Acts 22

Paulozi Judaŋic Jerusalem haeo dâŋ jazawec

(Apo 9: 1-19” 26: 12-18)

“Âgofâc-nane â kâcɋenefâc-nane, no nahacne fuŋne ŋazape mananiŋ.” Paulo e iŋuc muhuc Judaŋic jaŋacne dâŋko dâŋeme manarâ qiriŋ niniŋ jâmbâŋ efârembiŋ. Eme šuhuckerâ jazawec: “No Judaŋic, Kilikia mâreŋko Taso haeo fuapo. Erâ hae šira mamana ficko juku sokapo. Qaqazu Gamalie ere maŋfuŋko juhape miti qazu-nareme kâcɋenefâc-nâŋec jaŋere dâŋ aimuŋ anonocke-fârepo. Ehuc ŋoŋe miŋecgac eeŋgopieŋ noni iŋuc jaha Anuture erâ hume kikiŋ faio juhuc sasanaŋ epo. Ehuc miti ɋâricne ši omaeocte no râsi ecnehuc ŋic mecne ŋokac mecne mâmâc jaha niŋgiŋ-joparâ kâpâcwâru ficko râec-jopahuc jupo. Taha bapa sâko â micne bapa guru jaŋe nore fuŋne manaeŋgopieŋ. Jaŋe hâcne âgofâc-nâŋec Damasko haeo jueŋgopieŋ jaŋere papia qâreŋkerâ narepie kecšiŋuc muhuc barapo: No ocna ŋic ŋokac iŋucne bâfuac-joparâ niŋgiŋ-joparâ Jerusalem haeo bacjopa warepe okacne jarenšepieŋ. Iŋuc muhuc hata raku šoaŋ šâšâŋiŋko Damasko hae bâqiŋkehape sambâŋkonec šoc tatamac sâkozi uŋ herâ waha âkecnuwec. Âkecnuhuc herândiŋnume mâreŋko fohuc dâŋ wiwira kecšiŋuc manapo: `Saulo, Saulo, go wemocte nu jâpec enarehuc jukomec? Ž Eme noni mupo, `Wofuŋ go mo? Ž Mupe šiŋuc nazawec: `Nu jâpec enareekic Jesu Nazarete haeonec no hâcne. Ž Ŋic nohec jumbiŋ jaŋe šoc tatamac sawa honembiŋ, dâŋ nazawec ine mi manambiŋ. 10 Eme no wiohuc mupo, `Wofuŋ, no wemo epemurâ munarekomec? Ž Mupe Wofuŋzi šiŋuc nazawec: `Go faharerâ Damasko haeo ratec wiac ecmurâ mugarekicne i gazaniŋmu. Ž 11 Eme šoc tatamaczi šâŋe-nane âke hâpowecte fipe dapâc eme ŋicfâc-nane jaŋe menaneo rorâ Damasko haeo bacnu rambiŋ.

12 “Hae ira ŋic moc juwec šâŋene Anania, e sâcmutâc dâŋ aimuŋ bâninipehuc jume Judaŋic hae ijaha jumbiŋ jaŋe šeŋgoma ere manapie biaŋkewec. 13 Ŋic izi hâcne norao fâ fisirâ šiŋuc nazawec: `Qomâ-nane Saulo, go šâŋe fitâcnec. Ž Mume izia fitâcnerâ e honepo. 14 Eme dâŋ šiŋuc nazawec: `Mimiŋnefâc-nâŋec jaŋere Anutu eki fuŋne-ticne gaza gowatuc eme tiŋne rune honehuc micticnaonec dâŋ manacmurâ rowosâecguwec. 15 Eme go wiac hone manac emeŋ irec biŋe mâreŋ sâc ŋic jaza razemec. 16 Eme ši weniŋuc mâc jutec šoraocmu? Go faharerâ Jesure šâŋe riwasecketec Miti Opâ rua-garepe sâqocnege tâmirezejec.'

17 “Eme no Jerusalem haeo risierâ taha ufuŋko ferâ numupe maŋnane ŋerisieme Jesu honepo. 18 Honepe šiŋuc nazawec: `Hae širec ŋic jaŋe gore mickonec dâŋnane manarâ qikiŋneniŋmu, irec go picpac Jerusalem-konec wiserâ rac. Ž 19 Mume no dâŋ šiŋuc bâtikiecnepo: `Wofuŋ, no ŋicfâcge kâpâcwâru bacjoparâ mitificne ficne bacjopa ferâ kâcbiŋzi jopahuc jupo, 20 erâ biŋe mumuge Stefano qaniŋte ŋaqi-jeŋic guruckepie soŋaŋke-jarehape qapie manape sâckewec, i hae širec ŋic mana-fâreŋgopieŋte gore biŋe sâcne jazapemu. Ž 21 Iŋuc mupe Wofuŋzi šiŋuc nazawec: `Go šawietec no mâreŋ wiwicko qâpuc jaŋerao sorecgupe razemec. Ž ”

Paulo kâcbiŋzi qazo murâ behembiŋ

22 Ŋic jaŋe hazec-jeŋic râehapie Paulozi dâŋ gâcne jazawec. Izi miŋecne dâŋ iŋuc mume ɋeŋɋeŋnea owa ruruckerâ mumbiŋ, “Ŋic iŋucnezi arictac eoc, jume mamakâcne ekac.” 23 Iŋuc owackehuc ŋaqi-jeŋic šoricne hetararâ rufe tiepie feme 24 soŋaŋ sâkozi mume momori jaŋe Paulo ficjeŋicko bafembiŋ. Erâ ŋic jaŋe wemo wiacte boc owackecnembieŋ irec fuŋne mufuame manazore kâcbiŋzi qaniŋte mujarewec. 25 Eme jaŋe kâcbiŋzi qaniŋte fâretiŋkerâ becsahaczi bândeŋnezo epie Paulozi micne-jeŋic šiŋuc muhuc wiocnewec: “Ŋoŋe Romaŋic fârine dâŋticne mi mutarahuc kâcbiŋzi qapie sâckeocmu me?” 26 Iŋuc mume micne-jeŋiczi soŋaŋ sâkorao rarâ âzâcnerâ muwec, “Weniŋuc ezo? Ŋic e Romaŋic fârine.” 27 Mume soŋaŋ sâkozi Paulorao rarâ wiocnerâ muwec, “Go muc, go jâmbomac Romaŋic fârine?” Eme Paulozi muwec, “I jâmbomac.” 28 Mume soŋaŋ sâkozi šiŋuc muwec: “No ŋic jabanezi moneŋ bocjaha rope kitâcnume Romaŋic jâmbâŋ epo.” Eme Paulozi muwec, “No ine fufua-nane Romaŋic fuapo.” 29 Eme izia Paulo wiac ecnezo mumbiŋ i behembiŋ. Momori soŋaŋ e ine, Paulo e Romaŋic, iŋuc manarâ, no wemocte ŋic iŋucne kâpâcwâru bapac muhuc fâfârewec.

30 Hae fureme momori soŋaŋ sâko e Judaŋic jaŋe Paulo wemo wiacte mana sâqorecnembiŋ irec fuŋne jâmbâŋ manaocte taha bapa micne â micne guru furu jaha ejareme tumaŋnembiŋ. Ehame Paulo jowa hurâ tutumaŋ-jeŋicko râewec.

Copyright information for `KMG