James 5

Ŋic moneŋ mafa sasec jaŋere dâŋ

Ajoc, mafa mâririhec ŋoŋe šârâ hâriŋ fua-ŋareocmu irec qanaŋ ki mamakuc enšepieŋ. Mafa mâriri-ŋeŋic i šaŋke-fârewec, ŋaqi guru dindiŋ-ŋeŋic mâreŋte temane ewec, â moneŋ boreŋ-ŋeŋic gufewec, eme gufe izi ŋaŋacne fuŋne bataniŋkehuc sahac-ŋeŋic šoc iŋucne nâmizieocmu. Ŋoŋe dameŋ qândâŋkeha mafa sesuc sembureŋ hefembiŋ. Manaŋgopieŋ, padi qaŋarepie gie furi sakare-jarembiŋ irec kiŋzi hohosâcne qakac, erâ qa roro ŋic jaŋere kio wâwâsiczi sambâŋ momori jaŋere Wofuŋte hazecko huwec. Ŋoŋe mâreŋko wiac nâminširiŋkehuc mana aŋac embiŋ â okac dameŋ maickeha nâ areŋ embiŋ. Ŋoŋe ŋic tiŋne dâŋne mutararâ šikao râembiŋ. E sahac-ticne mi ŋezickekac.

Ʒârâ šâpâ faio hâbi hâro juzo

Âgofâc-nane, ŋoŋe Wofuŋ fisiocte woŋec tatakic tâmiric junšepieŋ. Manaŋgopieŋ, gie rune moczi iŋuc jaha nânâ he sarac erâ fârine fua biaŋ eocte woŋec juekac, ehuc hoe šoaŋ sâckoa bacneme fua sokac eocte mamanac juekac. Eme Wofuŋte dameŋ bembeŋkekacte ŋoŋe iŋuc jaha tatakic tâmiric woŋec juhuc maŋŋeŋic keteŋnenšepieŋ. Âgo bureŋ, ŋoŋe mu takic mi eec enšepieŋ” manaŋgopieŋ mumutara ŋic e motâc râpeo domakac, fuŋne-ŋeŋic rituzacte dâŋ ere biŋe râepie fozejec. 10 Âgofâc-nane, porofete Wofuŋte micte dâŋ mumbiŋzi šâic busâqoc tatakic tâmiric manahuc jumbiŋ jaŋere kike hata bâjâpehuc junšepieŋ. 11 Manaŋgopieŋ, šâicmaŋko sasanaŋhec jumbiŋ jaŋere manapene šerine ekac. Hiobe sasanaŋ-ticnere manaeŋgopieŋ, â Wofuŋzi šâhec wiac afusecnewec i wâc manaeŋgopieŋ. Wofuŋ e buuruc â jauŋ-ticne kâcɋene fokac hâcne.

Mumupaŋte dâŋ

12 Âgofâc-nane dâŋ fârine moc ši: ŋoŋe sambâŋko ɋetickehuc mumupaŋ, me mâreŋko ɋetickehuc mumupaŋ, me wiac mocko ɋetickehuc mumupaŋ, i mi enšepieŋ. Ŋoŋe dâŋŋeŋic jâmbomacte fârine jâmbomac ezejec â aricnere fârine aricne jaha ezejec. I kiŋ bâfuanšipiŋte iŋuc enšepieŋ.

Hucko fohuc wiac ezo

13 Ŋoŋeraonec moczi šâic busâqocko juocmu, e Anutu numucnezejec, me moczi bubiaŋko juocmu, e mumuteŋ gae hezejec. 14 Ŋoŋeraonec moczi huc foocmu, e kikefuŋte micne bapa hefârec-jopame fisirâ ere faio numunšepieŋ, erâ Wofuŋte šâŋe muhuc wokemaŋ opâ ruacnenšepieŋ. 15 Eme mamanasiŋko nunumu mukicne izi huchec bâpiaŋkeocmu â Wofuŋzi e ɋiɋicne baocmu. Á sâqocne bawecko i bâtâmirecneocmu. 16 Irec ŋoŋe ɋiɋic qaniŋte sâqocne mumufuac erâ nunumuzi dodopec enšepieŋ. Ŋic tiŋne moczi numume tâpirinehec eocmu. 17 Elia e ŋic jaha, nâŋâc iŋucne. Eme eki hoe mi heocte samarierâ numume mâreŋko jara jahec â moc â mosa 6 hoe mi hehe mâc fowec. 18 Eme šâhec mocwâc numume sambâŋkonec hoe wahame mâreŋko wiac ukicne âkešuwec.

Qâsoriekicne bârisiec-jopazo

19 Âgofâc-nane, ŋoŋeraonec moc e dâŋfârire hata qâsorieme âgo moczi bâtikieocmu, 20 e dâŋ šiŋuc manazejec: Moc e âgo-ticne hata sâqocnaonec bârisieocmuzi e jahacne maŋ qâqâtâc hâmockonec bataraocmu â sâqocne guru sâko sâockeocmu.

Copyright information for `KMG