John 7

Jesu e rehac boze hombaŋte Jerusalem haeo fewec

Jerusalem haeonec Judaŋic jaŋe Jesu qaniŋte dâŋ qacnepie Judaia mâreŋ-jeŋic qikiŋnerâ Galilaia mâreŋko sawa rac warec ehuc juwec. Ehuc juhame Judaŋic rehac boze hombaŋ-jeŋic bembeŋkewec. Ehame ɋafâc-ticne šiŋuc âzâcnembiŋ: “Go šawierâ Judaia mâreŋko rarâ, šira mâsi wiac baekic i ocna batec kikefuŋfâcge jaŋe honenšepieŋ. Mozi fua tâcnezo murâ soŋsoŋ juhuc gie baocmu? Go gie iŋucne bazo muekicte ra ŋicguruo fua taniŋkerâ batec honeniŋ me!” Ɋafâc-ticne jaŋe e mi manasiŋkehuc iŋuc mumbiŋ. Mupie Jesuzi šiŋuc jazawec: “Ŋoŋe dameŋ kosao wiac ezo murâ sâcne eniŋmu, no ine dameŋ-nane mi maickekac. Ŋic jaŋe ŋoŋe wemocko qaisoc-ŋopaniŋmu, no ine juju bapa-jeŋic sâqocne i mutaniŋkepe qaisocnueŋgopieŋ. Ŋoŋe hombaŋko raniŋ, no ine dameŋ-nane mi maickekacte šiŋuczia mi rapemu.” Iŋuc murâ Galilaia mâreŋkoa juwec.

10 Eme jaŋe bânierâ rahapie e šâhecko buc kamierâ rawec. 11 Eme hombaŋ maickeme Judaŋic micne jaŋe basarâ wiwioc erâ mumbiŋ, “E wena jukac?” 12 Á ŋic omane sâko jaŋe ere dâŋ bocjaha mufembiŋ. Ehuc gâcnezi mumbiŋ, “E ŋic biaŋne,” â gâcnezi qatararâ mumbiŋ, “Aricne, e ŋic maŋ bâsifuc ejareekac.” 13 Erâ Judaŋic micne jaŋere hâwic-jopame dâŋ tâtâcko mi mumbiŋ.

Jesu e Anuturaonec dâŋ bawahawec

14 Eme hombaŋ šâšâŋiŋko Jesu e taha ufuŋko ferâ miti jaza qazuc ewec. 15 Miti mume Judaŋic micne jaŋe wareckerâ šiŋuc mumbiŋ: “E nâŋâcne mamana ficko mi juweczi weniŋuc erâ mitire fuŋne manaekac?” 16 Mupie Jesuzi šiŋuc jazawec: “No mitire fuŋne qazu-ŋareekopac i no nahacne mâcne, i sorecnuwec ere. 17 Eme mitire fuŋne kecši i Anuturaonec me no nahacnaonec, i Anutu micne reŋkehuc mana tarazo. 18 Moc e jahacnaonec manasurâ muocmu, e sahac mumuteŋte hata âteocmu, â moc e gie runere mumuteŋ fuaocte gie baocmu, ere ine sahac fefe tâmiric siocmâc jukac muzo. 19 Mose e sâcmutâc dâŋ mufua-ŋarewec. Á ŋoŋeraonec moczi moc mi reŋkeekac. Eme ŋoŋe wemo wiacte nuzo muŋgopieŋ?” 20 Mume ŋic omane sâko jaŋe mumbiŋ, “Go demoŋzi maŋge bâsifuckekac. Mozi guzo mukac?” 21 Eme Jesuzi jazawec, “No mâsi mocjaha bapo irec erâ mu warec boc eeŋgopieŋ. 22 Mupe mananiŋ: Mosezi motecfâc-ŋeŋic sahac-jeŋicko ma baniŋte muŋarewec. Erâ i Mosezi mi fuŋkewec, mimiŋne jaŋe fuŋkembiŋ. Eme gie i bapane maickeme sabata hombaŋko wâc baeŋgopieŋ. 23 Ine hâcne Mosere sâcmutâc dâŋ huckepie fârimâc ezacte hombaŋko motecfâc-ŋeŋic sahac tofa-jeŋicko gie i baeŋgopieŋ, â no ine ŋicpuriŋ sahac-ticne furu jaha hombaŋko bâpiaŋkepo, irec wemocte mana gâpâre-nareŋgopieŋ? 24 Ŋoŋe dâŋ onšoŋ jaha sahacne mi muniŋ, mana wosâehuc dâŋ fârine munšapiŋ me!”

Jesu e Anuture bufuŋkonec wahawec

25 Eme Jerusalem hae rune jaŋe šiŋuc mumbiŋ: “Ŋic qazo mueŋgopieŋ ine hâcne ši. 26 Hâc, e weniŋuc erâ dâŋ tâtâcko mume micnefâc-nâŋec jaŋe mi qataracneŋgopieŋ? Me jaŋe fuŋne-ticne mana tarahuc manacnepie Kristo ekac mecne? 27 Erâ iŋuc wâc mâcne mecne. E fufua-ticnere fuŋne manaŋgopeneŋ. Kristo wareocmu ine ere fuŋne kâuc bafârenaŋmu.” 28 Jesu e taha ufuŋko miti qazu-jarehuc domahame iŋuc mupie hahaŋne bahuc muwec, “Oi ŋoŋe, mana taracnurâ fufua-nanere fuŋne manaeŋgopieŋ, ŋoŋe hâcne. Wahapo i no nahacne maŋte mi wahapo, jâmbomac rune moc jukac eki sorecnume wahapo. Ŋoŋe e kâuc baŋgopieŋ. 29 No ine e jahacne bufuŋkonec sorecnume wahapore e mana tarakopac.” 30 Iŋuc mume kâpâcwâru baniŋte mumbiŋ. Erâ dameŋ-ticne mi maickewecte mejeŋic mâckeme behembiŋ. 31 Ehame ŋic omane jaŋeraonec bocjahazi fuŋkerâ Jesu manasiŋkembiŋ. Ehuc šiŋuc mumbiŋ: “Kristo fisiocmu, e ŋic šizi mâsi baekac i sirickehuc baocmu me? Aricne, e bafâreekac.” 32 Ŋic jaŋe dâŋ iŋucne kamierâ mupie farisaio jaŋe manarâ taha bapa micne jaŋehec nazaŋ gazaŋ erâ momori jaŋe Jesu kâpâcwâru baniŋte sorec-jopapie rambiŋ.

Jesu e Mamac-ticnerao risieocte jazawec

33 Eme Jesuzi ŋic šiŋuc jazawec: “No dameŋ bembeŋne sawa ŋoŋehec jurâ sorecnuwec erao risiepemu. 34 Eme ŋoŋe no basacnu-bipiehuc mi bâfuacnuniŋmu. Ra jupemu ira wemocko fâniŋmu.” 35 Iŋuc mume Judaŋic jaŋe šiŋuc muhuc nazaŋ gazaŋ embiŋ: “E wena rame basa-bipienaŋte mukac? Judaŋic âgofâc-nâŋec Grië mâreŋko juraŋgopieŋ jaŋerao raocte mukac, ehuc Grië miti jazaocte manasuhuc mukac? 36 Basacnu-bipiehuc mi bâfuacnuniŋmu, â rapemu ira sâcne mi fâniŋmu, dâŋ iŋucne weniŋucte mukac?”

Jesu manasiŋkehuc opâ sârohec ezo

37 Judaŋic jaŋe hombaŋ botâŋne ŋetaraniŋte tutumaŋ sâko ehuc ŋehapie Jesuzi faharerâ domahuc dâŋ wiwic jaha šiŋuc muwec: “Moc e opâre hâmokacko norao warerâ nâzejec. 38 Á moc e manasiŋnuhuc juocmu ere bumaŋkonec opâ sâro fifisine wahahuc domaocmu. Miti papiao dâŋ iŋuc hâcne qâreŋkekicne.” 39 Jesu manasiŋkembiŋ jaŋe Mâro biŋe qajarehuc iŋuc muwec. Jesu e dameŋ ira sambâŋ eri tatamac-ticnere maŋnao mi risie fewecte Mâro mi wahawec. 40 Ŋic jaŋe dâŋ i manarâ Jesure šiŋuc mumbiŋ: “E jâmbomac porofete sâko-nâŋec.” 41 Á gâcnezi mumbiŋ, “E Kristo jâmbâŋ.” Mupie tucnezi qatararâ mumbiŋ, “Wiac Kristo e wemocko Galilaia mâreŋkonec fuaocmu. 42 Tiri Papiao dâŋ šiŋuc mukicne: Kristo e Dawidire haefuŋ Betelehem ira oso gitecfâc-ticne jaŋere ŋondeŋkonec fuaocmu.” 43 Ŋic jaŋe Jesure iŋuc muhuc fâuckembiŋ. 44 Eme gâcnezi kâpâcwâru baniŋte murâ mejeŋic mâckeme behembiŋ.

Jesu kâpâcwâru baniŋte eipierâ behembiŋ

45 Eme momori jaŋe taha bapa micne â farisaio jaŋerao risiepie wio-jarerâ mumbiŋ: “Ŋoŋe wemocte mi rorâ bawareŋgopieŋ?” 46 Wiopie momori jaŋe mumbiŋ, “E dâŋ muekac, iŋucne ŋic gâcnezi.mumune mi fokac.” 47 Mupie farisaio ŋic jaŋe šiŋuc jazambiŋ: “Me, ŋoŋe iŋuc jaha maŋ bâsifuc eŋarejec? 48 Soŋaŋ kâcɋene â farisaio ŋic nâŋeraonec moczi erao moc qohotakac me? 49 I aricne i, ŋic omane guru, sâcmutâc dâŋ mi mamana jaŋe sawa, hârâcte biŋe jaŋe hâcne.” 50 Eme âgo-jeŋic moc Nikodemo, mârâc Jesu iqickewec, eki ine šiŋuc jazawec: 51 “Ŋoŋe muniŋ, ŋic moc fuŋne-ticne mi manahuc â kiŋticne mi honehuc okacnere dâŋ mâc mumutarane, iŋuc ezore sâcmutâc papia-nâŋecko moc qâreŋkekicne fokac me?” 52 Eme âgofâcne jaŋe šiŋuc mumbiŋ: “Eme go iŋuc jaha Galilaia mâreŋkonec me? Wose gufuc eku šiŋuc manacmu: Galilaia mâreŋkonec porofete fufuane mi fokac.” [ 53 Eme jaŋe râwiŋnerâ ficjeŋic sâc rafârembiŋ.

Copyright information for `KMG