James 3

Nameŋ-nâŋec soŋaŋkenšepeneŋ

Âgofâc-nane, ŋoŋe bocjahazi qaqazu gie baniŋte mi fotarienšepieŋ. Manaŋgopieŋ, mumutara dameŋko Wofuŋzi qaqazu nâŋe wiac bašihuc enâreocmu. Nâŋâc mâmâc sasawa wiac gâbâ esifuckeeŋgopeneŋ. Ŋic moc e dâŋko moc mi sâqoreocmu, e ŋic saric sarahaŋne mucnezo. Iŋucnezi me sahac-ticne sasawa guriŋne sâcne bafâreocmu. Becâsic jaŋe dâŋnâŋec reŋkeniŋte micko kiki râe-jareeŋgopeneŋ. Erâ izi becsâko bac bâtikic ejareeŋgopeneŋ. Wokere wâc manaeŋgopeneŋ, jaŋe kâcɋene sâko, erâ mâŋâŋ sanaŋnezi ficne suec-jopame raeŋgopieŋ, eme sifu guriŋ bapa e guriŋ piticne i bac bâtikic ehuc hata muocmu ijaha wokezi raocmu. Eme ŋicnameŋ e iŋuc jaha wiac piticne, erâ wiac wemo afecne efeekac. Manaŋgopieŋ, šoc masisi i wiac huŋgaŋne mac, eme iŋucne maczi sopâc sâko rikepene šafâreekac.

Nameŋzi sisipiric eeŋgopeneŋ

Eme nameŋ-nâŋec šoc masisi iŋucnea wâc. Eki hâcne me sahac gâcne siric-jopahuc sâqocnere neŋgocne eekaczi sahac-nâŋec bâbie-fâreekac â juju-nâŋecte ŋesiŋ rikeme šafâreekac” e jahacne ine hârâckonec šoczi qâhâsâme šaekac. Qowi fuŋne fuŋne tiŋkonec â hâweckonec erâ wipe homa wiac i ŋiczi bâmâteŋkezo murâ bâmâteŋkeeŋgopeneŋ. Nameŋ ine mo ŋic mozi bâmâteŋkeocmu? E gapec tâmiric ririsiehuc sâqocne baekac, qotâre micopâzi fusucmakicne tinac. Nameŋ-nâŋeczi Wofuŋ Mamac muteŋkeeŋgopeneŋ, erâ nameŋzia ŋic Anuture hawarifâc sâwec-jopaeŋgopeneŋ. 10 Mic ijaha mumuteŋ â sâwec wahaekac. Âgofâc-nane, iŋuc wemocte? 11 Opâ šâŋe ijaha nocne â hâtâne ataŋ wahaekac me? 12 Âgofâc, hâmeŋko woraŋ fuaocmu? Me saŋko hâmeŋ fuaocmu? Me hâweczi nocne eocmu?

Mamana hata faicnec â juwicnec

13 Ŋoŋerao maŋɋârâŋhec â maŋ manahuc wiac ee iŋucne moc juŋgopieŋ me? Ine wama ruaine juhuc eebapa biaŋne bâfuahuc maŋɋârâŋ-jeŋicte fuŋne bataniŋkenšepieŋ. 14 Á maŋjeŋicko iiŋguuŋ hâtâne â hehefaric fohame ine sahac-jeŋic bafehuc dâŋfâri manaŋgopeneŋ mupie burec eocmu. 15 Maŋɋârâŋ hata iŋucne i faicnec wahakicne mi muzo, aricne, mâŋɋârâŋ hata iŋucne i mâreŋkonec, ŋickonec, Sataŋtaonec. 16 Iiŋguuŋ â hehefaric foocmu ijaha wâc fâfâuc â wiac gâgâpâcne gâcne gâcne fofâreocmu. 17 Maŋɋârâŋ hata faicnec izi ine wiac šiŋuc bâfuaekac: Qanaŋ maŋɋaɋac, erâ wama, miriŋ, micrereŋ, uruc jauŋhec juju â mitire fârine gâcne, erâ wâc maŋguru tâmiric â siocmâc juju. 18 Wamare guriŋne baeŋgopieŋ jaŋe wamao ukicne sara mamac epie fârine tiŋne juju fua-jareekac.

Copyright information for `KMG