Luke 13

Maŋnâŋec bârisiepene Anutuzi akic-nâpoocmu

Dameŋ ijaha ŋic gâcne fisirâ juhuc Jesu dâŋ binaŋ šiŋuc ecnembiŋ: “Pilatozi mume momorifâcne jaŋe Galilaia mâreŋkonec ŋic â bâzi ririkere lama bulimakaofâc-jeŋic mâmâc joparâ socjeŋic bâsifuckembiŋ.” Dâŋ binaŋ iŋuc ecnepie šiŋuc jazawec: “Ŋoŋe wiac ŋemâcne i ejarekicnere šiŋuc moc mupie: `Kiŋjeŋic Galilaia ŋic gâcne jaŋere kiŋ sirickewec. Ž Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipiricke-fâreniŋmu. Me Jerusalemnec ŋic 18 Siloam hârâczi ŋemac-jopawec jaŋere wâc šiŋuc mi munšepieŋ: `Kiŋjeŋic Jerusalem haeonec ŋic gâcne jaŋere kiŋ sirickewec. Ž Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipiricke-fâreniŋmu.”

Dâŋ i mutararâ Jesuzi kesaic dâŋ moc kecšiŋuc muwec: “Ŋic moczi jufu-ticnao hâmeŋ moc sarame sokawec. Eme rune e fârine wasaocte ra basa jujec. Eku jufu soŋaŋ-ticne âzâcnerâ muwec: `No jâc kecširec fârine basahuc juhape jara jahec â moc ekac. Jâc e maŋgâŋ wemocte boc domaocmu, qafaratec qaoc. Ž Mume soŋaŋzi šiŋuc âzâcnewec: `Bomboŋ, go behehaŋ jara ši domaoc, ehame noni fuŋne kinoŋzi herâ jawa sânšâŋ hepe dameŋ mocte fârine fuaocmu me aricne i honezeperec. Aricne eme šâhec mutec hefarazo. Ž ”

Jesuzi sabata hombaŋko ŋokac moc bâpiaŋkewec

10 Jesu e sabata hombaŋ mocte mitificko ferâ miti jazawec. 11 Eme mitific ira ŋokac moc ŋewec, e demoŋ moczi ecneme jara 18 ruruhuc jaha ŋeŋe juju ewec, ehuc wemocko moc fâretiŋnezac. 12 Eme Jesuzi ŋokac e honerâ hefârerâ muwec: “Ŋokac go fâretiŋnecmurâ mukopac.” 13 Iŋuc murâ meticne qizecnao râeha izia fâretiŋnerâ Anutu muteŋkewec. 14 Jesu e ŋokac i sabata hombaŋko bâpiaŋkewecte mitific soŋaŋzi maname sâqoreme ŋic ŋokac jaza muwec: “Gie bapa 6 fokac ira warepie bâpiaŋ-ŋopazejec, hombaŋko ine misac.” 15 Mume Jesuzi dâŋ šiŋuc bâtikiecnewec: “Oi burecŋic ŋoŋe, hombaŋko doŋgi bulimakaofâc-ŋeŋic mi fickonec firuec-joparâ opâo bacjopa raeŋgopieŋ me? 16 Ŋokac kecši e Abrahamte ɋâric, eme Sataŋzi niŋgiŋkeme jara 18 sâko ŋehuc juwec. Eme noni hombaŋko firuepe mi sâckekac me?” 17 Iŋuc mume kisâ ecnembiŋzi mimiembiŋ. Á ŋic ŋokac guru sâkozi ine mâsi biaŋ-ticnere šeri embiŋ.

Miti e nemuja hândâŋ â hâmu goreŋne iŋucne

(Mat 13: 31-33” Maò 4: 30-32)

18 Jesu e dâŋ moc kecšiŋuc šuhuckerâ muwec: “Anuture uucmaŋ e wemo wiac iŋucne, wemohec sâc hepe? 19 E nemuja hândâŋ iŋucne. Ŋic moczi i jufu-ticnao râeme âkešurâ jâc ewec. Eme sawa wipe jaŋe fisirâ tieŋnao herâ ŋeeŋgopieŋ.”

20 Eme moc šuhuckerâ muwec: “Anuture uucmaŋ i wemohec sâc hepe? 21 E hâmu goreŋne iŋucne. Ŋokac moczi hâmu goreŋne nânâhec bâsifuckeme aŋac-ticnezi nânâ isiricke-fârewec.”

Sambâŋko fezore samariezo

(Mat 7: 13-14, 21-23)

22 Jesu e Jerusalem haeo raocte hae sâko hae pitic rahuc miti jaza qazuc ewec. 23 Ehame ŋic moczi wiocnerâ muwec: “Wofuŋ, ŋic afecnezi mecne sambâŋko feniŋmu, me weniŋuc?” Eme Jesuzi šiŋuc âzâcnewec: 24 “Motâc fâŋfâŋnao rašiniŋte sama qamariehuc rašinšepieŋ. No ŋazape mananiŋ: Ŋic bocjahazi rarašire muniŋmu, murâ sifu mi rašiniŋmu. 25 Fic rune e motâc herâ ki bame ŋoŋe fisirâ râpenao domahuc heickerâ šiŋuc muniŋmu: `Wofuŋ, motâc ronârec. Ž Mupie šiŋuc ŋazaocmu: `No ŋoŋere kâuc bakopac, ŋoŋe wenirec? Ž 26 Wio-ŋareme okacne šiŋuc âzâcneniŋmu: `Nâŋe gohec juhuc nânâ opâ nâmbeŋ â hae-nâŋecko miti mutec manambeŋ. Ž 27 Mupie šiŋuc ŋazaocmu: `Ŋazakopac i, ŋoŋe wenirec, no mi manac-ŋopakopac, sâqocne bapa ŋoŋe behecnu-fâreniŋ. Ž 28 Eme Abraham, Isaka, Jakobo â porofete sasawa Anuture uucmaŋko juhapie honec-jopaniŋmu. Á ŋaŋacne ine qikiŋ-ŋopakicnere râpenao mic kikiaric kihuc ki oowa ehuc juniŋmu. 29 Ehame mâreŋ ŋifec â ŋifec, faic â juwic, irec ŋic fisirâ Anuture uucmaŋko raširâ tiwâ nâ šeri eniŋmu. 30 Manaŋgopieŋ, šâhecne jaŋeraonec gâcnezi bâbâni eniŋmu, â bâbâni jaŋeraonec gâcnezi šâhecne eniŋmu.”

Herodere dâŋ

31 Dameŋ ijaha farisaio ŋic tucne fisirâ šiŋuc muhuc âzâcnembiŋ: “Herodezi guocte mukac irec mâreŋ ši beherâ biac rac.” 32 Mupie šiŋuc jazawec: “Ŋoŋe risie rarâ qâqâto e nore šiŋuc âzâcneniŋ: `Manakic, no miŋecgac â tomâcko ŋic demoŋ jâpe-jarepemu â ɋiɋicne bacjopapemu, fureme batarapemu. 33 Miŋecgac â tomâc fureme hata rahuc juzepac. Porofete moc e Jerusalem haeo mi fisihame qaqane mi fokac. Ž ”

Jerusalem haeonec uŋdâŋ jazawec

(Mat 23: 37-39)

34 Iŋuc murâ muwec, “O Jerusalem rune, go hâcne porofete šikazi jopahuc mitiŋic gorao sorec-jopakicne qânâzi hehâmoc-jopaekic. Qâqâczi motecfâcne qânusuc-joparâ fakecnezi ɋoroc-jopaekac, iŋuc jaha noni kikefuŋfâcge wemo afecne maŋfuŋ-naneo qânusuc-jopazo mupe qikiŋne warehuc jumbiŋ. 35 Irec fic hae-ŋeŋic behepe tuhune fuazokac. Mupe mananiŋ: Ŋoŋe mocwâc mi hohonecnu juraku šiŋuc muhuc honecnunšoŋgopieŋ: `Wofuŋte micte warekac e mumbiaŋkenaŋ. Ž ”

Copyright information for `KMG