John 4

Jesu e Samaria mâreŋkonec ŋokac moc dâŋ âzâcnewec

Farisaio jaŋe Jesure šiŋuc manambiŋ: “Eki motec rocjoparâ opâ rua-jareekac, i Johanere gurufâc jowaruŋgopieŋ.” Dâŋ i mâc mumbiŋ, Jesu e jahac ŋic opâ mi rua-jarewec, motec jaŋe mume rua-jarembiŋ. Eme Wofuŋzi dâŋ iŋucne manarâ Judaia mâreŋ beherâ Galilaia mâreŋko risie rawec. Rahuc Samaria mâreŋ fotâcnewec. Fotâcnehuc Samariare hae moc šâŋene Sika ira fisiwec. Hae i Jakobozi ŋokâ-ticne Josefe mâreŋ qikiŋnecnewec irec mendâŋko ŋewec. Eme ijaha Jakobore opâ nombâŋ fowec wâc. Eme Jesu e ira guŋpiticko fisirâ betaŋkerâ nombâŋmecko waha ŋemanawec.

Ŋehame Samaria ŋokac moczi opâ fiaocte fisiwec. Fisime Jesuzi šiŋuc âzâcnewec: “Go opâ moc gumecnuc.” Motecfâcne jaŋe nânâ furine baniŋte haeo fehapie Jesu buc ŋehuc ŋokac opâre âzâcnewec. Âzâcneme ŋokac e muwec, “Go Judaŋiczi weniŋuc erâ Samaria ŋokac norao opâre mukic?” Judaŋic â Samaria ŋic jaŋe bâtâcko jujumbieŋte ŋokac e iŋuc muwec. 10 Eme Jesuzi šiŋuc âzâcnewec: “Go Anutu jauŋ-ticnere fuŋne â opâre gazakopac nore fuŋne mâmâc kâuc bakic. Mana tararâ muzac numu-naretec opâ fifisine garezapo.” 11 Mume ŋokaczi šiŋuc âzâcnewec: “Bomboŋ, opâ nombâŋ i šoricne, erâ go opâ fifiage aricnere opâ fifisine wenirec fiacmu? 12 Mimiŋne-nâŋec Jakobo e opâ nombâŋ ši rowec. Erâ e jahacne â ŋokâfâcne â lama bulimakaofâc-ticne jaŋe opâ ši jaha nâhuc jumbiŋ. Goki Jakobore sâc i jâuruhuc opâ moc bâfuacmu?” 13 Iŋuc mume Jesuzi šiŋuc âzâcnewec: “Opâ ši gapecne tâmiric, irec i hati nârâ nâ ehuc juzo, 14 â nore opâ ine gapecnehec, moc e i nâocmu, e opâre mocwâc mi hâmohuc mâc jurašihuc juocmu. Noni opâ i ŋic moc râcnepe maŋticnao opâ šâŋe bâfuacneme juju sanaŋte šâkâŋko rahuc domaocmu.” 15 Mume ŋokaczi šiŋuc muwec: “Bomboŋ, go opâ i naretec nârâ opâre mocwâc mi hâmozepac, ehuc šira gâbâ ware fiahuc domaekopac i behezepac.”

16 Iŋuc mume Jesuzi šiŋuc âzâcnewec: “Ra ŋowege jowatec warenic.” 17 Eme ŋokaczi muwec, “No ŋowe-nane aricne.” Mume Jesuzi muwec, “Go ŋowege aricne, i sâcne mukomec” 18 go ŋic memoc ba behec ejaremeŋ, â šiŋuczia bakomec e gore ŋowe aricne, irec go dâŋ jâmbomac mukomec.” 19 Mume ŋokaczi šiŋuc âzâcnewec: “ŋicbomboŋ-nane, no miŋecne manakopac, go porofete. 20 Irec mutec manape: Kâcɋenefâc-nâŋec jaŋe tiki kecšira Anutu mai ecne jumbieŋ, â Judaŋic ŋoŋe ine Jerusalem haeoa Anutu mai ecnezo, iŋuc mueŋgopieŋ.” 21 Eme Jesuzi šiŋuc muwec: “Ŋokac, no gazape manac: Dameŋ moc bembeŋkekac, i maickeme ŋoŋe Mamac mai ecneniŋmu i tiki kecšira mâcne â Jerusalem haeo wâc mi eniŋmu. 22 Ŋoŋe kâuc bahuc mai ecneeŋgopieŋ, nâŋe ine mana tarahuc mai ecneeŋgopeneŋ. Bâbâpiaŋ i Judaŋic nâŋeraonec. 23 Dameŋ moc maickeocmu erâ ši biac maickekac hâcne, ira kikefuŋfâc-ticne fârine jaŋe maŋzi â dâŋ fâri qizecnere sâcko Mamac mai ecneniŋmu. Mamac e ŋic iŋucne jaŋere ecneekac. 24 Anutu e Mâro fuŋgâtâne, irec e mai ecneeŋgopieŋ ŋoŋe Mâro â dâŋ fâri qizec jahere ŋesiŋko mai ecnenšepieŋ.” 25 Mume ŋokaczi šiŋuc âzâcnewec: “No manakopac, Mesia fuaocte mukicne, šâŋene moc Kristo, eki fuarâ wiac sasawa mu bataniŋ enâreocmu.” 26 Eme Jesuzi âzâcnewec: “Dâŋ gazakopac, no hâcne ši.”

27 Iŋuc muhame motecfâcne fisimbiŋ. Fisirâ ŋokachec muc manac ewec irec wareckembiŋ. Erâ wemo wiacte dâŋ âzâcnekomec, me weniŋucte âzâcnekomec, iŋuc muhuc wiocneniŋte manapie quŋkeme behembiŋ. 28 Eme ŋokac e opâ râqâc-ticne beherâ haeo gasacke rarâ ŋic šiŋuc jazawec: 29 “Ŋoŋe warerâ ŋic moc honeniŋ, eki epo bapo irec dâŋ mutaniŋke-nare-fârekac. E Kristo wiac moc?” 30 Eme haeonec waharâ Jesurao fisi-fârembiŋ.

31 Eme motec jaŋe šiŋuc âzâcnembiŋ: “Qaqazu, nânâ nâc.” 32 Mupie jazawec, “Nânâ fuŋmoc fonarekac, i ŋoŋe mi manaŋgopieŋ.” 33 Iŋuc mume motec jaŋackoaŋ nazaŋ gazaŋ erâ mumbiŋ: “Moczi moc nânâ bafisirâ râcnembieŋ me?” 34 Mupie muwec, “Sorecnuwec ere mic reŋkehuc gie-ticne baku babatara izi nânâ-nane ekac. 35 Ŋaŋac šiŋuc mueŋgopieŋ: `Mosa 4 tarame nânâ fârine fuaocmu. Ž Á noni ine ŋazape mananiŋ: Ŋoŋe qâhâŋnerâ šâŋe fihuc gie honeniŋ, nânâ fârine fufua dameŋ šine hâcne maickekac. 36 Ro qânusuc gie baocmuzi furine roocmu, â fârinezi ju ju sanaŋte biŋe eocmu. Eme he sarac ewec â fârine rome fewec jahe mâmâc babafic erâ šeri enicmu. 37 Ehame dâŋ kecši sanaŋkeocmu: `Moczi he sarac eekac, â moczi fârine rome feekac. Ž 38 Noni ŋoŋe he sarac mi embiŋko fârine ropie feocte sorec-ŋopakopac. Gie i gâcnezi bapie fuawec eme ŋoŋe mâc rauckeŋgopieŋ.”

39 Eme Samaria ŋokac e haefâc-ticne šiŋuc jazawec: “Wiac epo bapo i mutaniŋke-nare-fârejec.” Eme dâŋ irec bocjahazi Jesu manasiŋkembiŋ. 40 Irec Jesurao fisirâ jaŋehec juocte hefârembiŋ. Eme Jesuzi mana-jarerâ šoaŋ gie bapa jajahec jaŋere haeo juwec. 41 Eme miti jazame bocjaha jâmbâŋzi mana šakiembiŋ. 42 Ehuc ŋokac šiŋuc âzâcnembiŋ: “Qanaŋ gore dâŋ binaŋte erâ manasiŋkembeneŋ, ši ine nâŋe nâŋâc micticnaonec dâŋ manarâ šiŋuc manapaŋkeŋgopeneŋ: Eki jâmbomac mâreŋ sâc ŋic nâŋâcne Bâbâpiaŋ.”

Jesuzi motec moc hucticne bâniniŋkewec

43 Eme Jesu e jaŋehec gie bapa jajahec jurâ Galilaia mâreŋko rawec. 44 Jesu e jahac qanaŋ šiŋuc mufuawec: “Porofete moc e jahacne hae mâreŋko jume sâcne mi sâseniŋmu.” 45 Eme Galilaia mâreŋko rafisime Galilaia ŋic jaŋe âgo ecnembiŋ. Ine jaŋe juwicnao mâmâc Jerusalem haeo rarâ aakic hombaŋko gie bame honembiŋte iŋuc ecnembiŋ.

46 Eme Kana haeo Galilaia mâreŋko mârâc mume opâzi waiŋ ewec ira hâcne mocwâc risiewec. Eme Kafanaum haeo kia moc juwec, e ŋokâ-ticne hucsâko bame fowec. 47 Eme Jesu e Judaia mâreŋkonec risierâ Galilaia mâreŋko mocwâc ware fisikac, iŋuc mupie manarâ kia e Kana haeo Jesurao rarâ ŋokâ-ticne hâmozo ehuc fowec irec jowame ranicte numucnewec. 48 Eme Jesuzi šiŋuc âzâcnewec: “Ŋoŋe mâsi â wiac šâŋe furu-ŋeŋic sawa honerâ dâŋnane mana šakieeŋgopieŋ.” 49 Eme ŋiczi muwec: “Wofuŋ, ŋokâ-nane hâmozacte biac fâzemec.” 50 Mume Jesuzi šiŋuc âzâcnewec: “Go mâc rac, ŋokâge ɋiɋic qakac.” Eme ŋic e Jesure dâŋ mana šakiehuc risie rawec. 51 Ehame motec jaŋe kiŋaŋ warerâ šiŋuc âzâcnembiŋ: “Ŋokâge ɋiɋic qajec jukac.” 52 Mupie ɋiɋic qawec dameŋ irec mu indiŋ ejareme mumbiŋ: “Jacne šoaŋ šâšâŋiŋ ŋehame ira hucticne âke niniŋkejec.” 53 Iŋuc mupie ŋiczi fuŋne kecšiŋuc manawec: Dameŋ ira hâcne Wofuŋzi sorecnuhuc mujec, “Ŋokâge ɋiɋic qakac.” Eme e jahacne â garikiŋfâc-ticne Jesu manasiŋke-fârembiŋ. 54 Jesu e Judaia mâreŋkonec Galilaia mâreŋko risierâ fuŋne qaqa mâsi i bame jajahec ewec.

Copyright information for `KMG