Ephesians 3

Wofuŋzi dâŋ soŋne fowarewec i Paulo mufuacnewec

Eme Paulo no irec hâcne qâpuc ŋoŋere erâ Kristo Jesure kâpâcwâru ŋic epo jukopac. Ŋoŋe nore manambiŋ, Anutuzi uruc jauŋ-ticnere erâ ŋoŋerao miti gie bapemurâ munarewec. Munarehuc dâŋ soŋne mufua-narewec, dâŋ i hâcne biac bembeŋne qâreŋkepac, ŋoŋe i wosehuc, no Kristore dâŋ soŋne maŋzi hone raruŋkekopac iŋuc sâcne mananiŋmu. Dâŋ soŋne i mârâc jaha ŋic juwarembiŋ jaŋerao mi mufuakicne, tiri aposolo â porofete nâŋerao šâhec Mârozi mufuawec. Dâŋ soŋne kecšiŋuc: Biŋebiaŋte fârine qâpuc ŋoŋe Judaŋic nâŋehec sâc mocjaha â guru mocjaha erâ Kristo Jesurao biŋedâŋ deŋkewec i mâmâc rauckerâ bajuniŋte mukicne. Eme Biŋebiaŋ irec kiŋaŋ qaqa jupemurâ Anutuzi uruc jauŋ-ticnere erâ tâpiri sâko-ticnere fuŋne norao bataniŋkewec.

Dâŋ soŋnere fârine Jesuzi bâfuawec

Kristorao mâriri sâko fofone fokac irec dâŋ soŋne qâpuc mutaniŋke-jarepemurâ irec gie biaŋ mitiŋic wawahane jâmbâŋ no hâcne munarekicne. Dâŋ soŋne muraruŋkepere mukicne, i Anutu bapafâre e maŋbuc-ticnere dameŋne dameŋne baju warehuc juwec. 10 Ʒi ine Anutuzi kikefuŋ gurufâc-ticne nâŋâcnao maŋɋârâŋ-ticnere fârine qaratiekume qâreŋne fuŋne fuŋne fuame sambâŋko ira fekicne â tâpirihec jaŋe wâc hone šâŋitac eeŋgopieŋ. 11 Anutu e mârâc jaha dameŋ tâmiricko maŋnezi dâŋ mupaŋkewec irec fârine hâcne Wofuŋ-nâŋec Kristo Jesu sorehuc bâfuawec. 12 Eme eki hâcne hata bâšâwe-nâreme e manasiŋkehuc hâhâwic tâmiric Anutu maickeeŋgopeneŋ. 13 Irec šiŋuc ŋazape mananiŋ: No ŋoŋere erâ fific guguriŋ faio jupe irec maŋŋeŋic mi wahazejec, aricne, ŋoŋe irec manapie eri qoqonaŋ-ŋeŋic ezejec.

Paulozi Efeso ŋic jaŋere numuwec

14 Irec hâcne sambâŋko â mâreŋko ŋic guru sâc jueŋgopeneŋ 15 nâŋâcne Mamac fârine e dieŋzi hecnehuc ŋoŋere erâ numucnehuc šiŋuc muekopac: 16 Anutu e hahaŋnehec sâkozi Mâro ecneme tâpiri bâfua-ŋareme maŋŋeŋiczi soka sanaŋ ezejec. 17 Eme Kristo manasiŋkepie maŋŋeŋicko ŋeŋe juju ezejec. Eme ere maŋjauŋko gâtâ barâ qiŋ herâ domanšepieŋ. 18 Ehuc mitiŋic gâcne sasawa jaŋehec mâmâc mitire fuŋne botâŋne, hâŋne otecne. i afeckerâ mana taranšepieŋ, 19 erâ wâc Kristore maŋjauŋ, ŋic mamana jâuru-fâreekac, i sifu mana-hâmonšepieŋ. Ehame Anuturao maŋ mâriri fufusuc fokac izi bâfusec-ŋopazejec.

Mumuteŋ dâŋ

20 Tâpiri-ticnere fuŋne nâŋâcnao bataniŋkeekac Anutu hâcne, e wiac bapa-ticnezi nunumu-nâŋec â mamanasu-nâŋec siricke-fâreekacte 21 kikefuŋko â Kristo Jesurao mumuteŋ-ticne mimiŋzi ɋâric šuhuckeme šuhuc fofehuc juzejec sanaŋ. Jâmbomac.

Copyright information for `KMG