Galatians 6

Dodopec â babafic ezo

Âgofâc-nane, ŋic moczi dockerâ bahac bâfuame ŋoŋe Mâroheczi bumâteŋ erâ iŋucne mu bâtiŋ ecnenšepieŋ. Ehuc go gahac eesâicko pârâckezicte rucge bazemec. Wiac kihuhuŋ-ŋopaekac i nowac gowacroŋ ehuc babaficko banšepieŋ. Iŋuc ehuc Kristore sâcmutâc dâŋ sâcne reŋkeniŋmu. Ŋic moc e wiac fârine moc mi ehuc e jahacnere maname fefene eocmu, iŋucnezi maŋticne fagac ecnekac muzo. Irec moc e jahacne juju bapa hone šâŋitac ezejec. Eme šeridâŋ i e jahacnere erâ fuaocmu, ŋic mocte erâ mâcne. Giere ŋemâc kâdoc qakicne i ru sâc areckezo. Miti ŋaza qazuc eeŋgopieŋ ŋic i jaŋe wiac fuŋne fuŋne boki bahuc jare gumec enšepieŋ.

Juku ee bapa-nâŋecte fârine ronaŋmu

Anutu mu qâtimbuc ecnepie mâc foocmu, iŋuc moc mupie. I aricne jâmbâŋ, ŋic moc gie baocmu e irec fârine juku ijaha roocmu. Moc e maŋraŋɋare gie baocmu, e juku maŋraŋɋa-ticnere fârine sisipiric bâfuaocmu, â moc e Mârore gie baocmu, e juku Mârore fârine juju sanaŋ bâfuaocmu. Wiac biaŋne i rorokac tâmiric enšepeneŋ, eme mi betaŋkenaŋmuo juku dameŋ-ticnao mâriri bâfuanaŋmu. 10 Irec dameŋ-nâŋec fohame ŋic sasawa ehâmo-jarenšepeneŋ. Ehuc mitio âgofâc-nâŋec wiac bafehuc ejarenšepeneŋ.

Sawaŋ â jambuŋdâŋ

11 Ŋoŋe qâreŋ sâko ši honeniŋ, no nahacne mezi qâreŋke-ŋarekopac. 12 Ŋic gâcne jaŋe sahaczi miti hawari biaŋ erâ ŋoŋe sahacko mahec eniŋte fotarie-ŋareeŋgopieŋ jaŋe Kristo maripoŋ-ticnere erâ fific guguriŋ faio fenšipiŋte iŋuc hâcne eeŋgopieŋ. 13 Sahacko mahec embiŋ ŋic i jaŋe jaŋac wâc sâcmutâc dâŋ mi reŋkeeŋgopieŋ. Jaŋe mâc ŋoŋe mahec erâ jaŋerao šuhuckepie sahac-jeŋic muteŋkeniŋte manasueŋgopieŋ. 14 No ine wiac irec mi Irec mâcne, Wofuŋ-nâŋec Jesu Kristo maripoŋ-ticnere biŋedâŋ irec mocjaha mumuteŋ bajuekopac. Ere erâ mâreŋkonec wiaczi maripoŋko hâmo-narewec, â no iŋuc jaha maripoŋko mâreŋkonec wiac hâmocnepo. 15 Sahacko mahec juju me ma tâmiric juju izi fârine aricne, juju ɋâricne izi mocjaha fârine ekac. 16 Gaŋ rukec ira hâcne domaeŋgopieŋ sâc ŋoŋerao wama â buuruc fotâcnerâ fozejec, erâ Anuture Israe ŋic jaŋerao mâmâc.

17 Ʒi moczi moc neneŋ gie mocwâc mi narezejec. No Wofuŋ Jesure râfu qâreŋ sahac-naneo fome bajuekopac. 18 Âgofâc-nane, Wofuŋ-nâŋec Jesu Kristore aki anonoczi maŋŋeŋicko fozejec. Jâmbomac.

Copyright information for `KMG