Acts 6

Sahackopec gie Irec ŋic rowosâec-jopambiŋ

Dameŋ ira opâ ruac guru sâko embiŋte nânâ bârâwiŋne-jarehuc Grië opâ ruac jaŋere hozec bâtiric-jopapie Juda opâ ruac jaŋere manapie mi sâckeme dâŋ bâfuambiŋ. Iŋuc epie aposolo 12 jaŋe opâ ruac hetumaŋ-jopa-fârerâ šiŋuc jazambiŋ: “Nâŋe sahackopec gie i dopeckehuc Anuture dâŋ mumu irec gie behepene wahame mi sâckeocmu. Irec ŋic âgofâc, ŋoŋe ŋic 7 ŋaŋacne ŋondeŋko Mâro â mamanahec jupie honec-jopapie sâckeme rowosâec-jopanšepieŋ. Eme nâŋe gie i mujarepene banšepieŋ. Nâŋe ine nunumu â miti mumu irec gie paŋšâic jaha banšepeneŋ.” Dâŋ iŋuc mupie opâ ruac jaŋe manapie sâcke-fârewec. Ehuc ŋic šiŋuc bâwosâec-jopambiŋ: Stefano, e maŋnao mamanasiŋ â Tiri Mâro fufusuc fowec, erâ Filipo â Porokoro â Nikano â Timoŋ â Pamena â Nikolao, e Antiokia haeonec ŋic qâpuczi Judaŋic jaŋerao šuhuckewec. Eme ŋic i hâcne jaŋe aposolo jaŋere maŋfuŋko birickerâ domapie mejeŋic qizec-jeŋicko râehuc numu jambuŋ ejarembiŋ.

Eme Anuture dâŋzi haŋ bahuc fome Jesure kikefuŋ jaŋerao denaŋne denaŋne šuhuckeme šuhuc erambiŋ. Erâ taha bapa jaŋeraonec wâc bocjahazi miti mana rereŋ embiŋ.

Stefano qorickembiŋ

Stefano e miti â tâpiri bocjaha focnewecte ŋic jaŋerao mâsi fuŋne fuŋne bawec. Eme Hotâonec mujarembiŋ ŋic i jaŋere mitificko tumaŋne jumbieŋ, jaŋeraonec ŋic gâcne â Kirene ŋic â Alesandria ŋic â Kilikia ŋic â Asia ŋic, iŋuczi qâturerâ Stefano mu qatarac ecnembiŋ. 10 Eme e dâŋ mana utuckehuc Mârohec mume jaŋere dâŋzi firorieme eipiecnembiŋ. 11 Eipierâ ŋic qafeŋ-jopapie jaŋe Stefanore šiŋuc mumbiŋ: “Ŋic e Mose â Anutu musoriŋ-jofame manambeŋ.” 12 Iŋuc ehuc ŋic omane â soŋaŋ â miti qaqazu mu âke ɋâfoŋ ejarembiŋ. Erâ Stefano somâckerâ hâporâ micne guru tutumaŋko barambiŋ. 13 Ehuc dâŋ qanaŋ bâmockerâ âgofâc-jeŋic jarepie bajumbiŋ jaŋe ejarepie Stefanore burec ehuc šiŋuc mumbiŋ: “Ŋic e tiri ufuŋ â sâcmutâc dâŋnâŋec surehuc juekac. 14 Nâŋe kecšiŋuc mume manambeŋ: `Jesu Nazarete haeonec eki hâcne ufuŋ ši ima qahuc sâcmutâc dâŋ Mosezi mufua-nârewec i hetâtieocmu. Ž ” 15 Eme tutumaŋko ŋembiŋ ŋic i jaŋe Stefanorao firâ râqârehuc šâŋe maine honepie aŋelo hawari tinac ewec.

Copyright information for `KMG