Hebrews 6

Anutu behe sanaŋkerâ maŋ bâbârisie mi fokac

Irec nâŋâc ši Kristore dâŋ maine, fufuŋkeo mumune, i râepene foha dâŋ hukicne, wiac efehuc mumune, i moc šuhuckenaŋ. Wemocte miti hobeteŋne i hâsine râehuc maŋ bâbârisie â juju raŋɋa bebehe â Anutu mamanasiŋ, â Miti Opâ â qizecko me rârâe â hâmockonec fafahare â bâtâc sanaŋ irec dâŋ mocwâc fuŋkezo? Anutuzi maname sâckeme dâŋ moc šuhuckenaŋ.

Ŋic mitizi maŋjeŋic batamaeme sambâŋkonec nânâ nâhonembiŋ â Tiri Mârohec embiŋ, erâ Anuture dâŋbiaŋ â juju sanaŋte tâpiri mana aŋac embiŋ, ŋic iŋucne jaŋe miti behe sanaŋkehuc Anuture Ŋokâ jaŋacne maŋte mocwâc maripoŋko qahuc mamakâc ecnepie mitio bâbârisiec-jopane mi fokac. Mâreŋ moc hoezi gâbâ hehuc bâgunuckekume, ŋic sara mamac eeŋgopieŋ jaŋere biŋe nânâ monšaŋ bâfuaekac, i Anutu jambuŋ-ticnere fârine fuacneekac. Á mâreŋ mocko hofâ qinšiŋ sawa fuaocmu, ine fârimâc ekacte sâwec fâreme juku šoczi šaocmu.

Ɋicwânšâŋ erâ juju

Âgofâc, no dâŋ mukopac i ŋoŋe sipirickeniŋmu manahuc mâcne, mitio biaŋke-hâmoniŋmu, iŋuc manahuc mukopac. 10 Anutu e eesifucne mâcne” ŋoŋe ere erâ ŋicfâc-ticne hone bafic ejarehuc jauŋ bacjopambiŋ erâ eeŋgopieŋ jaha irec wemocko nikeckeocmu. 11 Ŋoŋe šiŋuc eniŋte enârekac: ŋoŋe mâmâc sasawa sâc ijaha ɋicwânšâŋ epie sambâŋ šeŋaŋ bâbâfuare buâkec mi omaezejec, fofehame dameŋ tarazejec. 12 Eme mi rokawehuc, mitiŋic gâcne mamanasiŋ â sasanaŋhec juhuc wiac biŋec-nâpokicne rauckeeŋgopieŋ, jaŋere hata âteniŋmu.

Biŋe qanârekicnezi juju-nâŋecte aŋga ekac

13 Jaŋeraonec moc Abraham e Anutuzi biŋedâŋ âzâcnerâ femicne mocte maio mupaŋkeocte basarâ e jahacnao râehuc mupaŋkewec. 14 Ehuc šiŋuc muwec: “No jambuŋgurâ jambuŋgu epemu â basawecgurâ basawecgu epemu.” 15 Eme Abraham e mumupaŋ dâŋ irec woŋec tatakic tâmiriŋ juku fârine rowec. 16 Ŋiczi fekicne moc ere maio mumupaŋ dâŋ mupene mu qaqatarac eene mi fuaocmu. 17 Irec Anutu e ŋic biŋe qajareme maŋjahec enšipiŋte, maŋticnezi sanaŋkeha muwec irec fuŋne bataniŋkehuc biŋedâŋ irec fainao mumupaŋ dâŋ šuhuckewec. 18 Anutu e burec tâmiriczi dâŋsanaŋ jajahec âkendâŋ-jofahuc nâŋâcnao suru râewec, i ere dapeŋko rašimbeŋzi wiac biŋe qanârekicne irec fârine fotarierâ ronaŋte manasuhuc ewec. 19 Biŋe qanârekicne irec fârinezi juju-nâŋecte aŋga sanaŋne â tâtâcne tâmiric iŋucne ekac, erâ aŋga izi faic qoruc ââketâc irec râpenao râekicne fokac. 20 Ââketâc i micne bapa-nâŋec Jesu eki bânie-nârehuc fotâcnerâ maŋnao rašiwec. E Melikisede ere sâcko taha bapa erâ jusanaŋkeekaczi iŋuc ewec hâcne.

Copyright information for `KMG