Luke 15

Lama qâsoriekicne â moneŋ sifuckekicne

(Mat 18: 12-14)

Takesi roro â sâqocne bapa Jesurao miti-ticne mananiŋte mâretec fisi jumbieŋ. Epie farisaio â miti qaqazu jaŋe irec manapie sâqoreme Jesure šiŋuc mumbiŋ: “Ŋic e sâqocne bapa rocjoparâ iqic-joparâ jaŋehec nânâ nâekac.” Eme irec Jesuzi dâŋ suŋsuŋne moc šiŋuc jazawec: “Ŋoŋeraonec moc e lama 100 jucneniŋmu. Eme mocsâkoazi qâsorieme beheocmu me? Aricne, e gâcne sâko 99 tuhuo behec-joparâ qâsoriekicne basaocmu. Basaku bâfuarâ bubiaŋ manahuc âsickerâ haeo fisirâ âgofâcne wira-jarerâ muocmu: `Lama-nane qâsoriekicne bâfuakopacte šeri enaŋ. Ž No ŋazape mananiŋ, ŋic tiŋne 99 maŋ bâbârisiere mi mumu-jarene jaŋere erâ sambâŋko šeri aafecne fuaha sâqocne bapa mocjaha maczi maŋne bârisieme ere erâ sambâŋko šeri fekicne fuaocmu.

“Ŋokac moczi siliwa moneŋ 10 bajuocmu. Bajuhame mocjaha wahame beheocmu me? Aricne, e waha qazerâ fic ofaŋne qâzuc ehuc basaocmu. Basaku bâfuarâ ŋokac âgofâcne wira-jarerâ šiŋuc jazaocmu: `Moneŋ-nane sifuckejec i bâfuakopacte šeri enaŋ. Ž 10 Mupe mananiŋ, Anuture aŋelofâc jaŋe iŋuc jaha sâqocne bapa mocjahazi mac maŋne bârisieme bubiaŋ manaeŋgopieŋ.”

Motec moc sipirickezo ewec

11 Jesuzi binaŋ moc šiŋuc bawec: “Ŋic moc ŋokâ jahec-ticne jajahec jupic. 12 Juku šâhec ŋokâzi mamac-ticne šiŋuc âzâcnewec: `Mamac, go moneŋ mafa nore biŋe qakicne i narec. Ž Mume moneŋ mafa bâtâc barâ jactewec. 13 Eme šâhec ŋokâ e gie bapa afecne jurâ mafa wiac-ticne bâmockerâ ame susuckerâ rawec. Erâ ocna sasec gie bahuc nânâ qowire nâ areŋ ehuc moneŋ mafa-ticne ititiŋke-fârewec. 14 Ititiŋke-fârerâ juhame mâreŋ ira roroc sâko fuawec. Eme motec e kitac qatac eku 15 mâreŋ rune moc erao ra qohotame eki mume susubecfâc-ticne soŋaŋ-jopawec. 16 Ehuc bec jaŋere nânâ nâocte ecnewec i wâc sakarecnembiŋ. 17 Iŋuc juku maŋnezi mumu hehec ecneme šiŋuc muwec: `Mamac-nanere kiŋaŋ qaqa wemo afecne juŋgopieŋ, eme jaŋe nânâ nâqiŋ qâqiŋ ehuc juhapie no ŋokâ-ticnezi šira rorocte sipirickezo ekopac. 18 Irec no hae-naneo rarâ mamac-nanerao fisirâ šiŋuc muhuc âzâcnezepac: Mamac, no sâqocne bape kiŋnanezi sambâŋko â gorao ŋemâckekac. 19 Irec wemocko ŋokâge mocwâc munarepie jupemu, go mâc kiŋaŋ motecge bacnutec juzepac. Ž 20 Iŋuc murâ šawierâ mamac-ticnerao rawec. Raku hae upeo fisihame mamac-ticnezi biac honerâ bune sâqoreme gasacke ra hâpo mumuduc ecnewec. 21 Eme motec e šiŋuc âzâcnewec: `Mamac, no sâqocne bape kiŋnanezi sambâŋko â gorao ŋemâckekac, irec wemocko ŋokâge mocwâc munarepie jupemu. Ž 22 Iŋuc mume mamac-ticnezi kiŋaŋ motec jazarâ muwec: `Ŋoŋe picpac jaha ŋaqi biaŋne jâmbâŋ moc baware hecnepie huoc, â megâŋ menao hecnepie feoc, â kikehuhu mâmâc râcneniŋ. 23 Erâ bulimakao motecne biuc sâko i hezu rikec epie nâhuc šeri enšepeneŋ. 24 Ŋokâ-nane e hâmoweczi mocwâc ɋârekac, erâ e qâsorieweczi mocwâc fuakac. Ž Iŋuc mume šeri embiŋ.

25 “Ehame mârâc ŋokâ e gieo juweczi risierâ hae râpeo domahuc gae â šeri mic šonšoŋ manarâ 26 kiŋaŋ motec moc ecneme fisime mu wioc ecnerâ muwec: `Wiac i wemocte? Ž 27 Eme eki muwec: `Ɋage ware fisikac. Eme sahac furu fisikacte mamac-ŋekiczi mume bulimakao motecne biuc sâko i qa rikec eŋgopeneŋ. Ž 28 Iŋuc âzâcneme mârâc ŋokâ e kimbeŋ qarâ haeo feocte qikiŋnewec. Eme mamac-ticnezi manarâ hae upeo hurâ mu bâmiriŋ ecnewec. 29 Ecneme mi mamana šiŋuc muwec: `Manakic, no jara wemo afecne kiŋaŋ qagarehuc juhuc dâŋge moc mi qatara-gareekopac. Eme go noniŋ motecne mac moc mi qikiŋne-naretec âgofâc-nane jaŋehec nâ šeri embeŋ. 30 Á šâhec ŋokâge e gore moneŋ mafa sasec gie bahuc sipiricke-fârewec, e iŋucnezi fisime mutec bulimakao motecne biuc sâko i hezu rikec ecneŋgopieŋ. Ž 31 Mume mamacnezi šiŋuc âzâcnewec: `Ŋokâ-mae, go dameŋ sâc nohec juwareekiczi wiac mi basaekic, wiac sasawa wirec-nâhec fokac. 32 Á ɋage e hâmoweczi mocwâc ɋârekac, erâ e qâsorieweczi mocwâc fuakac, irec šeri bubiaŋ epene sâckekac. Ž ”

Copyright information for `KMG