Ephesians 2

Mârâc jaha juju kosa jukicne

Ŋoŋe mârâc jaha sindaŋ hârindaŋ ehuc hâmocne jujumbieŋ. Ine mâreŋte juju hata maŋnao juhuc saware tâpiri irec ŋicbomboŋ erao qohota jumbieŋ. Ere mârozi hâcne dameŋ šiŋuczia wâc qaqatara ŋic jaŋerao gie baekac. Nâŋâc mârâc jaha jaŋere sâc jaha jufârehuc maŋraŋɋa-nâŋecte aŋac bâjâpembeŋ. Ehuc sahac-nâŋecte â maŋ mamanasu-nâŋecte dâŋ reŋkehuc gâcne jaŋe iŋucne kimbeŋte biŋefâc embeŋ.

Anutuzi bâɋârec-nâporâ sambâŋte jujuo râec-nâpowec

Anutu eki buuruc-ticne bocjaha fokacte maŋjauŋ kâcɋene enârehuc qaqatara-nâŋecte erâ hâmokicne nâŋâc Kristohec mâmâc bâɋârec-nâpowec. Manaŋgopieŋ, katucmâc-ticnere erâ bâpiaŋ-ŋopawec ŋoŋe. E Kristo Jesuhec bâɋârec-nâporâ ehec mâmâc sambâŋte jujuo ŋec-nâpowec hâcne. i nacnere mocko šiŋuc fuaocte ewec: Aki anonoc-ticnere rowaŋ sâko i Kristo Jesuo maŋuruc qanârehuc qaratie-nâreocmu. Manaŋgopieŋ, e aki anonoc eŋarehuc mamanasiŋ-ŋeŋicte erâ bâpiaŋ-ŋopawec, i ŋaŋacnere mâcne, Anutu buafec-ticnere iŋuc eŋarewec. Mo gie mo bambiŋte iŋuc eŋarezac, i aricne. Irec sahac mumuteŋ moc mi fuazejec. 10 Nâŋâc Anuture metofafâc, eki Kristo Jesuo bâfuac-nâpowec hâcne, erâ hata biaŋne Anutuzi hâcne mušâwe-nârewec i âtehuc junaŋte munârewec.

Kâteoneczi haeo fisikicne

11 Ŋoŋe mârâc jaha qâpuc jujumbieŋ, irec manasuhuc junšepieŋ. Eme dameŋ ira ma tâmiric juhapie Judaŋic jaŋe sahac-jeŋicko maheczi šâgu muŋare jumbieŋ. 12 Dameŋ ira Kristo tâmiric jumbiŋ, erâ Israe ŋic jaŋe hae fâri juhapie ŋoŋe mafa jumbiŋ, â jaŋe fuŋfuŋfâc-ticne bacjopame biŋedâŋ-ticne bajuhapie ŋoŋe šoŋifecfâc-ticne erâ metariŋ jumbiŋ, erâ maŋzi wiac fârine moc mi worickehuc Anutu tâmiric hâcne jumbiŋ. 13 Dameŋ šiŋuczia ine ŋoŋe kâteo jumbiŋzi Kristo Jesurao šuhuckehuc Kristo socticnere erâ haeo fisimbiŋ jueŋgopieŋ.

Jesuzi rârâsi qame wahame maŋ mocjaha embeŋ

14 E jahac wama-nâŋec juekac. E ŋic jâcne jajahec ŋondeŋ-jekicko rârâsizi aka sanaŋ fowec i qâropiehuc, mocjaha bacjofawec. 15 Ine sâcmutâc dâŋqâhâcko bâtâc â mumuac bocjaha mukicne i e jahacne sahac qaisockehuc bârâriewec. Ehuc ŋic jâcne jajahec jahere dodoma tacko ŋic ɋâricne mocjaha ine e jahac fuarâ domahuc wama bâfuawec. 16 E maripoŋlo hâmowecko ŋic jâcne jajahec fâri ombâŋ mocjahao qâturec-nâpohuc Anutuhec miriŋ bacnâpowec, ehuc rârâsi qame wahawec. 17 Erâ fisirâ kâteo jukicne ŋoŋe â haeo jukicne nâŋe mâmâc wamare biŋedâŋ nâzâme manambeŋ. 18 Erâ wâc hata bâšâwe-nârewecte nâŋâc Mâro mocjaha rauckerâ Mamactao fisieŋgopeneŋ.

Ŋiczi Wofuŋte ufuŋ enaŋte mukicne

19 Eme irec dameŋ šiŋuczia mafa â jaba mocwâc mi jueŋgopieŋ, ŋoŋe mitiŋic gâcne jaŋehec hae fâri â Anuture kikefuŋfâc embiŋ juŋgopieŋ. 20 Ŋoŋe aposolo â porofete jaŋe wâtuŋ ŋokacne ehuc decŋopapie doma raŋgopieŋ, â Jesu Kristozi wâtuŋ ŋicne ekac. 21 Erao ŋicne ŋicne šuhucke itic epene Wofuŋte furu ufuŋ fua feekac. 22 Mârozi ŋoŋe iŋuc jaha erao râe šuhuc eŋareme Anuture fic eŋgopieŋ hâcne.

Copyright information for `KMG