Luke 10

Motec bocjaha miti muniŋte sorec-jopawec

(Mat 9: 37-38” 10: 7-16” 11: 20-24)

Juku Jesuzi motec 70 bâwosâec-joparâ giedâŋ mujarewec. Ehuc e jahac haene haene raocte muwec ira jajahec jajahec bânierâ raniŋte sorec-jopawec. Ehuc jaza muwec: “Qa roro giezi kâcɋene, gie bapa ŋic ine afecne. Irec ŋoŋe gie rune numucnepie gie bapa ŋic bâfuac-jopame gie-ticnao ranšepieŋ. Ŋoŋe rahuc šiŋuc mananšepieŋ: Lama kâte qâto jaŋere ŋondeŋko mi sosorec-jopane i ŋoŋe sorec-ŋopakopac. Eme ŋoŋe moneŋ kânoŋ me he me kikehuhu mi amecke ranšepieŋ. Erâ hatao ŋic bâfuac-joparâ dâŋ mi bacjopanšepieŋ. Fic mocko fezo ehuc rune šiŋuc jazanšepieŋ: `Fic kecšira wama fozejec. Ž Eme fic ira ŋic moc wamare biŋe jume wamadâŋ-ŋeŋicte fârinezi erao fotâcnerâ foocmu. Arictac eme wamadâŋ-ŋeŋicte fârine ŋoŋerao mocwâc risieocmu. Fic feniŋmu ijaha ŋeŋe juju ehuc nânâ gumec-ŋopapie nânšepieŋ. Gie bapa ŋic wiac furimâc jare gumec ezo. Ŋoŋe ficbiri mi junšepieŋ. Hae mocko fisipie hezu hewâneŋ eŋarehuc nânâ gumec-ŋopapie nânšepieŋ. Erâ ŋic huchec ɋiɋicne bacjoparâ hae rune šiŋuc jazanšepieŋ: `Anuture uucmaŋzi maic-ŋopakac. Ž 10 Hae mocko fisipie qikiŋ-ŋopapie hae šoŋao domahuc šiŋuc jazanšepieŋ: 11 `Gâc wândoc-ŋeŋic kike-nâŋecko bohotakac, i âteickepene waha foŋarezejec. Erâ ine šiŋuc mananiŋ: Anuture uucmaŋzi maic-ŋopame bâsuembieŋ. Ž 12 No ŋazape mananiŋ: Okac dameŋko Sodom haeonec katucne bawahahuc ejarezo â hae iŋucne jaŋe bafehuc ejarezo.

13 “Jei Koraziŋ rune, jei Besaida rune, ŋoŋerao mâsi hâhâwicne fuawec, iŋucne Tiro Sidoŋ haeo fuame muzac jaŋe mârâc jaha ki busâqoc ehuc maŋjeŋic bârisienšapiŋ. 14 Irec juku okac dameŋko Tiro Sidoŋ haeonec katucne bawahahuc ejarezo â ŋoŋe ine katucne bafehuc eŋarezo. 15 Erâ Kafanaum rune, go sambâŋko bafecguo me? Aricne, go hârâcko tuŋguzo. 16 Ŋoŋere dâŋ manaocmuzi nore dâŋ manaocmu. Á ŋoŋe qikiŋ-ŋopaocmuzi no qikiŋnuocmu. No qikiŋnuocmuzi ine sorecnuwec e qikiŋneocmu.”

Motec risiepe Jesuzi Mamac-ticne muafeckewec

(Mat 11: 25-27” 13: 16-17)

17 Motec 70 jaŋe juku risierâ šeri ehuc Jesu dâŋ binaŋ šiŋuc ecnembiŋ: “Wofuŋ, gore šâŋe muhuc demoŋ jâpe-jarepene micnâŋec reŋke-jâmbâŋkeŋgopieŋ i!” 18 Mupie šiŋuc jazawec: “Sataŋ e sambâŋkonec bâbâric iŋucne waha qame honepo. 19 Manaŋgopieŋ, ŋoŋe homa â omeqaqa â râsire wiac šârâ hâriŋ irec faio âtepie mi sipiric-ŋopaocte tâpiri râe-ŋarepo. 20 Eme ŋoŋe ine demoŋzi micŋeŋic reŋkeŋgopieŋ irec mi šeri enšepieŋ, šâŋe-ŋeŋic sambâŋko qâreŋkekicne fokac irec šeri enšepieŋ.”

21 Eme dameŋ ijaha Tiri Mârozi Jesu bufahac qacneme šeridâŋ kecšiŋuc muwec: “Mamac, sambâŋ â mâreŋ rune, go mamana-jeŋicte manapie kâcɋene eekac ŋic i jaŋe mitidâŋge hesoŋke-jareekic, â maŋjeŋicte manapie gegecne eekac jaŋe ine mufua-jareekic, eme no irec muteŋgukopac. Go iŋuc fua biaŋ raocte mupaŋkemeŋ hâcne ine. 22 Wiac sasawa i Mamac-nanezi râe-nare-fârewec Eme ŋic moczi Ŋokâ mi šâŋitaekac, Mamaczi buc šâŋitaekac. Erâ Mamac iŋuc jaha ŋic moczi mi šaŋitaekac, ŋokâzi buc šâŋitaekac. Erâ Ŋokâzi ŋic moc Mamacte fuŋne mufuacneme e wâc šâŋitaocmu.” 23 Iŋuc murâ motecfâcne jaŋacne šiŋuc jazawe: “Ŋoŋe wiac šâŋe furu honehuc jueŋgopieŋ irec šeri enšepieŋ. 24 No ŋazape mananiŋ: Porofete â ŋicwofuŋ bocjaha jaŋe ŋoŋe wiac hone manac eeŋgopieŋ i hone manac eniŋte ejare-bipiehame sifu mi hone manac embiŋ.”

Ŋic moczi kisâ-ticne ehâmocnewec

(Mat 22: 34-40” Maò 12: 28-31)

25 Sâcmutâc mamana ŋic moczi Jesu šiŋuc muhuc esâickewec: “Qaqazu, no weniŋuc erâ juju sanaŋte biŋe epemu?” 26 Mume Jesuzi okacne šiŋuc wiocnewec: “Sâcmutâc dâŋ weniŋuc fome woseekic?” 27 Wiocneme eki muwec: “Go maŋge â qâqâtâcge â tâpirige â mamanasuge i Wofuŋ Anutuge furu jaha qikiŋnecnetec fozejec, erâ go gahacne egareekac, sâc ijaha âgogere egarezejec, dâŋ iŋuc fokâc.” 28 Mume Jesuzi šiŋuc âzâcnewec: “Go dâŋ sâcne mukomec, i reŋkerâ juju sanaŋte biŋe ecmu.” 29 Eme ŋic e no maŋsioc tâmiric hawari ezepac muhuc harierâ Jesu šiŋuc wiocnewec: “Eme more manape âgo-nane ezejec?” 30 Mume Jesuzi binaŋ moc šiŋuc bacnewec: “Ŋic moczi Jerusalem haeonec Jeriko haeo rahuc râsi jaŋere somâmaŋko huwec. Eme jaŋe qarâ ŋaqi â mafa wiac-ticne jâoc rofârerâ behepie hâmozo ehuc fowec. 31 Fohame taha bapa moczi hata ijaha rarâ hone takirerâ jâuruwec. 32 Eki rahame taha ufuŋte kiŋaŋŋic moczi ijaha ra fisirâ hone takirerâ jâuruwec. 33 Ehame Samaria mâreŋkonec ŋic furune moczi hata raku ŋic bâfuawec. 34 Erâ honerâ bune sâqoreme maŋfuŋnao rarâ wicticne wokemaŋ â waiŋ opâzi šure foŋ ewec. Erâ becâsic-ticnao râeme feme haeo bararâ tomaficko râerâ jauŋ bawec. 35 Hae fureme raocte tomafic rune 20 toea râcnehuc šiŋuc muwec: `Go ŋic kecši jauŋ bahuc juzemec, eme moneŋ garekopac mi sâckeme juku risierâ mocwâc šuhucke-garepemu. Ž ” 36 Jesu iŋuc murâ muwec: “Ŋic jahec â moc jaŋeraonec wenimo irec manatec ŋic qakicne ere âgo ewec?” 37 Wiocneme šiŋuc muwec: “Jauŋ bawec eki.” Eme Jesuzi šiŋuc âzâcnewec: “Go rarâ iŋuc hâcne ezemec.”

Maria â Mata Jahere binaŋ

38 Jesu â motecfâcne jaŋe raku hae mocko fisipie ŋokac moc šâŋene Mata eki Jesu ficticnao hefârerâ hezu hewâneŋ ecnewec. 39 Eme qoticne moc juwec šâŋene Maria, eki Wofuŋte maŋfuŋko waha ŋehuc miti-ticne manawec. 40 Mata e šegoc giezi niŋgiŋkeme šanšaŋ bumbuŋ domahuc nânâ rike bâmoc ewec. Eku Jesurao rarâ muwec: “Wofuŋ, qonanezi behecnume kiŋaŋ no nahackoaŋ qape honetec mi sâqorekac me? Go âzâcnetec baficnuoc me!” 41 Mume Jesuzi kecšiŋuc âzâcnewec: “Mata, Mata, go wiac bocjahare mana mezac erâ šocne šâicne ehuc domakic. 42 Manakic, wiac afecnezi sâckeocmu, â mocjaha fokac i tâmiric ine sâcne mi jujune. Maria fâri biaŋ hâcne ruckeocte wosâejec, i mi jâoc rozo.”

Copyright information for `KMG