Colossians 3

Wiac faic fokac irec henširiŋnezo

Ŋoŋe Kristo fafahare-ticnao šuhuckembiŋko ine faic Anuture maŋfuŋko Kristo jukacko wiac fokac, irec henširiŋnehuc junšepieŋ. Mâreŋko wiac fokac irec mâcne, faic wiac fokac irec maŋ mamanasu-ŋeŋic râepie fozejec. Ŋoŋe hâmombiŋ hâcne, eme juju-ŋeŋic Kristohec Anuturao soŋkekicne fokac. Juku Kristo e juju runâŋeczi fua taniŋkeme ŋoŋe iŋuc jaha ehec mâmâc tatamac huririnao fua taniŋkeniŋmu.

Maŋraŋɋa heunucke behec ezo

Wiac kecšiŋucte ine sowa juhuc sahac-ŋeŋic bâhâmonšepieŋ: Boe sau, maŋwânâŋ, bu gâgâpâcne, sasec sâqocne, buchâro, i eocmu e sahac-ticnezi wofuŋ ecnekac muzo. Wiac i sasaware Anuturaonec okacne fisiocmu. Ŋoŋe mârâcko iŋuc jaha wiac i bajupie maŋ fâri-ŋeŋic ejujec. Ʒi ine wiac iŋucne sasawa hetaranšepieŋ. Ehuc aaric, kimbeŋ, râŋgeŋ bârâŋgeŋ, dâŋ gâgâpâcne â simbiŋne i qikiŋnenšepieŋ. Burec eec i wâc mi enšepieŋ. Maŋraŋɋa-ŋeŋic mâsi qâqâreŋ-ticnehec heunucke behec erâ 10 maŋɋâri-ŋeŋic hepie hume rojuŋgopieŋ. Maŋ i hâcne bâbâfuazi bâpiaŋkeme mamanahec erâ e jahacne hawari iŋucne fuahuc jukac. 11 Irec bârâwiŋ juju i tarawec, Grikŋic â Judaŋic, mahec â ma tâmiric, hâwecŋic â kâte sanaŋ, kiŋaŋ qaqa â ŋicbomboŋ, mâmâc sasawa Kristozi qâhâc-nâporâ micne junâre-fâreekac.

Mitio jujure dâŋ

12 Eme Anuture biŋefâc, e jahac maŋjauŋ eŋarehuc rowosâec-ŋopawec, ŋoŋe buuruc â buafec â maŋhuhuŋ â miriŋ â bumâteŋ izi ŋaqi-ŋeŋic eme hepie hume rojunšepieŋ. 13 Ŋoŋe aakic enšepieŋ, â ŋondeŋ-ŋeŋicko dâŋ fuame kiŋ bebehec enšepieŋ. Wofuŋzi kiŋ behe-ŋarewec iŋuc jaha eec enšepieŋ. 14 Eme wiac sasawa irec fainao maŋjauŋ bajupie izi wiac bâture-fârehuc ematauckezejec. 15 Erâ Kristore wamazi maŋŋeŋicko guriŋne bazejec. Ŋoŋe wamahec erâ me sahac mocjahao juniŋte rocŋopakicne hâcne. Erâ wâc daŋge mumuteŋ ehuc junšepieŋ. 16 Kristore dâŋzi ŋondeŋ-ŋeŋicko sawe mâririackezejec. Eme maŋɋârâŋ dâŋ fuŋne fuŋne qaqazuc ehuc faŋ qaqac enšepieŋ. Erâ miti gae mânec i Mârozi baafec-ŋopaha maŋŋeŋiczi Anutu muteŋkehuc hecnenšepieŋ. 17 Eme maŋzi me mezi wiac ezo murâ i Wofuŋ Jesu manasiŋkehuc enšepieŋ, ehuc ere erâ Anutu Mamac daŋge âzâcnenšepieŋ.

Ŋowe ŋonâŋ, neŋgoc mamac, kiŋaŋ qaqa, ŋicbomboŋ

(Efe 5: 22 ­ 6: 9)

18 Ŋokac ŋoŋe ŋowefâc-ŋeŋic jaŋere rereŋfâc junšepieŋ, Wofuŋte biŋe ekicnezi iŋuc epie sâckeocmu. 19 Ŋic ŋoŋe ŋonâŋfâc-ŋeŋic maŋjauŋ ejarenšepieŋ, šâšâicne ine mi ejarenšepieŋ. 20 Naru motec ŋoŋe neŋgoc mamacfâc-ŋeŋic dâŋ mupie sâc reŋkenšepieŋ, iŋuc epie Wofuŋzi maname biaŋkeocmu. 21 Mamac ŋoŋe naru motecfâc-ŋeŋic hâwic sahac enšipiŋte aaricko wiac mi ejarenšepieŋ. 22 Kiŋaŋ qaqa ŋoŋe mâreŋ ŋicbomboŋfâc-ŋeŋic jaŋere mic reŋke-fârenšepieŋ, maizi qambaraŋ ejarepie ŋiczi sawa honec-ŋopapie sâckeocte mâcne, maŋsiocmâc Wofuŋ araŋ bacnehuc epie sâckeomu. 23 Gie-ŋeŋic sasawa i ŋic jaŋere erâ mâcne, Wofuŋte erâ aafec faio banšepieŋ. 24 Kecšiŋuc manahuc: Gie furi sambâŋko merâfâc fokac i Wofuŋtaonec roniŋmu. Irec Wofuŋ Kristo ere kiŋaŋ qaqafâc juŋgopieŋ hâcne. 25 Moc e gie-ticne bâsâqoreocmu, e irec okacne jaha roocmu. Wofuŋtao ra rowec ware rowec mi fokac.

Copyright information for `KMG