John 6

Jesuzi ŋic 5000 nânâ gumec-jopawec

(Mat 14: 13-21” Maò 6: 32-44” Luë 9: 10-17)

Jesu e dâŋ i mufârerâ Galilaia riqic, Tiberia riqic hâcne, fotâcnerâ ocniŋucnao rašiwec. Rašime ŋic ŋokac bocjahazi huc šâichec ɋiɋicne bacjopame honembiŋte bâjâpembiŋ. Eme Jesuzi motecfâcne rocjopame tikio ferâ ŋembiŋ. Dameŋ ira Judaŋic aakic hombaŋ-jeŋic bembeŋkewec. Eme Jesuzi šâŋe firâ ŋic guru sâko fisipie honec-joparâ Filipo wiocnerâ muwec, “Poroŋ wenirec furine barâ i sâko gumec-jopapene sâcjopaocmu?” E wiac eocte manasume foha mâc esâickewec. Eme Filipozi šiŋuc muwec: “20 kinazi poroŋ furine barâ gumec-jopapene mâc hesâsâc-jopaocmu.” Mume motecfâcne jaŋeraonec moc, Anderea, Simoŋ Petorore ɋa, eki šiŋuc muwec: “Ʒira motec moc jukac eki poroŋ memoc â opâ qowi jajahec bajukac, erâ ŋic guru sâko jâmbâŋte keci mac izi wemo ezo?” 10 Eme Jesuzi muwec, “Ŋoŋe ŋic ejarepie qâzuckerâ waha ŋeniŋ.” Eme mâreŋ ira kecɋaŋ fowec i toma âterâ ŋic 5 tauseŋ qâririŋ iŋuczi waha ŋerambiŋ. 11 Eme Jesuzi poroŋ rorâ daŋge murâ ŋic ŋerambiŋ jaŋe bâtâc bajarewec â qowi iŋuc jaha mupie sâc jarewec. 12 Nârâ gapec-jopame Jesuzi motecfâcne šiŋuc jazawec: “Tiwâne forâ sipirickezacte nuseniŋ.” 13 Eme jaŋe poroŋ memoc irec tiwâne nusepie sasac 12 hurâ fusewec. 14 Eme ŋic jaŋe fuŋne qaqa mâsi i hone manac erâ mumbiŋ, “Porofete sâko mâreŋko fuaocte mukicne, šine hâcne jâmbâŋ.” 15 Eme jaŋe Jesu orâŋkerâ mezi rorâ ŋicwofuŋ-jeŋic âkendâŋnezo ehapie hone tarac-joparâ behec-joparâ e jahackoaŋ tikio fewec.

Jesu riqicko âte âte rawec

(Mat 14: 22-27” Maò 6: 45-52)

16 Hae owâeme motecfâcne jaŋe riqicmecko humbiŋ. 17 Hurâ Kafanaum haeo risie raniŋte wokeo fembiŋ. Erâ hae dapâc eme Jesu juhame buc rambiŋ. 18 Ehuc mâŋâŋ sanaŋne domame siri kâcɋene qame rambiŋ. 19 Jaŋe kilometa 4 me 5 irec sâc rakuhapie Jesuzi riqic faio âte âte rarâ woke bâqiŋkeme honerâ fâfârembiŋ. 20 Iŋuc epie wira-jarerâ muwec: “Nâhâc fâkopac, mi hâwic-ŋopaoc.” 21 Eme wokeo ropie feocte ehapie izia woke mâreŋ razo mumbiŋko fisiwec.

Ŋic jaŋe Jesu mâsire hesuambiŋ

22 Ŋic guru sâko jaŋe riqic ocniŋucnao fohapie hae furewec. Hae fureme šiŋuc mumbiŋ: “Jacne ŋafeo woke mocsâkoa ŋeme honembeneŋ, ira motecfâcne Jesu beherâ buc ferâ rambieŋ.” 23 Iŋuc manahuc ŋehapie Tiberia haeonec woke gâcne Wofuŋzi daŋge murâ poroŋ gumec-jopawecko ware fisimbiŋ. 24 Eme ŋic jaŋe Jesu e jahacne â motecfâcne basac-joparâ wokeo ferâ Kafanaum haeo risie rarâ ira basambiŋ. 25 Riqic šiŋucnao basaku bâfuarâ mumbiŋ, “Qaqazu, go wezimucne waremec?” 26 Wiocnepie šiŋuc jazawec: “No jâmbomac jâmbâŋ mupe mananiŋ, ŋoŋe fuŋne qaqa mâsi bape honeeŋgopieŋ irec mâcne, nânâ gumec-ŋopape nâ gapec embieŋ, irec basacnuŋgopieŋ. 27 Ŋoŋe gie banšepieŋ, erâ nânâ sisirowenere mâcne, juju sanaŋte nânâ irec giene banšepieŋ. Ŋic Fâri Wâtuŋne eki, Anutu Mamaczi kamac sarahuc âkendâŋnewecte, juju sanaŋte nânâ i sâcne ŋareocmu.” 28 Mume dâŋ šiŋuc bâtikiecnembiŋ: “Nâŋe weniŋuc erâ Anuture gie banaŋmu?” 29 Eme šiŋuc jazawec: “Ŋic sorewec e manasiŋkezo, izi Anuture gie biŋe-ŋeŋic ekac.” 30 Mume dâŋ šiŋuc âzâcnembiŋ: “Mo fuŋne qaqa mâsi mo batec honerâ manasiŋgunaŋmu? Mo gie mo bacmu? 31 Mimiŋnefâc-nâŋec jaŋe mâreŋ sawao mana nâjumbieŋ. Eme irec dâŋqâreŋ šiŋuc fokac: `Sambâŋkonec nânâ jareme nâjumbieŋ. Ž ”

Sambâŋkonec nânâ irec dâŋ

32 Eme Jesuzi šiŋuc jazawec: “Jâmbomac jâmbâŋ mupe mananiŋ: Mose e sambâŋkonec nânâ mi bâfua-ŋarewec, Mamac-nanezi sambâŋkonec nânâ fârine ŋareekac hâcne. 33 Nânâ sambâŋkonec waharâ mâreŋŋic juju bâfua-ŋareekac izi Anuturaonec nânâ fârine ekac.” 34 Mume šiŋuc âzâcnembiŋ: “Wofuŋ, go nânâ mukic i dameŋ sâc nârezemec.” 35 Eme šiŋuc jazawec: “Jujure nânâ no hâcne. Moc e norao qohotaocmu e nânâre moc mi hâmoocmu, â moc e no manasiŋnuocmu e opâre moc mi hâmoocmu. 36 No ine ŋazape, ŋoŋe no honecnu-bipiehuc sifu mi manasiŋnueŋgopieŋ. 37 Mamaczi nareekac i jaŋe norao fisi-fâreniŋmu, â norao fisiocmu e mi bâsuepemu. 38 Sambâŋkonec wahapo i no nahacne micdâŋ dopeckepemurâ mâcne, sorecnuwec ere micdâŋ dopeckepemurâ wahapo. 39 Mamac-nanezi norao râec-jopaekac ŋic i jaŋe sipirickenšipiŋte hone qâzuc ejareku dameŋ sâkoo furu jaha wiwic-jopape faharenšoŋgopieŋ” sorecnuwec ere micdâŋ iŋuc hâcne fokac. 40 Ŋokâ hone dendeŋnehuc manasiŋkeniŋmu sâc juju sanaŋ rauckeniŋmu” Mamac-nanere micdâŋ iŋuc hâcne fokac. Eme noni dameŋ sâkoo bâɋârec-jopazokopac.”

Jesu e juju sanaŋte nânâ

41 Jesu e “sambâŋkonec nânâ no hâcne” iŋuc muwecte Judaŋic jaŋe mana sâqorecnehuc dâŋembiŋ. 42 Ehuc šiŋuc mumbiŋ: “Wiac Jesu e Josefere ŋokâ, neŋgoc mamac jahec-ticne i nâŋe honec-jofaeŋgopeneŋ. Eme wemocte šiŋuc mukac: `No sambâŋkonec wahapo'?” 43 Mupie Jesuzi šiŋuc jazarâ muwec: “Ŋoŋe boc mi manapie sâqorezejec. 44 Ŋic moc e jahacne maŋte norao fifisi i mi fokac, Mamac sorecnuwec eki fâreme fifisine ine fokac. Eme noni ŋic iŋucne e dameŋ sâkoo bâɋârezokopac. 45 Porofete jaŋere dâŋqâreŋ šiŋuc fokac: `Anutu e jahac ŋic sasawa miti jaza qazuc eocmu. Ž Irec moc e Mamaczi miti âzâcne qazuc eme manaocmu e norao fisiocmu. 46 Ŋic moczi moc Mamac honewec i mi fokac, Anuturaonec wahawec e mocjahazi Mamac honewec. 47 No jâmbomac jâmbâŋ ŋazape mananiŋ: Moc e no manasiŋnuocmuzi juju sanaŋhec eocmu. 48 Jujure nânâ no hâcne. 49 Mimiŋnefâc-ŋeŋic jaŋe mâreŋ sawao mana nâipiehuc hâmo-fârembiŋ. 50 Á sambâŋkonec nânâ nârâ mi hâhâmo ine norao fokac ši. 51 Jujure nânâ sambâŋkonec wahakicne no nahacne hâcne. Irec moc e noraonec nânâ nârâ jurašihuc juocmu sanaŋ. Biuc-nanezi nânâ ekac, i ŋiczi juju bâfuaniŋte ŋarepemu.”

52 Eme Judaŋic jaŋaczia mu qaqatarac erâ mumbiŋ, “E weniŋuc erâ biuc-ticne nâreme nanaŋmurâ mukac?” 53 Epie Jesuzi šiŋuc jazawec: “No jâmbomac jâmbâŋ ŋazakopac, ŋoŋe Ŋic Fâri Wâtuŋne ere biuc â soc mi nâniŋmuo maŋŋeŋicko juju mi fuaocmu. 54 Moc e nore biuc â soc nâocmuzi juju sanaŋhec eocmu, eme noni dameŋ sâkoo bâɋârezokopac. 55 Nore biuc izi nânâ fârine, â nore soc izi opâ fârine. 56 Nore biuc â soc nâocmuzi no maŋnuocmu â noni e maŋkepemu. 57 Mamac e juju runezi sorecnume wahapore Mamacte erâ juekopac, eme no nâcnuocmuzi iŋuc jaha nore erâ juocmu. 58 Sambâŋkonec nânâ irec fuŋne iŋuc fokac. I mimiŋnefâc-ŋeŋic nâmbiŋ iŋucne mâcne. Jaŋe nâipiehuc hâmombiŋ. Á nore nânâ ši nâocmu e ine jurašihuc juocmu sanaŋ.” 59 Jesu e Kafanaum haeo mitificko juhuc dâŋ i jaza qazuc ewec.

Ŋic tucnezi Jesu râpeckembiŋ

60 Kikefuŋfâc-ticne jaŋeraonec bocjahazi dâŋ i manarâ mumbiŋ, “Dâŋ kecši manapene ququŋkenehec ekac, i mozi manaocmu?” 61 Eme mu takic embiŋ i Jesu e maŋticnezi manarâ šiŋuc jazawec: “Dâŋ i manapie sâqorekac me? 62 Eme Ŋic Fâri Wâtuŋnezi mârâc juweckoa risie feme manapie weniŋuc eocmu? 63 Sahacte biuczi juju bâbâfua i mi fokac, juju bâbâfua i Mârore gie. No dâŋ ŋazaekopac i Mârohec â jujuhec. 64 Eme ŋoŋeraonec tucnezi ine mana maŋ mi eeŋgopieŋ.” Jesu e miti-ticne qikiŋneniŋmu jaŋe mârâcko mana tarac-jopawec, â doc baocmu e mâmâc mana tarawec, irec dâŋ iŋuc jazawec. 65 Erâ dâŋ moc šiŋuc šuhuckerâ muwec: “No irec hâcne kecšiŋuc ŋazapac: Moc e Mamaczi mi baafeckeha norao fisirâ jujune mi fokac.” 66 Eme dameŋ ira kikefuŋfâc-ticne jaŋeraonec bocjahazi jume jujure takic-jopame râpeckembiŋ.

Petorozi Jesure fuŋne mujaŋgeŋkewec

67 Eme Jesuzi motec fuŋfuŋfâc-ticne 12 indiŋ-joparâ muwec, “Ŋoŋe iŋuc jaha râpecnuzo muŋgopieŋ me?” 68 Mume Simoŋ Petorozi šiŋuc âzâcnewec: “Wofuŋ, go behecgurâ moc morao ranaŋmu? Go mocjahazi juju sanaŋte dâŋ bajuekic. 69 Nâŋe go manasiŋguhuc šiŋuc mana-gareeŋgopeneŋ: Go Anuture Tiriŋic hâcne.” 70 Eme Jesuzi šiŋuc jazawec: “No motec ŋoŋe 12 rowosâec-ŋopapo. Eme wemocte ŋoŋeraonec moczi Sataŋ ekac?” 71 E Juda Simoŋte ŋokâ Karioto haeonec ere manasuhuc iŋuc muwec. E motec 12 jaŋere guruoneczi hâcne juku šâhecko Jesu doc bawec.

Copyright information for `KMG