Acts 4

Petoro â Johane kâpâcwâru bacjofambiŋ

Petoro â Johane jahe ŋic dâŋ iŋuc jazahuc domahapire taha bapa â ufuŋte polismaî micne â sadukaio ŋic jaŋe mâmâc jaherao fisimbiŋ. Jahe ŋic miti jazahuc, Jesu e hâmockonec ɋârewec, biŋedâŋ i muiŋnepire manapie sâqoreme rocjofarâ hae biac owâewecte kâpâcwâru ficko râec-jofapie fohapire hae furewec. Eme Petorozi miti mume manambiŋ jaŋeraonec bocjahazi i mana šakierâ Jesure kikefuŋfâc jaŋerao šuhuckepie ŋic sasawa šare-jeŋic 5 tauseŋ ewec.

Petorozi Jesure šâŋe mujaŋgeŋkewec

Hae fureme micne bapa â soŋaŋ â miti qaqazu jaŋe Jerusalem haeo taha bapa sâko Hanasi â Kaifa â Johane â Alesande â kikefuŋfâc-jeŋic jaŋehec tumaŋnembiŋ. Erâ mupie aposolo jahe tutumaŋ-jeŋicko bacjofa fembiŋ. Eme mai-jeŋicko domapire esâic-jofarâ mumbiŋ, “Mozi mamac eŋactehuc mu qafeŋ eŋacteme mâsi i bapirec?”

Eme Petoro e Tiri Mârozi maŋnao fusucmame dâŋ šiŋuc jazawec: “Micne bapa â soŋaŋfâc-nâŋec, mupe mananiŋ: Nâhe ŋicpuriŋ jauŋkeperec, irec ŋoŋe, mozi neŋgoc ŋesiŋ eŋacteha ŋic bâpiaŋkepirec, muhuc miŋecgac mu gufuc enâcteŋgopieŋko 10 mutaniŋkepe ŋoŋe â Israe ŋic mâmâc sasawa mananiŋ: Jesu Kristo Nazarete haeonec, ŋoŋe maripoŋko qapie hâmome Anutuzi hâmockonec bâɋâreme faharewec jukac, ere tâpirire ŋic keci sahac ɋiɋic ejec mai-ŋeŋicko domakac hâcne. 11 Ficbapa ŋic ŋoŋe Jesu e wâtuŋ sâqocne muhuc behepie izi hâcne jâmâ wâtuŋ sâko ewec domakac. 12 Bâbâpiaŋ i ŋic moctao moc mi fokac, â ŋic mocte šâŋe riwaseckehuc bibiaŋkene i wâc mâreŋko mi fokac.”

Ŋicdâŋ reŋkehuc Wofuŋte dâŋ qiqikiŋ i mi eene

13 Eme Petoro â Johane jahe ŋic omane, mamana ficko mi jukicnezi hâhâwic tâmiric micafec jaha dâŋ mupire manarâ wareckembiŋ. Erâ jahe Jesuhec jupic i hone tarac-jofambiŋ, 14 â ŋic sahac ɋiɋic eweczi jaherao domame e wâc honehuc irec dâŋ bâtikie-jacteniŋte basambiŋ. 15 Basarâ ejactepie hae šoŋao hurâ domahapire jaŋackoaŋ šiŋuc muhuc nazaŋ gazaŋ embiŋ: 16 “Nâŋâc ŋic jahe weniŋuc ejactenaŋ? Jahe mâsi bapire fua tâcneme Jerusalem haeoneczi biŋene biac mana-fârembieŋ, irec wemocko hemackezo? 17 Eme dâŋ i hae sâc haŋ bame mana-fârenšipiŋte mu hâhâwic ejactepene ŋic hâcne šâŋe biŋe-ticne mocwâc mi jaza-jâmbâŋkezepirec.” 18 Iŋuc murâ hefârec-jofarâ šiŋuc jasambiŋ: “Ŋohe Jesure šâŋe ŋic mocwâc mi jaza qazuc ejâmbâŋkezepirec.” 19 Mupie Petoro â Johane jahe dâŋ šiŋuc bâtikie-jarepic: “Ŋoŋe ŋaŋac mana honeniŋ, ŋoŋere dâŋ reŋkehuc Anuture dâŋ qiqikiŋ, irec Anutuzi maname sâckeocmu me? 20 Wiac hone manac ehuc jumbeŋ i sâcne mi hesoŋkerâ junaŋmu.” 21 Iŋuc mupire jaŋe mu hâhâwic dâŋ mocwâc jasahuc râec-jofapie rapic. Haeŋic ŋokac omane jaŋe mâsi i hone manac erâ Anutu mucne bacnembiŋte jaŋerao quŋkehuc aposolo jahe wiac mi ejactembiŋ. 22 Ŋic sahac ɋiɋic bakicne e puriŋ fohuc juha jara 40 ewec i mana-fârembiŋ hâcne.

Jesure kikefuŋ jaŋe aposolo jahere erâ Wofuŋ muteŋkembiŋ

23 Petoro â Johane jahe ŋic tutumaŋkonec waharâ âgo wiacfâc-jekic jaŋerao rarâ taha bapa micne â soŋaŋ jaŋe dâŋ jasambiŋ irec mu binaŋ ehuc jaza-fârepic. 24 Eme jaŋe i manarâ maŋjeŋic qâzuckerâ Anuturao sâsepie fehame šiŋuc mumbiŋ: “Wofuŋ sâko Wofuŋ, go sambâŋ â mâreŋ â hâwec i wiac fuŋne fuŋne-jeŋichec râemeŋzi 25 Tiri Mâro ecnetec eki mimiŋne-nâŋec Dawidi, kiŋaŋŋicge hâcne, micne baafeckeme dâŋ šiŋuc muwec:

`Oapuc jaŋe wemocte ju fâfânâŋ eeŋgopieŋ,
â ŋicne ŋicne dâŋ racne birickeeŋgopieŋ?
26 Wofuŋ â Kristo-ticne râsi ejacteniŋte
mâreŋ sâc ŋicwofuŋ jaŋe meo roroc eeŋgopieŋ,
â ŋicbomboŋ jaŋe ââte sanaŋ eeŋgopieŋ.'
27 “Hae kecšira ine jâmbomac tiri Ŋokâge Jesu, Kristo âkendâŋnemeŋ, e râsi ecneniŋte Herode â Pilato jahe ŋic qâpuc jaŋehec â Israe ŋic jaŋehec dâŋ ŋiŋihec embiŋ. 28 Erâ gahacne mezi â miczi mu bâmoc emeŋ irec sâcmac embiŋ. 29 Eme Wofuŋ, ši ine mu hâhâwic dâŋjeŋic hone manac ehuc kiŋaŋŋicfâcge hâbi hejaretec mitige hâhâwicmâc munšepieŋ. 30 Ehapie mege sicnetec sahac ɋiɋic â mâsi fuŋne fuŋne tiri kiŋaŋŋicge Jesu ere erâ fua razejec.” 31 Iŋuc numupie fic, tumaŋnerâ ŋembiŋ, qiriŋ qiriŋ qawec. Ehame Tiri Mârozi maŋjeŋicko fusucmame Anuture dâŋ micafec jaha ŋic jazambiŋ.

Opâ ruac jaŋe maŋ mocjaha erâ jumbiŋ

32 Opâ ruac guru jaŋe maŋ mocjaha ehuc šâšâfic erâ jumbiŋ. Ehuc wiac fojarewec irec nore gore mi muhuc qâqâhâc mocjaha fojarewec. 33 Eme aposolo jaŋe Wofuŋ Jesu hâmockonec faharewec irec biŋedâŋ tâpiri jaha muhuc jumbiŋ. Eme aki anonoc sâkozi sâcjopa-fârerâ fowec. 34 Erâ ŋondeŋ-jeŋicko moczi tac qararacne mi juwec. Jufu gie â mafa wiac-jeŋichec jumbiŋ jaŋe i qikiŋnepie moneŋ kitâcne-jareme 35 aposolo jaŋerao râembiŋ. Eme jaŋe ŋic wiac basapie sâc bârâwiŋnerâ jare jumbieŋ. 36 Eme ŋic moc juwec šâŋene Josefe, aposolo jaŋe šâŋene moc Banaba mumbiŋ, nâŋâcne dâŋko Bâmiriŋmotec, e Lewire ɋâric, Kipiro nucko fuawec. 37 Ŋic eki jufu-ticne qikiŋneme moneŋ fuame aposolo jaŋerao furu jaha râe-fârewec.

Copyright information for `KMG