epie Wofuŋte dâŋzi ɋiɋicne jaha fua tâcnerâ ŋedâ qâdâmârewec.

Paulozi Jerusalem haeo raocte šawiewec

21 Paulo e gie iŋuc baku bafârerâ Makedonia â Akaia mâreŋ fotâc-jofârâ Jerusalem haeo raocte muwec. Ehuc šiŋuc muwec: “No Jerusalem haeo fisirâ mocwâc ware raku Roma haeo fisizepac.” 22 Eme raocte babafic jahec -ticne Timoteo â Erasto sorec-jofame Makedonia mâreŋko bânierâ rapic. E jahacne ine Asia mâreŋkoa mocwâc piticne šuhuckerâ juwec.

Atemis nemu ere ojowa sâko bambiŋ

23 Eme dameŋ ira Efeso haeo mitire erâ hâpo ojowa sâko fuawec. 24 Siliwazi eri wiac bapa ŋic moc juwec, šâŋene Demetrio. Ŋic eki Atemis nemu ufuŋ-ticnere hawari piic piic siliwazi bame feme ŋic jaŋe furine bapie e â gieŋic âgofâcne moneŋ bocjaha fua-jare jujec. 25 Eme Demetrio e gieŋic âgofâcne hetumaŋ-joparâ šiŋuc jazawec: “Ŋicbureŋ, ŋoŋe gie-nâŋec izi hâcne moneŋ mafa bâfua-nâreekac i manaŋgopieŋ. 26 Eme ŋic moc warewec jukac, Paulo hâcne, ŋoŋe ere fuŋne hone manac eeŋgopieŋ, e Efeso haeonec â Asia mâreŋ gâcnaonec ŋic wemo afecne maŋ bâsifuc ejarehuc šiŋuc jazaekac: `Ŋicmezi bakicne nemuɋâŋ i wiac fâri tâmiric. Ž 27 E iŋuc eme gie-nâŋec šâŋemâc eocmu sawa mâcne, nemu sâko-nâŋec Atemis ere ufuŋ i qoroc heocmu, erâ Atemis e jahacne šâŋe biŋe wâc rârâŋneocmu. Eme Asia mâreŋkonec â mâreŋ gâcnaonec ŋic mâmâc sasawa araŋ bacneeŋgopieŋ iŋucnere šâŋe biŋe weniŋuc omaeocmu?” 28 Demetriozi dâŋ iŋuc jazame manarâ maŋjeŋic aaric fusucmame owackehuc šiŋuc mumbiŋ: “Efeso haeonec Atemis e fekicne sâko!” 29 Dâŋ oowac sâko epie haeŋic mâmâc sasawa maŋjeŋic iŋneme kike saoŋ qajareme fisi qâture-fârerâ tutumaŋ toma-jeŋicko rafârembiŋ, ehuc Makedonia ŋic jajahec Paulo bâjâpepic, šâŋe-jekic Gaio â Aristako, jahe rocjofarâ fârec-jofa rambiŋ. 30 Eme Paulozi manarâ ŋic tutumaŋko razo mume opâ ruac jaŋe sakarembiŋ. 31 Erâ wâc ŋic fekicne gâcne Paulore âgofâc jumbiŋ jaŋe ŋic tutumaŋko mi raocte mumuac dâŋ erao râepie rawec. 32 Eme tutumaŋ tomao ira ŋic jaŋe dâŋ ojowa fetone fepie dâŋ sifuc gafuckewec, ehame gâcne sâkozi wemo wiacte eŋgopieŋ muhuc kâuc bambiŋ.

33 Ŋic jaŋe iŋuc ehuc domahapie Judaŋic jaŋe âgo-jeŋic moc, šâŋene Alesande, e ŋicguru šâšâŋiŋko domahame mu âke suec ecnepie dâŋšaeo ferâ dâŋ mu bâšâziŋ eocte ŋic me bazuc ejarewec. 34 Eme ŋic jaŋe e Judaŋic iŋuc hone tararâ micjeŋic sâc dameŋ šora owa ruruckehuc šiŋuc muhuc domambiŋ: “Efeso haeonec Atemis e fekicne sâko!” 35 Ekuhapie qâreŋŋic eki dâŋjeŋic bâniniŋkeku bâmâteŋ-joparâ šiŋuc jazawec: “Efeso ŋicbureŋ, hae širec ŋiczi Atemis sâko-nâŋecte ufuŋ â sambâŋkonec ɋâŋticne wahawec irec soŋaŋ rau jueŋgopeneŋ, i mâreŋ wenirecnec moczi kâuc baocmu? 36 I aricne, irec ŋoŋe maŋŋeŋic fâre wahame wiac kosa mi enšepieŋ. 37 Ŋic qoric-jopaŋgopieŋ jaŋe nemu-nâŋecte ufuŋkonec wiac moc ro soŋsoŋ me Atemis mu surec eecne i me embiŋ. 38 Me Demetrio â gieŋic âgofâcne jaŋe ŋic mocte manapie sâqorekacko dâŋbahac mumu šâfo maickeme kia juŋgopieŋ jaŋerao munšepieŋ. 39 Me ŋaŋacne dâŋ moc fokacko micne bapa tutumaŋko baranšepieŋ. 40 Ŋoŋe miŋecgac bâbâiŋ epie maŋgâŋko šika fuazo ejec, irec dâŋ ŋicwofuŋ sâkozi manarâ hefârec-nâpome iŋuc me iŋuc âzâcnepene maname tatarane mi fokac.” Qâreŋŋic eki dâŋ iŋuc murâ jazame râwiŋnembiŋ.

Copyright information for `KMG